ହାଇଦ୍ରାବାଦ: ସୁପ୍ରିମକୋର୍ଟରେ ନ୍ୟାୟ ଦେବୀଙ୍କ ନୂଆ ପ୍ରତିମା । ହଟିଲା ନ୍ୟାୟ ଦେବୀଙ୍କ ଆଖିର ପଟି । ଖାଲି ସେତିକି ନୁହେଁ, ହାତରେ ଥିବା ତଲୱାର ହଟାଇ ସମ୍ବିଧାନ ପୁସ୍ତକ ଧରାଯାଇଛି। ସୁପ୍ରିମକୋର୍ଟ ଜଜଙ୍କ ପୁସ୍ତକାଳୟରେ ଏହି ନୂଆ ମୂର୍ତ୍ତି ରଖାଯାଇଛି । ଏହାଦ୍ବାରା ସନ୍ଦେଶ ଦିଆଯାଇଛି ଯେ, ଆଇନ ଅନ୍ଧ ନୁହେଁ । ତେଣୁ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ।
ନ୍ୟାୟଦେବୀଙ୍କ ନୂଆ ରୂପ କିପରି ?
ଜାତୀୟ ଗଣମାଧ୍ୟମରେ ଏନେଇ ଖବର ପ୍ରକାଶ ପାଇଛି । ଭିଡିଓରେ ଦେଖିବାକୁ ମିଳିଛି ଯେ, ନ୍ୟାୟଦେବୀଙ୍କ ପ୍ରତିମୂର୍ତ୍ତି ଧଳା ରଙ୍ଗର ରହିଛି । ଭାରତୀୟ ନାରୀ ପରି ରହିଛି ବେଶଭୂଷା । ମୁଣ୍ଡରେ ରାଣୀଙ୍କ ପରି ମୁକୁଟ ରହିଛି । ବେକରେ ହାର ଓ ହାତରେ ଚୁଡ଼ି ଭଳି ଅଳଙ୍କାର ପିନ୍ଧିଛନ୍ତି। ଆଉ ହାତରେ ତରାଜୁ ଧରିଥିବାର ନଜର ଆସିଛନ୍ତି । ସବୁଠୁ ବଡ଼ କଥା ହେଉଛି ହାତରେ ତଲୱାର ପରିବର୍ତ୍ତେ ସମ୍ବିଧାନ ଉଲ୍ଲେଖ ଥିବା ପୁସ୍ତକ ଧରିଥିବା ଦେଖିବାକୁ ମିଳିଛି ।
ଲେଡି ଜଷ୍ଟିସ କିଏ?
ବିଶେଷ ଭାବେ ଏହି ମୂର୍ତ୍ତି 'ନ୍ୟାୟ ଦେବୀ' ନାଁରେ ଜଣାଶୁଣା । ଯାହାକୁ ଇଂରାଜୀରେ କୁହାଯାଏ 'ଲେଡି ଜଷ୍ଟିସ' ହେଲେ ବର୍ତ୍ତମାନ ଏକ ଭିନ୍ନ ରୂପର ମୂର୍ତ୍ତିକୁ ନେଇ ଚର୍ଚ୍ଚା ଜୋର ଧରିଛି। ଯଦିଓ ସୁପ୍ରିମକୋର୍ଟ ଜଜଙ୍କ ପୁସ୍ତକାଳୟରେ ଏହାକୁ ଦେଖିବାକୁ ମିଳିଛି, ତେବେ ଆଗକୁ ଏହା କେଉଁଠି କେଉଁଠି ରଖାଯିବ ସେନେଇ କୌଣସି ସ୍ପଷ୍ଟୀକରଣ ଦିଆଯାଇନାହିଁ।