ଇମ୍ଫାଲ: କିଛି ମାସର ବ୍ୟବଧାନ ପରେ ପୁଣି ଅଶାନ୍ତ ହୋଇପଡିଛି ମଣିପୁର । ରାଜ୍ୟରେ ହିଂସା ଦେଖିବାକୁ ମିଳୁଥିବା ବେଳେ ଏହାକୁ ରୋକିବାରେ ବିରେନ ସରକାର ବିଫଳ ଦର୍ଶାଇ ସମର୍ଥନ ପ୍ରତ୍ୟାହାର କରିଛି ନ୍ୟାସନାଲ ପିପୁଲ୍ସ ପାର୍ଟି (NPP) । ମଣିପୁର ହିଂସାକୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନେଇଛି ଏନପିପି । ତେବେ ଏନପିପି ସମର୍ଥନ ପ୍ରତ୍ୟାହାର ପରେ ବି ସୁରକ୍ଷିତ ରହିଛି ବିଜେପି ସରକାର । କାରଣ ଏନପିପି-ବିଜେପି ମଧ୍ୟରେ ମେଣ୍ଟ ନଥିଲା । ନିର୍ବାଚନ ପରେ ବିଜେପି ସରକାରକୁ ସମର୍ଥନ ଜଣାଇଥିଲା ଏନପିପି ।
କାହିଁକି ସମର୍ଥନ ପ୍ରତ୍ୟାହାର କଲା NPP:
ଏନପିପି କହିଛି, ମଣିପୁର ହିଂସା ରୋକିବାରେ ଓ ସ୍ଥିତି ନିୟନ୍ତ୍ରଣ ଆଣିବାରେ ବିରେନ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି । ତେଣୁ ବିଜେପି ସରକାରକୁ ସମର୍ଥନ ଫେରାଇ ନେଉଛୁ । ମଣିପୁରରେ 60ଟି ବିଧାନସଭା ଆସନ ରହିଥିବା ବେଳେ ଏନପିପିର 7 ଜଣ ସଦସ୍ୟ ଅଛନ୍ତି ।
ବିଜେପିର ସଂଖ୍ୟା ଗଣିତ କଣ ?
ବିଜେପି ପାଖରେ ବର୍ତ୍ତମାନ 37 ସିଟ ରହିଛି । ଯାହାକି ବହୁମତ ଠାରୁ ଢେର ଆଗରେ । ଏଥିରେ ଜନତା ଦଳର 5 ଜଣ ବିଧାୟକ ବି ସାମିଲ ଅଛନ୍ତି । 2022ରେ ଏହି ବିଧାୟକ ସାମିଲ ହୋଇଥିଲେ । ଏହା ବାଦ୍ ନାଗା ପିପୁଲ୍ସ ଫ୍ରଣ୍ଟର 5 ବିଧାୟକ, ଜେଡିୟୁର 1 ଓ ସ୍ବାଧୀନ ବିଧାୟକଙ୍କ ମଧ୍ୟ ସମର୍ଥନ ରହିଛି ।