ନୂଆଦିଲ୍ଲୀ:ଦିଲ୍ଲୀ ଅବକାରୀ ଘୋଟାଲା ମାମଲାରେ ‘ଇଡି’ ଦ୍ବାରା ଗିରଫ ହୋଇଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଗତକାଲି ସର୍ବୋଚ୍ଚ କୋର୍ଟରୁ ଅନ୍ତରୀଣ ଜାମିନ ମିଳିଛି । 50 ଦିନ ଜେଲରେ ରହିବା ସହ ଦୀର୍ଘ ଆଇନଗତ ଲଢେଇ ପରେ ଗତକାଲି (ଶୁକ୍ରବାର) ସଂଧ୍ୟାରେ ସେ ତିହାର ଜେଲରୁ ମୁକ୍ତ ହୋଇଛନ୍ତି । ବିଶାଳ ରୋଡ ସୋ’ ରେ ବାସଭବନକୁ ଫେରିଥିବା କେଜ୍ରିଓ୍ବାଲ ଆଜି (ଶନିବାର) ପାଓ୍ବାର ସୋ’ କରିବେ । ଆଜି କେଜ୍ରିଓ୍ବାଲଙ୍କ ଏକାଧିକ କାର୍ଯ୍ୟକ୍ରମ ରହିଛି । ପୂର୍ବାହ୍ନରେ ସେ କନ୍ନଟପ୍ଲେସରେ ଥିବା ହନୁମାନ ମନ୍ଦିରରେ ଦର୍ଶନ ଓ ପୂଜାର୍ଚ୍ଚନା କରିବେ । ପରେ ଅପରାହ୍ନରେ ଦକ୍ଷିଣ ଦିଲ୍ଲୀରେ ଏକ ରୋଡ ସୋରେ ମଧ୍ୟ ଅଂଶଗ୍ରହଣ କରିବେ । ଆଜିର ପୁରା କାର୍ଯ୍ୟସୂଚୀ ସମ୍ପର୍କରେ ସେ ନିଜେ ଟ୍ବିଟ୍ କରି ସୂଚନା ଦେଇଛନ୍ତି ।
କେଜ୍ରିଓ୍ବାଲଙ୍କ ସୂଚନା ଅନୁସାରେ, ପୂର୍ବାହ୍ନ 11ଟାରେ ସେ କନ୍ନଟପ୍ଲେସ ସ୍ଥିତ ହନୁମାନ ମନ୍ଦିରରେ ସେ ଦର୍ଶନ ଓ ପୂଜାର୍ଚ୍ଚନା କରିବେ । ଏହା ପରେ ସେ ‘ଆମ ଆଦମୀ ପାର୍ଟି’ କାର୍ଯ୍ୟାଳୟରେ ପହଞ୍ଚିବେ । ସେଠାରେ ଅପରାହ୍ନ 1ଟାରେ ସେ ଏକ ସାମ୍ବାଦିକ ସମ୍ମିଳନୀ କରିବେ । ଅପରାହ୍ନରେ ଦକ୍ଷିଣ ଦିଲ୍ଲୀ- ମହରୌଲୀ ମଧ୍ୟରେ ଏକ ରୋଡ ସୋ’ରେ ଅଂଶଗ୍ରହଣ କରିବେ । ସଂଧ୍ୟାରେ ପୁଣି ଏକ ରୋଡ ସୋ’ ମଧ୍ୟ ପୂର୍ବ-ଦିଲ୍ଲୀ ଓ କୃଷ୍ଣାନଗର ମଧ୍ୟରେ ଆୟୋଜିତ ହେବ । ସେଥିରେ ମଧ୍ୟ ସେ ଅଂଶଗ୍ରହଣ କରିବେ । ତେବେ ଏହି ପୁରା କାର୍ଯ୍ୟକ୍ରମରେ ସମସ୍ତଙ୍କୁ ସାମିଲ ହେବା ପାଇଁ କେଜ୍ରିଓ୍ବାଲ ନିମନ୍ତ୍ରଣ ମଧ୍ୟ କରିଛନ୍ତି ।
ଗତକାଲି କେଜ୍ରିଓ୍ବାଲଙ୍କୁ ସର୍ତ୍ତମୂଳକ ମଧ୍ୟବର୍ତ୍ତୀକାଳୀନ ଜାମିନ ଦେଇଛନ୍ତି ସର୍ବୋଚ୍ଚକୋର୍ଟ । ଜୁନ ପହିଲା ପର୍ଯ୍ୟନ୍ତ ସେ ବେଲ୍ ପାଇଛନ୍ତି । ଏହା ପରେ ସେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ପାଇଛନ୍ତି । ଏହି ଅବଧି ମଧ୍ୟରେ ସେ ମୁଖ୍ୟମନ୍ତ୍ରୀ ଭାବେ ସରକାରୀ କାମ କରିପାରିବେନାହିଁ କିମ୍ବା ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇପାରିବେ ନାହିଁ । କାଲି ଜେଲରୁ ମୁକ୍ତ ହେବା ପରେ ବିଶାଳ ରାଲି କରି ବାସଭବନକୁ ଆସିଥିଲେ କେଜ୍ରିଓ୍ବାଲ । ରାସ୍ତାରେ ସେ ଖୋଲାଗାଡିରେ ଲୋକଙ୍କୁ ସମ୍ବୋଧନ କରିଥିଲେ । ବେଲ ପାଇଁ ସୁପ୍ରିମକୋର୍ଟଙ୍କୁ ଧନ୍ୟବାଦ ଜଣାଇବା ସହ ଦେଶର ଲୋକତନ୍ତ୍ରକୁ ବଞ୍ଚାଇବା ପାଇଁ 140 କୋଟି ଭାରତୀୟଙ୍କ ସମର୍ଥନ ମଧ୍ୟ କାମନା କରିଥିଲେ ।