ଢାକା: ବାଂଲାଦେଶରେ ହିଂସକ ଆନ୍ଦୋଳନରେ ଅଂଶଗ୍ରହଣ କରି କ୍ଷମତା ପରିବର୍ତ୍ତନ କରିଥିବା ଆନ୍ଦୋଳକାରୀମାନେ ନିଜ ଦେଶର ସ୍ବାଧୀନତା ସଂଗ୍ରାମର ଇତିହାସ ମଧ୍ୟ ଭୁଲିବାକୁ ପଛାଇଲେ ନାହିଁ । 1971 ମସିହାରେ ଭାରତୀୟ ସେନା ନିକଟରେ ପାକିସ୍ତାନ ଆତ୍ମସମର୍ପଣ କରିବା ସହ ବାଂଲାଦେଶ ସ୍ବାଧୀନ ହୋଇଥିଲା । ହେଲେ ଶହୀଦ ସ୍ମାରକୀ ସଂଗ୍ରହାଳୟରେ ଥିବା ସେହି ଆତ୍ମସମର୍ପଣ ଚୁକ୍ତିନାମା ବେଳର ପ୍ରତିକୃତିକୁ ମଧ୍ୟ ଆନ୍ଦୋଳନକାରୀମାନେ ଭାଙ୍ଗି ଦେଇଛନ୍ତି । ବାଂଲାଦେଶ ରାଜଧାନୀ ଢାକାର ମୁଜିବୁରନଗର ସ୍ଥିତ ଶହୀଦ ସ୍ମାରକୀ ସଂଗ୍ରହାଳୟରେ ଏହି ପ୍ରତିକୃତି ରଖାଯାଇଥିଲା । ଏହି ଘଟଣା ନେଇ କଂଗ୍ରେସ ସାଂସଦ ଶଶୀ ଥରୁର ଏକ୍ସ(X)ରେ ପୋଷ୍ଟ କରିଛନ୍ତି । ମହମ୍ମଦ ୟୁନୁସଙ୍କ ନେତୃତ୍ବାଧୀନ ସରକାର ସେଠାରେ ଆଇନ ଶୃଙ୍ଖଳା ସ୍ଥିତି ଫେରାଇବା ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଟ୍ବିଟରେ ଶଶୀ ଲେଖିଛନ୍ତି ।
1971ରେ ଭାରତ ସହଯୋଗରେ ସ୍ବାଧୀନ ହୋଇଥିଲା ପାକିସ୍ତାନ:-
1971ରେ ବାଂଲାଦେଶ ବିଶ୍ବ ମାନଚିତ୍ରରେ ସ୍ବାଧୀନ ରାଷ୍ଟ୍ର ଭାବେ ଆତ୍ମପ୍ରକାଶ କରିଥିଲା । ଏହି ଆନ୍ଦୋଳନ ଓ ସ୍ବାଧିନତାର ମୁଖ୍ୟ ପୃଷ୍ଠପୋଷକ ଥିଲା ଭାରତ । ପାକିସ୍ତାନ ସହ ଯୁଦ୍ଧ ଲଢିଥିଲା ଭାରତୀୟ ସେନା । ପାକିସ୍ତାନ ସେନା ଭାରତ ସମ୍ମୁଖରେ ଆତ୍ମସମର୍ପଣ କରିବାକୁ ବାଧ୍ୟ ହେବା ପରେ ବାଂଲାଦେଶ ସ୍ବାଧୀନ ଦେଶ ଭାବେ ମାନ୍ୟତା ପାଇଥିଲା । ଭାରତ ସହଯୋଗରେ ବାଂଲା ସ୍ବାଧୀନତା ଆନ୍ଦୋଳନର ନେତୃତ୍ବ ନେଉଥିବା ଶେଖ ମୁଜିବୁର ରେହେମାନ ବାଂଲାଦେଶର ପ୍ରଥମ ରାଷ୍ଟ୍ରପତି ଓ ପରେ ପ୍ରଧାନମନ୍ତ୍ରୀ ହୋଇଥିଲେ । ତେବେ ପାକିସ୍ତାନ ସେନାର ଆତ୍ମସମର୍ପଣ ଚୁକ୍ତିନାମା ବେଳର ପ୍ରତିମୂର୍ତ୍ତି ବାଂଲାଦେଶ ଶହୀଦ ସ୍ମାରକୀରେ ମଧ୍ୟ ସ୍ଥାନ ପାଇଥିଲା । ଏହା ଉଭୟ ବାଂଲାଦେଶ ଓ ଭାରତର ଗୌରବ ଓ ବନ୍ଧୁତ୍ବର ନିଦର୍ଶନ ଥିଲା । ହେଲେ ଏହାକୁ ମଧ୍ୟ ଭାଙ୍ଗିବାକୁ ପଛାଇନାହାନ୍ତି ବାଂଲା ଉପଦ୍ରବକାରୀ ।
ଭାରତୀୟ ସେନା ନିକଟରେ ପାକିସ୍ତାନର ଆତ୍ମସମର୍ପଣ ପ୍ରତିମୂର୍ତ୍ତିକୁ ଭାଙ୍ଗିଲେ (ETV Bharat Odisha) ବିଭିନ୍ନ ଐତିହ୍ୟସ୍ଥଳରେ ଭଙ୍ଗାରୁଜା:-
1971 ରେ ଭାରତ ନିକଟରେ ଆତ୍ମସମର୍ପଣ କରିଥିଲା ପାକିସ୍ତାନ ସେନା, ସ୍ବାଧୀନ ହୋଇଥିଲା ବାଂଲାଦେଶ (ETV Bharat Odisha) ଆନ୍ଦୋଳନ ହିଂସକ ରୂପ ନେବା ପରେ ବାଂଲାଦେଶର ଏକାଧିକ ସ୍ଥାନରେ ଶେଖ ମୁଜିବୁର ରେହେମାନଙ୍କ ପ୍ରତିମୂର୍ତ୍ତି ଭଙ୍ଗାଯାଇଛି । ଇନ୍ଦିରା ଗାନ୍ଧୀ କଲଚୁରାଲ ସେଣ୍ଟରରେ ମଧ୍ୟ ଭଙ୍ଗାରୁଜା ହୋଇଥିଲା । ଦେଶର ଏକାଧିକ ଐତିହ୍ୟ ଓ ଅନ୍ୟ ସ୍ଥାନରେ ଭଙ୍ଗାରୁଜା ପରେ ଏବେ ଶହୀଦ ସ୍ମାରକୀ ମଧ୍ୟ ବାଦ ପଡିନି । ଯାହାକୁ ନେଇ ବାଂଲାଦେଶର ଆନ୍ଦୋଳନକାରୀମାନଙ୍କୁ ତୀବ୍ର ସମାଲୋଚନାର ଶିକାର ହେବାକୁ ପଡିଛି । ହେଲେ ଅନ୍ତରୀଣ ସରକାର ଗଠନ ହେବା ପରେ ମଧ୍ୟ ସ୍ଥିତି ଏବେ ବି ଅଣାୟତ୍ତ ରହିଛି, ଏହା ଏହି ଘଟଣାରୁ ସ୍ପଷ୍ଟ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
