ନୂଆଦିଲ୍ଲୀ: ଦିଲ୍ଲୀ ମଦ ଦୁର୍ନୀତି ମାମଲାରେ ହାଇକୋର୍ଟରୁ ନିରାଶ ହେବା ପରେ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ସେ ହାଇକୋର୍ଟଙ୍କ ରାୟକୁ ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ କରିଛନ୍ତି । ଆଜି ସକାଳ ୧୦ଟା ୩୦ରେ ଏହି ଆବେଦନର ତ୍ବରତି ଶୁଣାଇ ପାଇଁ ତାଙ୍କର ଓକିଲ ଦାବି କରିଛନ୍ତି । ତେବେ ଇଡି ଗିରଫଦାରୀ ଓ ରିମାଣ୍ଡ ବିରୋଧରେ କେଜ୍ରିୱାଲ ହାଇକୋର୍ଟରେ ଆବେଦନ କରିଥିବା ବେଳେ ଗତକାଲି (ମଙ୍ଗଳବାର) କୋର୍ଟ ଏହାକୁ ବୈଧ ଦର୍ଶାଇ ତାଙ୍କର ଆବେଦନ ଖାରଜ କରିଦେଇଥିଲେ ।
ଗତକାଲି ତାଙ୍କ ଆବେଦନର ଶୁଣାଣି ବେଳେ ଦିଲ୍ଲୀ ହାଇକୋର୍ଟ କହିଥିଲେ ଯେ, ଆପ୍ ସୁପ୍ରିମୋ ଅନ୍ୟମାନଙ୍କ ସହ ମିଶି ଏକ ଅପରାଧିକ ଷଡ଼ଯନ୍ତ୍ର ରଚିଥିଲେ ଏବଂ ଏଥିରେ ଅପରାଧର ଆୟ ବ୍ୟବହାର କରିଥିଲେ । ଏନେଇ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ପକ୍ଷରୁ ପ୍ରମାଣ ଦିଆଯାଇଛି । କେଜ୍ରିୱାଲ ନୂତନ ଅବକାରୀ ନୀତି ପ୍ରଣୟନ ଓ ଲାଞ୍ଚ ମାଗିବା ଘଟଣାରେ ବ୍ୟକ୍ତିଗତ ଭାବେ ସମ୍ପୃକ୍ତ ଥିଲେ । ଆପ୍ ରାଷ୍ଟ୍ରୀୟ ସଂଯୋଜକ ଭାବେ ସେ ଏହି ଦୁର୍ନୀତିରେ ସକ୍ରିୟ ରୂପେ ଜଡ଼ିତ ଥିଲେ ।
ରାୟ ପ୍ରଦାନ ବେଳେ ଜଷ୍ଟିସ ସ୍ବରନକାନ୍ତ ଶର୍ମା କହିଥିଲେ ଯେ, କେଜ୍ରିୱାଲଙ୍କ ରିମାଣ୍ଡକୁ ଅବୈଧ କୁହାଯାଇ ପାରିବ ନାହିଁ । ତାଙ୍କର ଗିରଫଦାରୀ ସମ୍ପୂର୍ଣ୍ଣ ବୈଧ ଅଟେ । ଦିଲ୍ଲୀ ହାଇକୋର୍ଟଙ୍କ ଏହି ରାୟ ପରେ ଆପ୍ ନେତା ସୌରଭ ଭରଦ୍ବାଜ କହିଥିଲେ, ହାଇକୋର୍ଟଙ୍କ ଏହି ରାୟରେ ଆମ ସହମତ ନାହୁଁ ଏବଂ ଏହା ବିରୋଧରେ ସୁପ୍ରିମକୋର୍ଟଙ୍କ ଦ୍ବାରସ୍ଥ ହେବୁ ।