ନୂଆଦିଲ୍ଲୀ: ରାମ ମନ୍ଦିର ପ୍ରାଣ ପ୍ରତିଷ୍ଠା ଉତ୍ସବ ସମ୍ପର୍କରେ ଝିଅଙ୍କ ବିବାଦୀୟ ସୋସିଆଲ ମିଡିଆ ପୋଷ୍ଟ ଏବେ କଂଗ୍ରେସର ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ମଣିଶଙ୍କର ଆୟରଙ୍କୁ ଅଡୁଆରେ ପକାଇଛି । ସେ ଓ ତାଙ୍କ ଝିଅ ରହୁଥିବା ସୋସାଇଟିର ଓ୍ବେଲଫେୟାର କମିଟି ତାଙ୍କୁ ଘର ଖାଲି କରିବାକୁ ନୋଟିସ ଜାରି କରିଛି । 22 ତାରିଖରେ ଶ୍ରୀରାମ ଜନ୍ମଭୁମି ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ଉତ୍ସବ ସମାପିତ ହୋଇଛି । ଏହାର ଠିକ 2 ଦିନ ପୂର୍ବରୁ 20 ତାରିଖରେ ଆୟରଙ୍କ ଝିଅ ସୁରନ୍ୟା ଆୟର ସୋସିଆଲ ମିଡିଆରେ ଏକ ବିବାଦୀୟ ପୋଷ୍ଟ କରିଥିଲେ । ସେ ରାମ ମନ୍ଦିର ପ୍ରତିଷ୍ଠା ଉତ୍ସବକୁ ବିରୋଧ କରିବା ସହ 3 ଦିନିଆ ବ୍ରତ ରଖିଥିବା ପୋଷ୍ଟରେ ଉଲ୍ଲେଖ କରିଥିଲେ । ସେ ରଖିଥିବା ବ୍ରତ ମୁସଲିମ ସମୁଦାୟ ପ୍ରତି ସମବେଦନା ବୋଲି ମଧ୍ୟ ଲେଖିଥିଲେ ସୁରନ୍ୟା । ପରେ ଏହାକୁ ନେଇ ବିବାଦ ଦେଖିବାକୁ ମିଳିଥିଲା ।
ସୁରନ୍ୟାଙ୍କ ଏହି ପୋଷ୍ଟ, ସେ ରହୁଥିବା ଦିଲ୍ଲୀର ଜଙ୍ଗପୁରା ସ୍ଥିତ ସୋସାଇଟିରେ ଉତ୍ତେଜନା ସୃଷ୍ଟି କରିଥିଲା । ଏବେ ଏହି ସୋସାଇଟିର ରେସିଡେଣ୍ଟାଲ ଓ୍ବେଲଫ୍ୟାୟର କମିଟି ଆୟରଙ୍କ ପରିବାରକୁ ନୋଟିସ୍ ଜାରି କରିଛି । ଏପରି ମନ୍ତବ୍ୟ ସୋସାଇଟିରେ ରହୁଥିବା ଅନ୍ୟ ସଦସ୍ୟଙ୍କ ଧାର୍ମିକ ଭାବାବେଗକୁ ଆଘାତ ଦେଇପାରେ । ଏପରି କାର୍ଯ୍ୟକଳାପ ଶାନ୍ତି ମଧ୍ୟ ଭଙ୍ଗ କରିପାରେ । ଧର୍ମ ବିରୋଧୀ ମନ୍ତବ୍ୟ ପାଇଁ ଆୟର ଓ ତାଙ୍କ ଝିଅ ସାର୍ବଜନୀନ ଭାବେ କ୍ଷମା ମାଗନ୍ତୁ, ନଚେତ ସୋସାଇଟି ଛାଡନ୍ତୁ ବୋଲି କମିଟି ଦ୍ବାରା ଜାରି ନୋଟିସରେ କୁହାଯାଇଛି । ତେବେ ଏ ସମ୍ପର୍କରେ ମଣିଶଙ୍କରଙ୍କ ପରିବାର ପକ୍ଷରୁ କୌଣସି ପ୍ରତିକ୍ରିୟା ଏପର୍ଯ୍ୟନ୍ତ ସାମ୍ନାକୁ ଆସିନି ।