बुलावायो ZIM vs AFG 2nd Test Live Streaming : झिम्बाब्वे राष्ट्रीय क्रिकेट संघ विरुद्ध अफगाणिस्तान राष्ट्रीय क्रिकेट संघ यांच्यातील दोन सामन्यांच्या कसोटी मालिकेतील दुसरा आणि शेवटचा सामना आज म्हणजेच 2 जानेवारी रोजी खेळवला जाणार आहे. उभय संघांमधील हा सामना बुलावायो येथील क्वीन्स स्पोर्ट्स क्लब इथं भारतीय वेळेनुसार दुपारी 1.30 वाजता खेळवला जाईल. दोन्ही संघांमधील पहिला कसोटी सामना अनिर्णित राहिला होता.
पहिल्या कसोटीत काय झालं :बॉक्सिंग-डे कसोटीत झिम्बाब्वेचा कर्णधार क्रेग एरविननं नाणेफेक जिंकून फलंदाजीचा निर्णय घेतला. नाणेफेक जिंकून प्रथम फलंदाजी करण्याचा निर्णय घेतल्यानंतर झिम्बाब्वेनं पहिल्या डावात 135.2 षटकांत 586 धावांचा डोंगर उभारला. प्रत्युत्तरात पहिल्या डावात फलंदाजीला आलेला अफगाणिस्तानच्या संघानही 197 षटकं फलंदाजी करत 699 धावा केल्या. तर दुसऱ्या डावात फलंदाजी करताना झिम्बाब्वेनं 34 षटकात 142 धावा केल्या आणि सामना ड्रॉ झाला.
दोन्ही संघांचा मालिका जिंकण्याचा प्रयत्न : या मालिकेतील पहिला सामना अनिर्णित राहिल्यानंतर मालिकेतील दुसरा सामना दोन्ही संघांसाठी महत्त्वाचा आहे. झिम्बाब्वे आणि अफगाणिस्तानचे संघ नव्या रणनीतीसह दुसऱ्या सामन्यात उतरतील आणि सामना जिंकून मालिकाही जिंकण्याचा प्रयत्न करतील. मालिकेतील पहिल्या सामन्यात झिम्बाब्वेचा स्टार फलंदाज शॉन विल्यम्सनं 154 धावांची शानदार खेळी केली. याशिवाय क्रेग एर्विन आणि ब्रायन बेनेट यांनीही शतकी खेळी खेळली. अफगाणिस्तानच्या रहमत शाह आणि हशमतुल्ला शाहिदी यांनी द्विशतकं तर अफसर झझाईनं शतक झळकावलं होतं.
दोन्ही संघांचा हेड-टू-हेड रेकॉर्ड काय :झिम्बाब्वे आणि अफगाणिस्तान यांच्यात आतापर्यंत एकूण तीन कसोटी सामने खेळले गेले आहेत. यात दोन्ही संघांमध्ये चुरशीची स्पर्धा पाहायला मिळाली. दोन्ही संघांनी प्रत्येकी एक सामना जिंकला आहे. तर, एक सामना अनिर्णित राहिला.
खेळपट्टी कशी असेल : झिम्बाब्वे आणि अफगाणिस्तान यांच्यातील दुसरा कसोटी सामना बुलावायो इथं होणार आहे. बुलावायो येथील क्वीन्स स्पोर्ट्स क्लबची खेळपट्टी फलंदाजांसाठी उपयुक्त ठरते. पहिले तीन दिवस या मैदानावर फलंदाजी करणं सोपं जाईल. या खेळपट्टीवर पहिल्या डावातील सरासरी धावसंख्या 500 हून अधिक धावांपर्यंत जाऊ शकते. जसजसा सामना पुढं जाईल तसतशी फिरकीपटूंचीही मदत मिळू शकेल, पण वेगवान गोलंदाजांना या खेळपट्टीकडून फारशा आशा नसतील. या खेळपट्टीवर, नाणेफेक जिंकणारा संघ प्रथम फलंदाजी करण्यास प्राधान्य देऊ शकतो, कारण सुरुवातीच्या दिवसांत फलंदाजीसाठी परिस्थिती खूपच अनुकूल असेल.
झिम्बाब्वे आणि अफगाणिस्तान यांच्यातील दुसरा कसोटी सामना कधी खेळला जाईल?