बांगी (मलेशिया) ICC Mens T20 World : क्रिकेटच्या मैदानावर अनेकदा विक्रम होतात आणि मोडले जातात. अनेक वेळा तर असे सामने बघितले जातात ज्यावर विश्वास ठेवणं कठीण जातं. असाच एक आश्चर्यकारक सामना मलेशियातील बांगी इथं पाहायला मिळाला. ICC T 20 विश्वचषक आशिया क्वालिफायर A चा 14 वा सामना बांगीच्या मैदानावर खेळला गेला. ज्यात मंगोलियन संघ अवघ्या 10 धावांत गारद झाला. हा टी-20 सामना होता. पण, मंगोलियाच्या संघाला 10 षटकांत 10 धावा करता आल्या आणि प्रत्युत्तरात सिंगापूरनं अवघ्या 5 चेंडूत सामना जिंकला. मात्र, यात एक विकेटही पडली. या संपूर्ण सामन्यात हर्ष भारद्वाज नावाच्या भारतीय वंशाच्या 17 वर्षीय गोलंदाजानं वर्चस्व गाजवलं आणि या खेळाडूनं अवघ्या 3 धावांत 6 बळी घेतले.
हर्ष भारद्वाजचा चमत्कार : हर्ष भारद्वाज हा लेगस्पिनर आहे, तरीही सिंगापूरचा कर्णधार मनप्रीत सिंगनं त्याला पहिल्या षटकात गोलंदाजी दिली. हर्षनं आपल्या कर्णधाराचा निर्णय सार्थ ठरवत, आपल्या 4 षटकात केवळ 3 धावा दिल्या. या खेळाडूनं 6 विकेट घेतल्या. विशेष म्हणजे पॉवरप्लेपूर्वीच मंगोलियानं 7 धावांत 5 विकेट गमावल्या होत्या आणि हर्षनं आपल्या डावातील पाच विकेट्स पूर्ण केल्या होत्या.