मुंबई - Pyar Ke Do Naam Movie : रिलायन्स एंटरटेनमेंटनं 4 एप्रिल रोजी आपल्या 'प्यार के दो नाम' या नवीन चित्रपटाची घोषणा केली होती. यानंतर सोशल मीडियावर एक पोस्टर व्हायरल झालं होतं. या पोस्टरमध्ये एक अभिनेता आणि एक अभिनेत्री दिसत होते. मात्र त्याचे चेहरे हे पुस्तकांच्या मागे लपवण्यात आले होते. अभिनेत्रीच्या हातात राष्ट्रपिता महात्मा गांधी यांचे पुस्तक आणि अभिनेत्याच्या हातात जगाला शांतीचा संदेश देणारे महान नेल्सन मंडेला यांचं पुस्तक होतं. यानंतर या चित्रपटामध्ये लीड रोलमध्ये कोण असेल याचा अनेकजण पोस्टवर प्रतिक्रिया देऊन अंदाज लावत होते. मात्र चाहत्यांनी व्यक्त केलेले सर्व अंदाज फोल ठरले आहेत. आता या स्टार्स चेहऱ्यावरून पुस्तके हटवण्यात आल्यानंतर या चित्रपटामधील मुख्य स्टारकास्ट समोर आली आहे.
'प्यार के दो नाम' चित्रपटामधील दुसरे पोस्टर रिलीज :आता शेअर केलेल्या पोस्टरमध्ये अभिनेता भव्य सचदेवा आणि अभिनेत्री अंकिता साहू एका हिरव्यागार बागेत खुर्चीच्या मागे उभे असलेले दिसत आहेत. याशिवाय पोस्टरमध्ये अंकितानं गुलाबी आणि लॅव्हेंडर रंगांना सूट परिधान केला आहे तर दुसरीकडे भव्यनं निळ्या रंगाचा सूट घातला आहे. आता फिल्म प्रोडक्शन हाऊस रिलायन्स एंटरटेनमेंटनेही चित्रपटाचे पोस्टर रिलीज करून सिनेमा रसिकांना एक भेट दिली आहेत. दानिश जावेद या चित्रपटाचे दिग्दर्शन करणार आहे. याशिवाय विजय गोयल आणि दानिश जावेद हे चित्रपटाचे निर्माते आहेत. हा चित्रपट 3 मे रोजी प्रदर्शित होणार आहे.