मुंबई - Hanuman box office collection : अभिनेता तेजा सज्जा आणि प्रशांत वर्मा दिग्दर्शित 'हनुमान' अजूनही जगभरात बॉक्स ऑफिसवर कमाई करत आहे. 12 फेब्रुवारीला मकर संक्रांतीच्या मुहूर्तावर पाच साऊथ चित्रपट बॉक्स ऑफिसवर प्रदर्शित झाले होते. या चित्रपटानं जगभरात 25 दिवसात बॉक्स ऑफिसवर 300 कोटीचा टप्पा ओलांडला आहे. दिग्दर्शक प्रशांत वर्मा यांनी चित्रपटाच्या कमाईचे नवे आकडे जाहीर केले आहेत. 'हनुमान' चित्रपट पाहण्यासाठी चित्रपटगृहांमध्ये प्रचंड गर्दी होत आहे. अनेक पालक आपल्या मुलांना हा चित्रपट पाहण्यासाठी नेत आहेत.
300 कोटींच्या क्लबमध्ये प्रवेश : प्रशांत वर्मानं त्याच्या इंस्टाग्राम अकाउंटवर चित्रपटाची 25 दिवसांची कमाईचे आकडे जाहीर करत या पोस्टवर लिहिलं, ''हनुमान'नं 25 दिवसांत 300 कोटींहून अधिक कमाई केली असून या चित्रपटाची कमाई आता देखील प्रचंड वेगानं सुरूच आहे. चित्रपटाला मिळालेल्या प्रेमाबद्दल प्रेक्षकांचे आभार कसे मानावे हेच समजत नाही, चित्रपटाला पाठिंबा देणाऱ्या प्रत्येक कुटुंबाचा मी आभारी आहे.'' देशांतर्गत चित्रपटाचे कलेक्शन 189.83 कोटींवर पोहोचले आहे. हनुमानने पहिल्या आठवड्यात 89.8 कोटी, दुसऱ्या आठवड्यात 60.6 कोटी आणि तिसऱ्या आठवड्यात 29.95 कोटी रुपयांची कमाई केली आहे. तर हिंदी व्हर्जनमध्ये या चित्रपटाने 25 दिवसांत 50 कोटींहून अधिकचा व्यवसाय केला आहे.