मुंबई Bigg Boss Marathi 5 : 'बिग बॉस मराठी 5'च्या घरात मंगळवारी निक्की आणि अरबाजमध्ये जोरदार भांडणं झाली होती. अरबाजला निक्की आणि अभिजीतमधील मैत्री आवडत नसल्यानं घरात खटके उडाले होते. वादावादी आणि संतापामध्ये अरबाजनं घरातील वस्तूंची आदळ-आपट केली. यामुळे बिग बॉसच्या घरातील वातावरण तणावाचे झाले होते. आता घरात शांतता निर्माण झाली आहे. घरातील सदस्य या भांडणावरून निक्की आणि अरबाजची फिरकी घेताना दिसत आहेत. बिग बॉसच्या निर्मात्यांनी एक प्रोमो इंस्टाग्राम पेजवर शेअर केला आहे. यात सूरज आणि आर्या हे निक्की, अरबाज, अभिजीत यांच्यातील नात्यांवर एक गाणं गाताना दिसत आहेत.
निक्की आणि अरबाजची घेतली फिरकी : यानंतर घरातील इतर सदस्यही या तिघांची फिरकी घेताना दिसत आहेत. आज 28 ऑगस्टच्या एपिसोडमध्ये घरातील वातावरण हे शांत असल्याचं दाखवण्यात येणार आहे. निक्कीनं आता टीम 'ए' सोडली आहे. यानंतर तिला बिग बॉसच्या घरात अभिजीत सावंतचा पाठिंबा मिळत आहे. निक्की आणि अभिजीतची जोडी एकत्र राहिल्यानंतर यांच्यात चांगली मैत्री पाहायला मिळत आहे. दरम्यान आणखी एक प्रोमो सोशल मीडियावर व्हायरल झाला आहे. यामध्ये वर्षा उसगावकर, अंकिता वालावलकर आणि सूरज चव्हाण हे तिघेही किचनमधल्या कामावरून बोलताना दिसत आहेत. या प्रोमोमध्ये खट्याळ सासू आणि नाठाळ सुनेची 'तू तू मैं मैं' धमाल दाखविण्यात आली आहे.