नवी दिल्ली Atal Bihari Vajpayee Death Anniversary : भारताचे माजी पंतप्रधान भारतरत्न अटल बिहारी वाजपेयी यांना राष्ट्रपती द्रौपदी मुर्मू, पंतप्रधान नरेंद्र मोदी यांनी आज त्यांच्या स्मृतीदिनानिमित्त आदरांजली वाहिली. भारतरत्न अटल बिहारी वाजपेयी यांचा आज सहावा स्मृतीदिन आहे. त्यानिमित्त राष्ट्रपती द्रौपदी मुर्मू, पंतप्रधान नरेंद्र मोदी यांनी 'सदैव अटल' या त्यांच्या स्मृतीस्थळावर जाऊन आदरांजली वाहिली. तर देशभरातील अनेक दिग्गज नेत्यांनी सोशल माध्यमातून भारतरत्न अटल बिहारी वाजपेयी यांना त्यांच्या स्मृती दिनानिमित्त आदरांजली वाहिली आहे.
पंतप्रधान नरेंद्र मोदी यांनी वाहिली आदरांजली :पंतप्रधान नरेंद्र मोदी यांनी आज सदैव अटल या माजी पंतप्रधान अटल बिहारी वाजपेयी यांच्या स्मृतीस्थळावर जाऊन त्यांना आदरांजली वाहिली. यावेळी पंतप्रधान नरेंद्र मोदी यांनी आपल्या सोशल माध्यमांवर एक पोस्ट केली. यावेळी त्यांनी "अटल बिहारी वाजपेयी यांनी राष्ट्र उभारणीत अतुलनीय योगदान दिलं आहे. राष्ट्र उभारणीत दिलेल्या अतुलनीय योगदानासाठी अटल बिहारी वाजपेयी यांचं देशातील नागरिक स्मरण करतात. त्यांनी आपलं संपूर्ण आयुष्य आपल्या देशातील नागरिकांना चांगल्या दर्जाचं जीवन जगता यावं, यासाठी समर्पित केलं. भारताच्या विकासाचं त्यांचं व्हिजन पूर्ण करण्यासाठी आम्ही सदैव कार्यरत राहू," असं त्यांनी आपल्या पोस्टमध्ये शेयर केलं.