लखनऊ :कुंभमेळ्याला जाणाऱ्या भाविकांची कार आणि बसच्या भीषण अपघातात तब्बल 10 भाविकांवर काळानं घाला घातला. ही घटना प्रयागराज-मिर्झापूर महामार्गावर मेजा परिसरात शनिवारी पहाटे 2 वाजताच्या सुमारास घडली. या अपघातात 12 पेक्षा अधिक भाविक जखमी झाले आहेत. घटनास्थळावर जखमी भाविकांच्या आक्रोशानं आजुबाजुच्या नागरिकांनी घटनास्थळावर धाव घेत बचावकार्य केलं. घटनेची माहिती मिळताच पोलिसांनी तत्काळ घटनास्थळावर धाव घेत जखमींना रुग्णालयात दाखल केलं.
कुंभमेळ्याला जात होते भाविक :छत्तीसगडमधील भाविक प्रयागराज-मिर्झापूर महामार्गावरुन बोलेरो गाडीनं कुंभमेळ्याला जात होते. यादरम्यान मेजा परिसरात मध्य प्रदेशहून येणाऱ्या भाविकांनी भरलेल्या बस आणि कारची जोरदार धडक झाली. या भीषण अपघातात 10 जणांचा मृत्यू झाला असून 12 पेक्षा अधिक भाविक जखमी झाले आहेत. या अपघातात बोलेरोमध्ये प्रवास करणाऱ्या 10 भाविकांचा मृत्यू झाला. बसमध्ये प्रवास करणारे काही जण जखमीही झाले आहेत. या अपघातात बोलेरो पूर्णपणे चक्काचूर झाली आहे. अपघातानंतर घटनास्थळी आरडाओरडा सुरू झाल्यानंतर याबाबतची माहिती पोलिसांना देण्यात आली. अपघाताची माहिती मिळताच पोलीस घटनास्थळी दाखल झाले. पोलिसांनी नागरिकांच्या मदतीनं कारमध्ये अडकलेल्या जखमींना बाहेर काढलं.