എറണാകുളം:തൃശ്ശൂര്‍ പൂരം കലക്കല്‍ വിവാദത്തില്‍ ഹൈക്കോടകിയില്‍ സത്യവാങ്മൂലം സമര്‍പ്പിച്ച് സംസ്ഥാന സര്‍ക്കാര്‍. വിവാദത്തില്‍ സമഗ്രമായുള്ള അന്വേഷണത്തിനായി എഡിജിപി എച്ച് വെങ്കിടേഷിന്‍റെ നേതൃത്വത്തില്‍ പ്രത്യേക അന്വേഷണ സംഘത്തെ നിയോഗിച്ചതായി കോടതിയെ സര്‍ക്കാര്‍ അറിയിച്ചു. പൂരം അലങ്കോലപ്പെടുത്തിയതിൽ ജുഡീഷ്യൽ അന്വേഷണം ആവശ്യപ്പെട്ടുള്ള ഹർജിയിലാണ് സർക്കാരിന്‍റെ സത്യവാങ്മൂലം.
ജനങ്ങളുടെ സുരക്ഷ കണക്കിലെടുത്ത് പൂരം ഭംഗിയായി നടത്തുക എന്നത് മാത്രമായിരുന്നു സര്‍ക്കാരിന്‍റെ ലക്ഷ്യം. ഉദ്യോഗസ്ഥതല വീഴ്‌ചയുണ്ടായെന്ന് കണ്ടെത്തിയാല്‍ കര്‍ശന നടപടി സ്വീകരിക്കും. ചുമതലയിലുണ്ടായിരുന്ന എഡിജിപി പ്രശ്‌നപരിഹാരത്തിന് ഇടപെടാതിരുന്നത് വീഴ്‌ചയാണെന്ന് ഡിജിപി അറിയിച്ചിരുന്നു.