നിലംപൊത്താറായി ലയങ്ങള്‍: നടപടിയില്ല, ശമ്പള കുടിശ്ശിക വേറെയും; തോട്ടം തൊഴിലാളികള്‍ സമരത്തിലേക്ക് - INTUC STRIKE

ലയങ്ങളുടെ ശോച്യാവസ്ഥ പരിഹരിക്കണമെന്നും ശമ്പളകുടിശ്ശികയും ആനുകൂല്യങ്ങളും വിതരണം ചെയ്യണമെന്നും ആവിശ്യപ്പെട്ടുകൊണ്ട് ഐഎൻടിയുസിയുടെ നേതൃത്വത്തിൽ തൊഴിലാളികൾ സമരത്തിലേക്ക് നീങ്ങുന്നു.

ഇടുക്കി:പീരുമേട് താലൂക്കിലെ തേയില തോട്ടങ്ങളിലെ ലയങ്ങളുടെ ശോച്യാവസ്ഥ പരിഹരിക്കാത്തതിലും പോബ്‌സ് എസ്റ്റേറ്റ് വക തോട്ടങ്ങളിലെ തൊഴിലാളികൾക്ക് ശമ്പളവും ആനുകൂല്യങ്ങളും നൽകുന്നതിലെ കാലതാമസത്തിനെതിരെയും കേരള പ്ലാന്‍റേഷൻ വർക്കേഴ്‌സ് യൂണിയൻ ഐഎൻടിയുസി പ്രക്ഷോഭത്തിലേക്ക്. ജൂൺ ആറിന് കെപിഡബ്ല്യു യൂണിയൻ ഐഎൻടിയുസിയുടെ നേതൃത്വത്തിൽ സംഘടിപ്പിക്കുന്ന പ്രതിഷേധ മാർച്ചും ധർണയും അഡ്വക്കേറ്റ് ഇഎം ആഗസ്‌തി മുന്‍ എംഎല്‍എ ഉദ്ഘാടനം ചെയ്യും.

പീരുമേട് താലൂക്കിലെ തേയില തോട്ടങ്ങളിൽ പണിയെടുക്കുന്ന തൊഴിലാളികൾ അധിവസിക്കുന്ന എസ്റ്റേറ്റ് ലയങ്ങൾ മഴക്കാലത്ത് ചോർന്നൊലിക്കുന്ന രീതിയിലും ഏതു നിമിഷവും തകർന്ന് വീഴാവുന്ന അവസ്ഥയിലുമാണ് ഉള്ളത്. എസ്റ്റേറ്റ് ലയങ്ങളുടെ നവീകരണ പ്രവർത്തനങ്ങൾക്കായി ഇടതുപക്ഷ സർക്കാർ കഴിഞ്ഞ മൂന്ന് ബജറ്റുകളിലായി പത്ത് കോടി രൂപ വീതം അനുവദിച്ചിരുന്നുവെങ്കിലും ലയങ്ങളുടെ നവീകരണ പ്രവർത്തനങ്ങൾ കടലാസിൽ മാത്രം ഒതുങ്ങുകയാണുണ്ടായത് എന്നാണ് ആക്ഷേപം.

മഴക്കാലമാരംഭിക്കുന്നതോടെ ചോർന്നൊലിക്കുന്ന എസ്റ്റേറ്റ് ലയങ്ങളിലെ തൊഴിലാളികളുടെ ജീവിതം ദുരിതപൂർണ്ണമാകുന്ന സാഹചര്യത്തിലാണ് കേരള പ്ലാന്‍റേഷൻ വർക്കേഴ്‌സ് യൂണിയൻ ഐഎൻടിയുസിയുടെ നേതൃത്വത്തിൽ പ്രക്ഷോഭത്തിനൊരുങ്ങുന്നത്. പ്രക്ഷോഭ പരിപാടികളുടെ തുടക്കമായി ജൂൺ ആറിന് പീരുമേട് ഡെപ്യൂട്ടി ലേബർ ഓഫിസിലേക്ക് പ്രതിഷേധ മാർച്ചും ധർണയും സംഘടിപ്പിക്കുമെന്ന് ഭാരവാഹികൾ അറിയിച്ചു.

പീരുമേട് താലൂക്കിലെ പോബ്‌സ് എസ്റ്റേറ്റ് വക തേയില തോട്ടങ്ങളിൽ ജോലി ചെയ്യുന്ന തൊഴിലാളികൾക്ക് ശമ്പളവും മറ്റ് ആനുകൂല്യങ്ങളും ലഭിച്ചിട്ട് മൂന്ന് മാസം പിന്നിടുകയാണ്. തൊഴിലാളികളുടെ ശമ്പള വിതരണം ഉടൻ നടത്തണമെന്നാവശ്യപ്പെട്ടുകൊണ്ട് കൂടിയാണ് കെപിഡബ്ല്യു യൂണിയൻ സമരരംഗത്തേക്കിറങ്ങുന്നതെന്ന് യൂണിയൻ നേതാക്കളും തൊഴിലാളികളും പറഞ്ഞു.