തിരുവനന്തപുരം : മലബാർ മേഖലയിൽ പത്താം ക്ലാസ് പാസായ അര ലക്ഷത്തോളം കുട്ടികൾക്ക് പ്ലസ് ടു പ0നത്തിന് അവസരം നിഷേധിക്കുന്ന സമീപനമാണ് സർക്കാരിൻ്റേതെന്ന് എംഎല്‍എ എൻ ഷംസുദ്ദീന്‍. മലബാർ മേഖലയിലെ പ്ലസ് വൺ സീറ്റ് ക്ഷാമം സംബന്ധിച്ച് അടിയന്തര പ്രമേയത്തിന് അനുമതി തേടുകയായിരുന്നു അദ്ദേഹം.
കഴിഞ്ഞ വർഷം 20 കോടി ചെലവായി എന്ന ന്യായം പറഞ്ഞ് അധിക ബാച്ച് അനുവദിക്കുന്നതിൽ നിന്ന് സർക്കാർ പിൻമാറുകയാണ്. അപ്പുറത്ത് നവകേരള സദസ്, നാലരക്കോടിയുടെ ബസ് തുടങ്ങിയ ധൂർത്തുമായി മുന്നോട്ടുപോകുന്നതിന് സർക്കാരിന് ഒരു മടിയുമില്ല. കേരളീയത്തിന് 27 കോടി മുടക്കിയ സർക്കാരാണ് പത്താം ക്ലാസ് പാസായി ഉപരിപഠനത്തിന് അർഹരായ കുട്ടികൾക്ക് 20 കോടി മുടക്കാൻ മടിച്ചു നിൽക്കുന്നത്. പ്ലസ് വൺ സീറ്റ് സംബന്ധിച്ച് പഠിക്കാൻ സർക്കാർ നിയോഗിച്ച കാർത്തികേയൻ കമ്മിറ്റി റിപ്പോർട്ട് പ്രകാരം, 6 മലബാർ ജില്ലകളിൽ പ്ലസ് വൺ സീറ്റിൽ ഗണ്യമായ കുറവുണ്ട്. ഈ കുറവ് പരിഹരിക്കാൻ മേഖലയിൽ 150 അധിക ബാച്ചുകൾ അനുവദിക്കണം എന്ന് അദ്ദേഹം പറഞ്ഞു.