കോഴിക്കോട്:താമരശ്ശേരി പുതുപ്പാടിയില്‍ താമസിക്കുന്ന ഉത്തര്‍പ്രദേശ് സ്വദേശിയുടെ ഭാര്യയെ കാണാനില്ലെന്ന് പരാതി. പുതുപ്പാടി ഒടുങ്ങാക്കാട് മദ്രസയ്ക്ക് സമീപം വാടകക്ക് താമസിക്കുന്ന ഉത്തര്‍പ്രദേശ് സ്വദേശി നാഫിസിൻ്റെ ഭാര്യ അഫ്‌സയെ (22) ആണ് ഇന്നലെ അര്‍ദ്ധരാത്രി മുതല്‍ കാണാതായത്. ഒരു വയസ്സായ കുഞ്ഞിനും ഭർത്താവിനുമൊപ്പമാണ് യുവതി താമസിച്ചിരുന്നത്. യുവതി മൊബൈല്‍ ഫോണ്‍ ഉപയോഗിക്കാറില്ലെന്നും രണ്ടായിരം രൂപയുമായാണ് സ്ഥലം വിട്ടതെന്നും ഭര്‍ത്താവ് നാഫിസ് താമരശ്ശേരി പൊലീസില്‍ നല്‍കിയ പരാതിയില്‍ പറയുന്നു.
ഒരു മാസം മുമ്പാണ് ഇവര്‍ ജോലിക്കായി പുതുപ്പാടിയില്‍ എത്തിയത്. യുവതി വയനാട്ടില്‍ എത്തിയെന്ന സൂചനയെത്തുടര്‍ന്ന് പൊലീസും നാട്ടുകാരും അന്വേഷണം നടത്തിയെങ്കിലും കണ്ടെത്താനായില്ല. അതേസമയം യുവതി കോഴിക്കോട് നിന്നും ട്രെയിൻ കയറി ബംഗളൂരുവിൽ ഇറങ്ങിയതായി വിവരം ലഭിച്ചു.