തിരുവനന്തപുരം:യുജിസി കരട് ഭേദഗതി ചട്ടം രാഷ്ട്രീയ നിയമനത്തിന് കൂടുതൽ സൗകര്യമൊരുക്കുമെന്ന് മുഖ്യമന്ത്രി പിണറായി വിജയൻ. കേന്ദ്ര സർക്കാരിന്‍റേത് ഫെഡറൽ മൂല്യങ്ങളെ ആട്ടിമറിക്കുന്ന നീക്കമാണ് എന്നും മുഖ്യമന്ത്രി പറഞ്ഞു. യുജിസി കരട് ഭേദഗതി ചട്ടത്തിനെതിരെ പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങളുടെ പ്രതിഷേധ കൂട്ടായ്‌മ ഉദ്‌ഘാടനം ചെയ്‌ത് സംസാരിക്കുകയായിരുന്നു മുഖ്യമന്ത്രി. ദേശീയ വിദ്യാഭ്യാസ കണ്‍വെന്‍ഷന്‍ എന്ന പേരിൽ നിയമസഭയിലെ ശങ്കരനാരായണന്‍ തമ്പി ഹാളിലായിരുന്നു കൂട്ടായ്‌മ സംഘടിപ്പിച്ചത്.
"സംസ്ഥാന നിയമസഭാ തീരുമാനങ്ങളുടെ അടിസ്ഥാനത്തിലാണ് സംസ്ഥാന സർവകലാശാലകൾ പ്രവർത്തിക്കുന്നത്. പുതിയ മാനദണ്ഡങ്ങളുടെ പരിഷ്‌കരണം സംസ്ഥാനങ്ങളുടെ നിർദേശങ്ങൾ പരിഗണിക്കാതെയാണ്. ഭരണഘടനാപരമായി സംസ്ഥാന ഫെഡറൽ സംവിധാനത്തിനെതിരെയുള്ള കടന്നുകയറ്റമാണിത്. കരട് യു ജി സി ചട്ട ഭേദഗതി വൈസ് ചാൻസലർമാരുടെ സ്ഥാനത്തേക്ക് ഗവർണർമാരുടെ രാഷ്ട്രീയ നിയമനത്തിന് വഴിവെയ്ക്കും," മുഖ്യമന്ത്രി പറഞ്ഞു.
കേരളത്തിൽ തന്നെ അതിന്‍റെ അനുഭവമുണ്ട്. സംസ്ഥാനത്തിന്‍റെ അനുമതി കാത്തു നിൽക്കാതെ പ്രസിഡന്‍റിന്‍റെ അനുമതിക്കായി വൈസ് ചാന്‍സലർമാരുടെ പട്ടിക അയക്കുന്ന സാഹചര്യമുണ്ടായി. ഡ്രാഫ്റ്റ് റെഗുലേഷൻസിൽ കമ്മ്യൂണിറ്റി സർവീസും നിർബന്ധമാക്കിയിട്ടുണ്ട്. സംസ്ഥാനങ്ങളുടെ സാമ്പത്തിക വിഭവങ്ങളും കേന്ദ്രം വിഴുങ്ങുകയാണെന്നും പിണറായി വിജയന്‍ ചൂണ്ടിക്കാട്ടി.
'രാജ്യത്തിന്‍റെ 65% സമ്പത്ത് സമാഹാരണത്തിലും സംസ്ഥാനങ്ങൾ പങ്കു വഹിക്കണമെന്നാണ് റിസർവ് ബാങ്ക് നിർദേശം. ഗവർണർമാർ തീ കൊണ്ട് കളിക്കുന്നുവെന്ന് സുപ്രീംകോടതി തന്നെ മുന്നറിയിപ്പ് നൽകിയിട്ടുള്ളതാണ്. പാവകളെ പോലെയാണ് ഗവർണറുടെ പെരുമാറ്റം. ചാൻസലർ പദവി ദുരുപയോഗം ചെയ്‌ത് ഗവർണർമാർ സർവകലാശാലകളിൽ രാഷ്ട്രീയ ഇടപെടൽ നടത്തുന്നു. സംസ്ഥാനത്തിന്‍റെ വിഭവങ്ങൾ ഉപയോഗിക്കുന്നതിനോടൊപ്ലം സംസ്ഥാന സർക്കാരുകളെ ഉന്നത വിദ്യാഭ്യാസ മേഖലയിൽ നിന്നും മാറ്റി നിർത്താനുള്ള നീക്കമാണ് കേന്ദ്രം നടത്തുന്നതെന്ന് വ്യക്തമാണെന്നും,' മുഖ്യമന്ത്രി അഭിപ്രായപ്പെട്ടു.
കേരളത്തിന്‌ പുറമേ തെലങ്കാന, തമിഴ്‌നാട്, കർണാടക, പഞ്ചാബ്, ജാർഖണ്ഡ് എന്നീ സംസ്ഥാനങ്ങളും പങ്കെടുത്തു. സംസ്ഥാനങ്ങളെ പ്രതിനിധീകരിച്ചെത്തിയ മന്ത്രിമാരും ഉദ്യോഗസ്ഥരും സംസ്ഥാനങ്ങളുടെയും സര്‍വകലാശാലകളുടെയും സ്വയംഭരണാവകാശത്തിന്മേലുള്ള കടന്നുകയറ്റത്തിനെതിരെ വിമര്‍ശനം അക്കമിട്ടു നിരത്തി.