തിരുവനന്തപുരം:സൂപ്പര്‍ ലീഗ് കേരള ഫുട്ബോള്‍ പോരാട്ടത്തില്‍ തലസ്ഥാനത്തിന്‍റെ സ്വന്തം ടീമായ തിരുവനന്തപുരം കൊമ്പന്‍സിന് തകര്‍പ്പന്‍ വിജയം. തൃശൂർ മാജിക് എഫ്‌സിയെ എതിരില്ലാത്ത രണ്ടു ഗോളുകൾക്കാണു കൊമ്പന്‍സ് മുട്ടുകുത്തിച്ചത്. 15–ാം മിനിറ്റില്‍ വിഷ്‌ണു ടി.എം, 69 –ാം മിനിറ്റില്‍ പാപുവയ് എന്നിവരാണ് തിരുവനന്തപുരത്തിനായി വല കുലുക്കിയത്.
വിഷ്‌ണുവിന്‍റെ കിടിലന്‍ ഹെഡർ തൃശൂർ ഗോൾ കീപ്പർ സഞ്ജീവൻ ഘോഷിനെ മറികടന്നു വലയിലെത്തുകയായിരുന്നു.ആദ്യ പകുതിയിൽ മുന്നിലെത്തിയ തിരുവനന്തപുരം കൊമ്പന്‍സ് രണ്ടാം പകുതിയിൽ ലീഡ് രണ്ടാക്കി ഉയർത്തി. സീസണില്‍ കൊമ്പന്‍സിന്‍റെ ആദ്യ ജയമാണിത്.