ന്യൂഡൽഹി: ഇന്ത്യന്‍ ക്രിക്കറ്റ് ടീം നിലവില്‍ കഷ്‌ടകാലത്തിലൂടെയാണ് കടന്നുപോകുന്നത്. തുടർച്ചയായ പല പരമ്പരകളിലും ടീം പരാജയപ്പെടുകയാണ്. ശക്തമായ ബാറ്റിങ്ങിന് പേരുകേട്ട ടീം ഇന്ത്യയുടെ ബാറ്റിങ് യൂണിറ്റ് കഴിഞ്ഞ കുറച്ച് പരമ്പരകളിൽ നിരാശപ്പെടുത്തി.
ETV Bharat Kerala WhatsApp ചാനലിൽ ചേരാൻ ഈ ലിങ്കിൽ ക്ലിക്ക് ചെയ്യുക.
ദേശീയ ഡ്യൂട്ടിയിലല്ലാത്തപ്പോൾ കേന്ദ്ര കരാറുള്ള കളിക്കാർ ആഭ്യന്തര ക്രിക്കറ്റിൽ പങ്കെടുക്കണമെന്ന് ബിസിസിഐ നിര്‍ദേശിച്ചിരുന്നു. ഇപ്പോള്‍ ഇന്ത്യൻ ടീമിലെ പല മുൻനിര ക്രിക്കറ്റ് താരങ്ങളും ആഭ്യന്തര ക്രിക്കറ്റിലേക്ക് തിരിച്ചുവരാൻ പോകുന്നതായാണ് റിപ്പോര്‍ട്ടുകള്‍. 2024-25 ലെ രഞ്ജി ട്രോഫിയുടെ അടുത്ത റൗണ്ടിലെ മത്സരങ്ങൾ ജനുവരി 23 മുതൽ ആരംഭിക്കും. സൂപ്പര്‍ താരങ്ങളായ ഋഷഭ് പന്ത്, ശുഭ്മാൻ ഗിൽ, യശസ്വി ജയ്‌സ്വാൾ എന്നിവര്‍ വീണ്ടും രഞ്ജി കുപ്പായമണിയുമെന്നാണ് സൂചന.
1. ഋഷഭ് പന്ത്
ഇന്ത്യന്‍ ടീമിലെ ഇടംകൈയ്യൻ വിക്കറ്റ് കീപ്പർ-ബാറ്ററായ പന്ത് ടെസ്റ്റ് ക്രിക്കറ്റിൽ കഴിവ് തെളിയിക്കുകയും ധാരാളം റൺസ് നേടുകയും ചെയ്‌തിട്ടുണ്ട്. എന്നാല്‍ ഓസ്‌ട്രേലിയയ്‌ക്കെതിരായ പരമ്പരയിൽ താരം തനിക്ക് പരിചിതമായ ശൈലിയിൽ പ്രത്യക്ഷപ്പെട്ടില്ലായിരുന്നു. 2017ന് ശേഷം വീണ്ടും രഞ്ജി ട്രോഫിയിൽ കളിക്കാൻ ഒരുങ്ങുകയാണ് പന്ത്. ജനുവരി 23ന് രാജ്‌കോട്ടിൽ ആരംഭിക്കുന്ന സൗരാഷ്ട്രയ്‌ക്കെതിരെ മത്സരത്തില്‍ സ്വന്തം ടീമായ ഡൽഹിക്കായി താരം കളിക്കുമെന്ന് ഡിഡിസിഎ സെക്രട്ടറി അശോക് ശർമ്മ സ്ഥിരീകരിച്ചു.
2. ശുഭ്മാൻ ഗിൽ
ജനുവരി 23 മുതൽ ബെംഗളൂരുവിലെ എം ചിന്നസ്വാമി സ്റ്റേഡിയത്തിൽ കർണാടകയ്‌ക്കെതിരായ ആറാം റൗണ്ട് രഞ്ജി ട്രോഫി മത്സരത്തിൽ ഇന്ത്യയുടെ യുവ ഓപ്പണർ ശുഭ്മാൻ ഗിൽ പഞ്ചാബിനായി കളിക്കും. 2022 രഞ്ജി ട്രോഫിയിലാണ് പഞ്ചാബിനായി ഗിൽ അവസാനമായി കളിച്ചത്. മധ്യപ്രദേശിനെതിരെ ആളൂരിൽ നടന്ന ക്വാർട്ടർ ഫൈനൽ മത്സരത്തിലാണ് താരം കളിച്ചത്. ഓസ്‌ട്രേലിയയിൽ നിരാശാജനകമായ പ്രകടനം നടത്തിയ കളിക്കാരിൽ ഗില്ലും ഉൾപ്പെടുന്നു. 5 ഇന്നിംഗ്‌സുകളിൽ നിന്ന് 31 റൺസ് മാത്രമാണ് ശുഭ്മാൻ ഗിൽ നേടിയത്.
3. യശസ്വി ജയ്‌സ്വാൾ
ഓസ്‌ട്രേലിയൻ പര്യടനത്തിന് ശേഷം ഇന്ത്യയുടെ സ്റ്റാർ ഓപ്പണർ യശസ്വി ജയ്‌സ്വാൾ വീണ്ടും രഞ്ജി ട്രോഫിയിൽ കളിക്കും. ജനുവരി 23 ന് ജമ്മു കശ്മീരിനെ നേരിടുന്ന രഞ്ജി ട്രോഫി മത്സരത്തിനായി താരം ഇറങ്ങും. മുംബൈ കോച്ച് ഓംകാർ സാൽവിയെ തന്‍റെ ലഭ്യത ജയ്‌സ്വാൾ ഔദ്യോഗികമായി അറിയിച്ചതായാണ് റിപ്പോർട്ട്.
