കായികരംഗത്തെ ലിംഗ വിവേചനത്തെയും, സ്ത്രീ വിരുദ്ധതയെയും കുറിച്ച് തുറന്നടിച്ച് ദിവ്യ ദേശ്‌മുഖ്

സ്ത്രീകൾ വിലമതിക്കപ്പെടുന്നില്ല. തങ്ങളുടെ അപ്രസക്തമായ എല്ലാ കാര്യങ്ങളിലും ശ്രദ്ധ കേന്ദ്രീകരിക്കുന്ന ഇത്തരം സമീപനങ്ങളെ താന്‍ വെറുക്കുന്നു. സ്ത്രീകൾക്ക് തുല്യ ബഹുമാനം ലഭിക്കണമെന്ന് ഞാൻ ആഗ്രഹിക്കുന്നുവെന്നും താരം കുറിച്ചു.

ഡല്‍ഹി: കായിക രംഗത്ത് താന്‍ നേരിട്ടിട്ടുള്ള ലിംഗ വിവേചനത്തെയും, സ്ത്രീ വിരുദ്ധതയെയും കുറിച്ച് തുറന്ന് പറഞ്ഞ് ഇന്ത്യൻ ചെസ്സ് താരം ദിവ്യ ദേശ്‌മുഖ് (Indian chess player Deshmukh). നെതർലൻഡ്‌സില്‍ വച്ച് അടുത്തിടെ നടന്ന വിജ്‌ക് ആൻ സീ, ടാറ്റ സ്റ്റീൽ ചെസ് ടൂർണമെന്‍റ് അവസാനിച്ചതിന് ശേഷമാണ് നാഗ്‌പൂരിൽ നിന്നുള്ള 18 കാരിയായ ദിവ്യ ദേശ്‌മുഖിന്‍റെ വെളിപ്പെടുത്തല്‍.

"കുറച്ചുകാലമായി ഞാൻ ഇത് പറയാൻ ആഗ്രഹിക്കുന്നു, പക്ഷേ എന്‍റെ ടൂർണമെന്‍റ് അവസാനിക്കാൻ കാത്തിരിക്കുകയായിരുന്നു. ചെസ്സിലെ സ്ത്രീകളെ കാണികൾ പലപ്പോഴും നിസ്സാരമായി കാണുന്നത് എന്തുകൊണ്ടാണെന്ന് മനസിലാകുന്നില്ല.പുരുഷ കളിക്കാരാണ് മത്സരിക്കുന്നതെങ്കില്‍ അവരുടെ കളിയിൽ മാത്രമാണ് കാണികള്‍ ശ്രദ്ധ കേന്ദ്രീകരിക്കുന്നത്. പകരം സ്ത്രീകളാണ് മത്സരിക്കുന്നതെങ്കില്‍ ചെസ് ബോർഡിലെ അവരുടെ കഴിവുമായി യാതൊരു ബന്ധവുമില്ലാത്ത വശങ്ങളിലാണ് കാണികളടക്കം ശ്രദ്ധ കേന്ദ്രീകരിക്കുന്നത്.

തന്‍റെ മുടി, വസ്ത്രം, ഉച്ചാരണം തുടങ്ങിയ അപ്രസക്തമായ കാര്യങ്ങളിലാണ് പലരും ശ്രദ്ധ കേന്ദ്രീകരിക്കുന്നത് എന്ന് ഞാന്‍ മനസിലാക്കിയിരിക്കുന്നു". എന്നായിരുന്നു താരത്തിന്‍റെ കുറിപ്പ്. തന്‍റെ സമൂഹമാധ്യമത്തിലൂടെയാണ് ദിവ്യ ദേശ്‌മുഖിന്‍റെ വെളിപ്പെടുത്തല്‍.

എന്തെങ്കിലും അഭിമുഖത്തിന് പോയാലും തന്‍റെ മത്സരങ്ങളെ കുറിച്ചോ ചെസ്സിലെ തന്‍റെ അഭിരുചിയെ കുറിച്ചോ ചോദ്യങ്ങള്‍ ചോദിക്കുന്നതിന് പകരം തീര്‍ത്തും വ്യക്തിപരമായ കാര്യങ്ങളാണ് ആളുകള്‍ക്ക് അറിയാന്‍ താത്പര്യപ്പെടുന്നതെന്നും ദിവ്യ ദേശ്‌മുഖ് വിമര്‍ശിച്ചു.