ബീഹാര്‍ തകര്‍ന്നടിഞ്ഞു..! കൂറ്റൻ വിജയത്തോടെ കേരളം രഞ്ജി ട്രോഫി ക്വാർട്ടറിൽ

ബീഹാറിനെ ഇന്നിങ്സിനും 169 റൺസിനും തോല്‍പ്പിച്ചാണ് കേരളം തകര്‍പ്പന്‍ ജയം സ്വന്തമാക്കിയത്.

തിരുവനന്തപുരം:രഞ്ജി ട്രോഫി ക്രിക്കറ്റില്‍ ക്വാർട്ടർ ഫൈനലിലേക്ക് പ്രവേശിച്ച് കേരളം. ആറു വർഷത്തെ ഇടവേളയ്ക്കു ശേഷമാണ് കേരളത്തിന്‍റെ ക്വാര്‍ട്ടറിലേക്കുള്ള മുന്നേറ്റം. അവസാന മത്സരത്തിൽ ബീഹാറിനെ ഇന്നിങ്സിനും 169 റൺസിനും തോല്‍പ്പിച്ചാണ് കേരളം തകര്‍പ്പന്‍ ജയം സ്വന്തമാക്കിയത്. സ്കോർ: കേരളം – 351, ബിഹാർ – 64 & 118.

ആദ്യ ഇന്നിങ്സിൽ 64 റൺസിനു തകര്‍ന്നടിഞ്ഞ് ഫോളോ ഓൺ ചെയ്‌ത ബീഹാർ, രണ്ടാം ഇന്നിങ്സിലും 117 റൺസിന് പുറത്തായതോടെയാണ് കേരളം ജയം നേടിയത്. വിജയത്തോടെ കേരളം ഗ്രൂപ്പിൽ ഒന്നാം സ്ഥാനത്തെത്തി. എലൈറ്റ് ഗ്രൂപ്പ് സിയിൽ ഹരിയാന, കർണാടക, ബംഗാൾ, ഉത്തർപ്രദേശ്, മധ്യപ്രദേശ് തുടങ്ങിയവരെ വീഴ്‌ത്തി കേരളം ആധിപത്യം നേടുകയായിരുന്നു. ഹരിയാന – കർണാടക മത്സരം കൂടി കഴിഞ്ഞാല്‍ കേരളത്തിനൊപ്പം ഗ്രൂപ്പിൽനിന്ന് ആരാണ് ക്വാർട്ടറിലേക്കെത്തുന്ന കാര്യത്തിൽ തീരുമാനമാകു.

21 റൺസെടുത്ത ശ്രമൺ നിഗ്രോധാണ് ബിഹാറിനായി ഭേദപ്പെട്ട പ്രകടനം പുറത്തെടുത്തത്. ആയുഷ് ലോഹാരുക (13), ഗുലാം റബ്ബാനി (10) എന്നിവരാണ് ബിഹാറിനായി ആദ്യ ഇന്നിങ്സിൽ രണ്ടക്കം കടന്നവര്‍. ഒന്നാം ഇന്നിങ്‌സില്‍ 19 റൺസ് വഴങ്ങി കേരളത്തിനായി ഓൾറൗണ്ടർ ജലജ് സക്സേന അഞ്ചു വിക്കറ്റുകൾ വീഴ്ത്തി. നിധീഷ് രണ്ടും വൈശാഖ് ചന്ദ്രൻ, ആദിത്യ സർവതെ എന്നിവർ ഓരോ വിക്കറ്റുകളും വീഴ്ത്തി.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

രണ്ടാം ദിനം 351 റൺസെടുത്താണു കേരളം പുറത്തായത്. സൽമാൻ നിസാർ 150 റൺസെടുത്തു തകര്‍പ്പന്‍ പ്രകടനം കാഴ്‌ചവച്ചു. ആദ്യ കളി അവസാനിപ്പിക്കുമ്പോള്‍ 9 വിക്കറ്റ് നഷ്ടപ്പെടുത്തി 302 റൺസെന്ന നിലയിലായിരുന്നു കേരളം. കേരളത്തിനായി അക്ഷയ് ചന്ദ്രൻ (38), എം ഡി നിധീഷ് (30), രോഹൻ കുന്നുമ്മല്‍ (3) ആനന്ദ് കൃഷ്ണനും (11) സച്ചിൻ ബേബിയും (4), ഷോൺ റോഗർ (59) റൺസെടുത്തും ഭേദപ്പെട്ട പ്രകടനം നടത്തി.