കരാക്കസ്:മൂന്ന് കുട്ടികളുടെ മരണത്തിനിടയാക്കിയ വൈറല്‍ വീഡിയോ ചലഞ്ചുകള്‍ തടയുന്നതിനുള്ള നടപടികള്‍ സ്വീകരിക്കാത്തതില്‍ സോഷ്യല്‍ മീഡിയ പ്ലാറ്റ്‌ഫോമായ ടിക് ടോക്കിന് പിഴയിട്ട് വെനസ്വേല സുപ്രീം കോടതി. 10 മില്യണ്‍ ഡോളര്‍ എട്ട് ദിവസത്തിനുള്ളില്‍ പിഴ അടയ്‌ക്കണമെന്നാണ് കോടതിയുടെ നിര്‍ദേശം. ഇത്ര ഗുരുതരമായ പ്രശ്‌നങ്ങളുണ്ടായിട്ടും സംഭവത്തില്‍ ടിക് ടോക്ക് അലക്ഷ്യമായാണ് പെരുമാറിയതെന്നും കോടതി ചൂണ്ടിക്കാട്ടി.
ഉറക്ക ഗുളിക കഴിച്ച് ഉറങ്ങാതിരിക്കാനുള്ള ടിക് ടോക്ക് ചലഞ്ചില്‍ പങ്കെടുത്താണ് കഴിഞ്ഞ നവംബറില്‍ വെനസ്വേലയില്‍ ഒരു 12 വയസുകാരി മരിച്ചിത്. വിവിധ പദാര്‍ഥങ്ങളുടെ മണം പിടിക്കുന്ന ചലഞ്ചില്‍ പങ്കെടുത്തായിരുന്നു 14 കാരന് ജീവൻ നഷ്‌ടമായതെന്ന് വെനസ്വേലയിലെ വിദ്യാഭ്യാസ മന്ത്രി ഹെക്ടർ റോഡ്രിഗസ് വ്യക്തമാക്കിയിരുന്നു. സമാനത തരത്തിലുള്ള ചലഞ്ചില്‍ പങ്കെടുത്ത മറ്റൊരു കുട്ടി നവംബര്‍ 23ന് മരിച്ചിരുന്നുവെന്ന് വെനസ്വേലയുടെ അറ്റോർണി ജനറലും ആരോപിച്ചിരുന്നു.
ഈ സംഭവങ്ങളുടെ പശ്ചാത്തലത്തില്‍ ടിക് ടോക്കിന് പിഴയിട്ട സുപ്രീം കോടതി ടിക് ടോക്കിനോട് വെനസ്വേലയില്‍ ഓഫിസ് തുടങ്ങാനും ഉത്തരവിട്ടു. സോഷ്യല്‍ മീഡിയ പ്ലാറ്റ്‌ഫോമിന്‍റെ ഉള്ളടക്കങ്ങള്‍ക്ക് മേല്‍നോട്ടം വഹിക്കാനായാണ് പുതിയ ഓഫിസ് തുറക്കാൻ കോടതി ആവശ്യപ്പെട്ടത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
ടെലികമ്മ്യൂണിക്കേഷൻ കമ്മിഷൻ നിശ്ചയിച്ചിട്ടുള്ള നിയന്ത്രണങ്ങൾ പാലിക്കാത്തതിന് വെനസ്വേല മുൻ വർഷങ്ങളിൽ ഡസൻ കണക്കിന് വെബ്‌സൈറ്റുകളാണ് ബ്ലോക്ക് ചെയ്‌തിട്ടുള്ളത്. വാർത്താ കവറേജിൻ്റെ പേരിൽ നിരവധി റേഡിയോ സ്റ്റേഷനുകളും ടെലിവിഷൻ ചാനലുകളുമാണ് നിക്കോളാസ് മഡുറോയുടെ ഭരണത്തിന് കീഴില്‍ വെനസ്വേലയില്‍ സംപ്രേഷണം അവസാനിപ്പിച്ചത്. മനുഷ്യാവകാശ ഗ്രൂപ്പുകളുടെയും വാർത്താ കമ്പനികളുടെയും 60-ലധികം വെബ്‌സൈറ്റുകളും ഒരു വര്‍ഷത്തിനിടെ വിവിധ സമയങ്ങളിലായി ബ്ലോക്ക് ചെയ്‌തിട്ടുണ്ടെന്ന് വിഇ സിൻ ഫിൽട്രോ പറയുന്നു.
പ്രസിഡന്‍റായി മഡുറോ വീണ്ടും തെരഞ്ഞെടുക്കപ്പെട്ടതില്‍ പ്രതിഷേധിച്ച് ആയിരക്കണക്കിന് വെനസ്വേലക്കാര്‍ പ്രതിഷേധവുമായി തെരുവിലിറങ്ങിയതോടെ കഴിഞ്ഞ ഓഗസ്റ്റില്‍ സോഷ്യല്‍ മീഡിയ പ്ലാറ്റ്‌ഫോമായ എക്‌സിനും വെനസ്വേല നിരോധനം ഏര്‍പ്പെടുത്തിയിരുന്നു. രാജ്യത്തിനെതിരെ ആക്രമണങ്ങള്‍ സംഘടിപ്പിക്കാൻ എ്ക്സ് ഉപയോഗിക്കുന്നുവെന്ന് ചൂണ്ടിക്കാട്ടിയായിരുന്നു 10 ദിവസത്തേക്ക് നിരോധനം ഏര്‍പ്പെടുത്തിയത്. സർക്കാർ ഉടമസ്ഥതയിലുള്ള ഇൻറർനെറ്റ് ദാതാക്കളായ Movilnet ഇപ്പോഴും എക്‌സിന് നിരോധനം ഏര്‍പ്പെടുത്തിയിട്ടുണ്ട്.
Also Read :'ടിക് ടോക് നിരോധനം ഉടൻ വേണ്ട'; സുപ്രീം കോടതിയോട് ട്രംപ്
