ശരീരത്തിന്‍റെ ആരോഗ്യം നിലനിർത്തുന്നതിൽ പഴങ്ങളുടെ പങ്ക് വളരെ പ്രധാനമാണ്. ലോകാരോഗ്യ സംഘടനയുടെ അഭിപ്രായത്തിൽ, നിങ്ങൾ ദിവസവും കുറഞ്ഞത് 400 ഗ്രാം പഴങ്ങൾ കഴിക്കണം. പഴങ്ങളിലെ പോഷകങ്ങളിൽ പലതും രോഗങ്ങളിൽ നിന്ന് സംരക്ഷിക്കുന്നു. എന്നിരുന്നാലും, ഏതൊക്കെ പഴങ്ങൾ കഴിക്കണം എന്നതിനെക്കുറിച്ച് എല്ലാവർക്കും ചില ധാരണകളുണ്ട്. എന്നാല്‍, ഡ്രാഗൺ ഫ്രൂട്ടിനെക്കുറിച്ച് പലർക്കും അറിയില്ല.
കുറച്ചു കാലമായി ഡ്രാഗൺ ഫ്രൂട്ടിനെക്കുറിച്ച് ധാരാളം ചർച്ചകൾ നടക്കുന്നുണ്ട്. പണ്ട് ഇറക്കുമതി ചെയ്‌തിരുന്ന ഈ വിദേശ പഴം, ഇപ്പോൾ നമ്മുടെ നാട്ടിൽ വ്യാപകമായി കൃഷി ചെയ്യുന്നുണ്ട്. അതിനാല്‍ തന്നെ എല്ലാ പ്രദേശങ്ങളിലെയും ആളുകൾക്ക് ഇത് ലഭ്യമാണ്. ഡ്രാഗൺ ഫ്രൂട്ടിന് അതിശയകരമായ നിരവധി പോഷകങ്ങൾ ഉണ്ടെന്ന് വിദഗ്‌ധർ പറയുന്നു.
മനുഷ്യന്‍റെ ദഹനവ്യവസ്ഥയുടെ ശരിയായ പ്രവർത്തനത്തിന് നാരുകൾ അത്യന്താപേക്ഷിതമാണ്. ഈ നാരുകൾ ഡ്രാഗൺ ഫ്രൂട്ടിൽ ധാരാളമുണ്ട്. കൂടാതെ ഇരുമ്പ്, സിങ്ക്, പ്രോട്ടീൻ, ഫോസ്‌ഫറസ്, മഗ്നീഷ്യം തുടങ്ങിയ പോഷകങ്ങളും ഈ പഴത്തിൽ ധാരാളമായി അടങ്ങിയിട്ടുണ്ട്. ഡ്രാഗൺ ഫ്രൂട്ട് ഹൃദയാരോഗ്യത്തിന് നല്ലതാണെന്ന് പഠനം പറയുന്നു. 'ഫുഡ് ആൻഡ് ഫങ്ഷണൽ ഫുഡ്‌സ്' എന്ന ജേണലിലാണ് പ്രസ്‌തുത പഠനം പ്രസിദ്ധീകരിച്ചത്.