ബോക്സോഫിസില്‍ വന്‍ നേട്ടം കൊയ്‌ത ചിത്രമാണ് നെല്‍സണ്‍ സംവിധാനം ചെയ്‌ത ജയിലര്‍. ഈ ചിത്രത്തിലെ 'മനസിലായോ' എന്ന ഡയലോഗ് തമിഴ്‌നാട്ടിലും കേരളത്തിലും ഒരു പോലെ ഹിറ്റായിരുന്നു. ഇപ്പോഴിതാ സൂപ്പര്‍സ്‌റ്റാര്‍ രജനികാന്തിന്‍റെ പുതിയ ചിത്രമായ 'വേട്ടയനില്‍' 'മനസിലായോ' എന്നു തുടങ്ങുന്ന ആദ്യം ഗാനം പുറത്തിറങ്ങിയിരിക്കുകയാണ്.
മലയാളവും തമിഴും കലര്‍ന്ന വരികളാണ് ഗാനത്തിലുള്ളത്. ഗാനത്തിന്‍റെ ലിറിക്കല്‍ വീഡിയോയാണ് അണിയറ പ്രവര്‍ത്തകര്‍ പുറത്തുവിട്ടത്. ഗാനത്തിന് സംഗീതം പകര്‍ന്നിരിക്കുന്നത് അനിരുദ്ധാണ്.
ദീര്‍ഘനാളുകള്‍ക്ക് ശേഷമാണ് രജനികാന്ത് ചിത്രത്തില്‍ മലയാളം വരികളുള്‍പ്പെടുന്ന ഗാനം വരുന്നത്. 2011 ല്‍ അന്തരിച്ച മലേഷ്യ വാസുദേവനൊപ്പം യുഗേന്ദ്രന്‍ വാസുദേവന്‍, അനിരുദ്ധ്, ദീപ്‌തി സുരേഷ് എന്നിവരും ചേര്‍ന്നാണ് ഗാനം ആലപിച്ചിരിക്കുന്നത്. ഗായകന്‍റെ ശബ്‌ദം എഐ സാങ്കേതിക മികവ് ഉപയോഗിച്ചാണ് രൂപപ്പെടുത്തിയത്. 27 വര്‍ഷത്തിന് ശേഷമാണ് രജനികാന്ത് ചിത്രത്തില്‍ മലേഷ്യ വാസുദേവന്‍റെ ആലാപനത്തില്‍ ഒരു ഗാനം എത്തുന്നത്.