ആവേശത്തിലെ ഇലുമിനാറ്റി സൃഷ്‌ടിച്ച ആ ഓളം ഇന്നും തീര്‍ന്നിട്ടില്ല. ആസ്വാദകരുടെ മനസിലേക്ക് അവര്‍ ആഗ്രഹിക്കുന്ന തരത്തിലേക്ക് സംഗീത മഴ പെയ്യിച്ച സംഗീത സംവിധായകനാണ് സുഷിന്‍ ശ്യാം. അതുകൊണ്ടു തന്നെ സംഗീത പ്രേമികളുടെ ഇഷ്‌ട വ്യക്തികൂടിയാണ് സുഷിന്‍ ശ്യാം.
ഇപ്പോഴിതാ 'ആവേശം', 'മഞ്ഞുമ്മല്‍ ബോയ്‌സ്' എന്നീ സിനിമകളിലെ തന്‍റെ വര്‍ക്കുകള്‍ ഗ്രാമി പുരസ്‌കാര പരിഗണനയ്‌ക്കായി ഔദ്യോഗികമായി സമര്‍പ്പിച്ചിരിക്കുകയാണ് സുഷിന്‍. ബെസ്‌റ്റ് കോംപിലേഷന്‍ ഫോര്‍ വിഷ്വല്‍ മീഡിയ വിഭാഗത്തിലേക്കാണ് 'ആവേശ'ത്തിലെ സംഗീതവും ബെസ്‌റ്റ് സ്‌കോര്‍ സൗണ്ട്ട്രാക്ക് ഫോര്‍ വിഷ്വല്‍ മീഡിയ വിഭാഗത്തിലേക്ക് 'മഞ്ഞുമ്മല്‍ ബോയ്‌സി'ലെ സംഗീതവുമാണ് സുഷിന്‍ ശ്യാം അയച്ചിരിക്കുന്നത്. ഇക്കാര്യം സുഷിന്‍ തന്നെയാണ് സമൂഹമാധ്യമങ്ങളിലൂടെ പങ്കുവച്ചത്.
സുഷിന്‍റെ പോസ്‌റ്റിന് പിന്നാലെ നിരവധി പ്രതികരണങ്ങളാണ് വരുന്നത്. സീന്‍ മാറ്റി, ഇത്തവണ ഗ്രാമി പുരസ്‌കാരം സുഷിന്‍ കേരളത്തിലെത്തിക്കുമെന്നാണ് ആരാധകര്‍ കമന്‍റ് ചെയ്‌തിരിക്കുന്നത്. സുഷിന്‍ ഗ്രാമി തൂക്കിയിരിക്കുമെന്നും പറയുന്നുണ്ട്.
മലയാള സിനിമയുടെ സീന്‍ മാറ്റി വിലപിടിപ്പുള്ള ബ്രാന്‍ഡ് നെയിം ആയി വളര്‍ന്ന സംഗീത സംവിധായകനാണ് സുഷിന്‍ ശ്യാം എന്നിങ്ങനെ പോകുന്നു പ്രതികരണങ്ങള്‍.