പ്രതിഫലത്തിലും 'കിങ്‌ ഖാന്‍', രജനിയും സൽമാനും വിജയിയും ഏറെ പിന്നില്‍ - SRK Highest Paid Actor of 2024

2024 -ൽ ഇന്ത്യയിൽ ഒരു ഏറ്റവും കൂടുതൽ പ്രതിഫലം വാങ്ങുന്ന നടൻ ഷാരൂഖ് ഖാനെന്ന് റിപ്പോർട്ട്. ഒരു ചിത്രത്തിന് അദ്ദേഹം 150 കോടി മുതൽ 250 കോടി രൂപ വരെയാണ് വാങ്ങുന്നതെന്നാണ് പറയപ്പെടുന്നത്.

ഹൈദരാബാദ് :2024-ൽ ഏറ്റവും കൂടുതൽ പ്രതിഫലം വാങ്ങുന്ന നടൻ ഷാരൂഖ് ഖാനെന്ന് റിപ്പോർട്ട്. 2023-ൽ ബോളിവുഡില്‍ മൂന്ന് ഹിറ്റുകൾ സമ്മാനിച്ച ഷാരൂഖ് ഖാൻ, അമിർ ഖാൻ, സൽമാൻ ഖാൻ, അക്ഷയ് കുമാർ എന്നിവരെ കൂടാതെ തെന്നിന്ത്യൻ താരങ്ങളായ രജനീകാന്ത്, പ്രഭാസ്, ദളപതി വിജയ്, അല്ലു അർജുൻ എന്നിവരെ പിന്തള്ളിയാണ് പട്ടികയിൽ ഒന്നാം സ്ഥാനത്തെത്തിയത്. 2024 ൽ ഏറ്റവും കൂടുതൽ പ്രതിഫലം വാങ്ങുന്ന 10 അഭിനേതാക്കളിൽ അമിതാഭ് ബച്ചൻ ഇടംപിടിച്ചിട്ടില്ല എന്നതും ശ്രദ്ദേയം.

ഐഎംഡിബിയിൽ (IMDB) നിന്ന് ശേഖരിച്ച ഡാറ്റ ഉപയോഗിച്ച് ഫോർബ്‌സാണ് ഇതു സംബന്ധിച്ച റിപ്പോര്‍ട്ട് പുറത്ത് വിട്ടിരിക്കുന്നത്. ഷാരൂഖ് ഖാൻ ഒരു ചിത്രത്തിന് 150 കോടി മുതൽ 250 കോടി രൂപ വരെ ഈടാക്കുന്നതായാണ് റിപ്പോർട്ടില്‍ പറയുന്നത്. പട്ടികയിൽ രണ്ടാം സ്ഥാനത്തെത്തിയിരിക്കുന്നത് തമിഴ് സൂപ്പർ സ്‌റ്റാർ രജനികാന്താണ്. 150 കോടി മുതൽ 210 കോടി രൂപ വരെയാണ് ഒരു ചിത്രത്തിന് അദ്ദേഹം ഈടാക്കുന്നത്. ദളപതി വിജയ് ആണ് മൂന്നാം സ്ഥാനത്ത്. ഒരു ചിത്രത്തിനായി 130 കോടി മുതൽ 200 കോടി രൂപ വരെ അദ്ദേഹം ഈടാക്കുമെന്ന് പറയപ്പെടുന്നു.

100 കോടി മുതൽ 200 കോടി രൂപ വരെ ഈടാക്കുന്ന പ്രഭാസാണ് പട്ടികയിൽ നാലാമതുള്ളത്. അഞ്ചാമതാണ് ആമിർ ഖാൻ. ഒരു സിനിമയ്ക്ക് 100 കോടി മുതൽ 175 കോടി രൂപ വരെ അദ്ദേഹം ഈടാക്കുമെന്നാണ് റിപ്പോര്‍ട്ട്.

ഒരു ചിത്രത്തിന് 100 കോടി മുതൽ 150 കോടി വരെ വാങ്ങുന്ന സൽമാൻ ഖാൻ ആറാം സ്ഥാനത്തും, 100 കോടി മുതൽ 150 കോടി വരെ ഈടാക്കുമെന്ന് പറയപ്പെടുന്ന കമൽഹാസൻ ഏഴാം സ്ഥാനത്തുമാണുള്ളത്. 100 കോടി മുതൽ 125 കോടി രൂപ വരെ പ്രതിഫലം വാങ്ങുന്ന അല്ലു അർജുൻ എട്ടാം സ്ഥാനം കരസ്ഥമാക്കി. അക്ഷയ് കുമാറും അജിത് കുമാറും ആദ്യ പത്തില്‍ ഇടം നേടിയിട്ടുണ്ട്. അക്ഷയ് കുമാർ 60 കോടി മുതൽ 145 കോടി രൂപ വരെ ഈടാക്കുമെന്നും, അജിത്ത് കുമാർ 105 കോടി രൂപയാണ് ഈടാക്കുന്നതെന്നും പറയപ്പെടുന്നു.

ഷാരൂഖ് ഖാന്‍റെ ആസ്‌തി ഏകദേശം 6300 കോടി രൂപയാണെന്ന് ബിസിനസ് ഇൻസൈഡർ റിപ്പോർട്ട് അവകാശപ്പെടുന്നു. അതേസമയം, ആമിറിന്‍റെ ആസ്‌തി 1862 കോടി രൂപയാണെന്നും റിപ്പോർട്ടുണ്ട്. ഏകദേശം 2900 കോടി രൂപയാണ് സൽമാന്‍റെ ആസ്‌തിയെന്നും ഏകദേശം 2500 കോടി രൂപയാണ് അക്ഷയുടെ ആസ്‌തിയെന്നും റിപ്പോർട്ടിൽ പറയുന്നു.

ദക്ഷിണേന്ത്യയിൽ രജനികാന്തിന്‍റെ ഏകദേശ ആസ്‌തി 430 കോടി രൂപയാണ്. വിജയുടെ ഏകദേശ ആസ്‌തി 474 കോടി രൂപയാണെന്നും പ്രഭാസിന്‍റെ ആസ്‌തി 348.55 കോടി രൂപയാണെന്നും പറയപ്പെടുന്നു.