പ്രേക്ഷകര്‍ അത്രയേറെ ആകാംക്ഷയോടെ കാത്തിരുന്ന ചിത്രമാണ് 'വേട്ടയ്യന്‍'. രജനികാന്ത് നായകന്‍ ആവുന്നത് മാത്രമല്ല 'ഒരുത്തന്‍', 'ജയ് ഭീം' എന്നീ ചിത്രങ്ങള്‍ക്ക് ശേഷം ടി ജെ ജ്ഞാനവേല്‍ സംവിധാനം ചെയ്യുന്ന ചിത്രം കൂടിയായതോടെ ആരാധകരുടെ പ്രതീക്ഷയും ആവേശവും വര്‍ധിക്കുക മാത്രമാണ് ചെയ്‌തത്. രജനികാന്തിന്‍റെ സിനിമാ ജീവിതത്തിലെ 170 ാമത്തെ ചിത്രം കൂടിയാണിത്. അനിരുദ്ധ് രവിചന്ദറാണ് ചിത്രത്തിന് സംഗീതം ഒരുക്കിയത്.
ചിത്രത്തില്‍ തലൈവരുടെ ഭാര്യയായി മലയാളത്തിന്‍റെ ലേഡീ സുപ്പര്‍ സ്‌റ്റാര്‍ മഞ്ജുവാര്യര്‍ ആണ് എത്തുന്നത്. താര എന്നാണ് മഞ്ജുവാര്യര്‍ അവതരിപ്പിക്കുന്ന കഥാപാത്രത്തിന്‍റെ പേര്. ഇപ്പോഴിതാ രജനികാന്തിനും അമിതാഭ് ബച്ചനോടൊപ്പമൊക്കെയുള്ള ലൊക്കേഷന്‍ ചിത്രങ്ങള്‍ ആരാധകര്‍ക്കായി പങ്കുവച്ചിരിക്കുകയാണ് മഞ്ജുവാര്യര്‍. തന്‍റെ സോഷ്യല്‍ മീഡിയയിലൂടെയാണ് ഫോട്ടോ പങ്കുവച്ചത്.
ചുവന്ന സാരിയില്‍ വീടിന്‍റെ പടിവാതിലിരുന്ന് തലൈവര്‍ക്കൊപ്പം ചായ കുടിക്കുന്ന ചിത്രങ്ങലാണ് മഞ്ജു പങ്കുവച്ചത്. ഫോട്ടോ സോഷ്യല്‍ മീഡിയ ഏറ്റെടുത്തിരിക്കുകയാണ്. ഇത് മാത്രമല്ല രജനികാന്തിനോടൊപ്പം മഞ്ജുവാര്യര്‍ തകര്‍ത്ത് അഭിനയിച്ച 'മനസ്സിലായോ' എന്ന സൂപ്പര്‍ഹിറ്റ് ഗാനവും സോഷ്യല്‍ മീഡിയ ആഘോഷിക്കുകയാണ്.
'അസുരന്‍', 'തുനിവ്' എന്നി തമിഴ് ചിത്രങ്ങള്‍ക്ക് ശേഷം മഞ്ജുവാര്യര്‍ അഭിനയിക്കുന്ന തമിഴ് ചിത്രം കൂടിയാണിത്. 'വിടുതലൈ പാര്‍ട്ട് 2' വിലും മഞ്ജു വാര്യര്‍ മുഖ്യകഥാപാത്രമായി എത്തുന്നുണ്ട്.