പത്തനംതിട്ട: 15 കാരിയെ ബലാൽസംഗം ചെയ്‌ത 25 കാരൻ പിടിയിൽ. ഇലന്തൂർ സ്വദേശി അമൽ പ്രകാശാണ് പിടിയിലായത്. കുട്ടിയെ ഫോണിലൂടെ പരിചയപ്പെട്ടശേഷം വിവാഹ വാഗ്‌ദാനം നൽകി. തുടർന്ന് കുട്ടിയുടെ അമ്മയുടെ ഒത്താശയോടെ താലി ചാർത്തുകയും മൂന്നാറിലെത്തിച്ച് ബലാൽസംഗം ചെയ്യുകയായിരുന്നു. ഇയാൾക്ക് ഒത്താശ ചെയ്‌തതായി കണ്ടെത്തിയതിനെത്തുടർന്ന് കുട്ടിയുടെ അമ്മയെയും അറസ്‌റ്റ് ചെയ്‌തു.
പെണ്‍കുട്ടിയുടെ 35 കാരിയായ മാതാവിൻ്റെ അറിവോടെയാണ് സംഭവം നടന്നതെന്ന് പൊലീസ് വ്യക്തമാക്കി. കുട്ടിയെ കാണാതായെന്ന പിതാവിൻ്റെ പരാതിയെ തുടർന്നാണ് പൊലീസ് അന്വേഷണമാരംഭിച്ചത്. കഴിഞ്ഞ ശനിയാഴ്‌ച്ച രാവിലെ 10 മണിയോടെയാണ് കുട്ടിയെ വീട്ടിൽ നിന്ന് കാണാതായത്. അമ്മയുടെ സഹായത്തോടെ കുട്ടിയെ വീട്ടിൽ നിന്ന് യുവാവ് വിളിച്ചിറക്കിക്കൊണ്ട് പോവുകയായിരുന്നു. ഇവരോടൊപ്പം കുട്ടിയുടെ അമ്മയും ഉണ്ടായിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
കുട്ടിയെ ചുട്ടിപ്പാറയിലെത്തിച്ച്, മാതാവിന്‍റെ സാന്നിധ്യത്തിൽ കഴുത്തിൽ താലിചാർത്തി വിവാഹം കഴിച്ചെന്നു പറഞ്ഞ് വിശ്വസിപ്പിച്ചു. തുടർന്ന് അന്ന് വൈകിട്ട് 5 മണിക്ക് തന്നെ കുട്ടിയെ വീട്ടിൽ നിന്ന് മൂന്നാറിലേക്ക് കൊണ്ടുപോയി. യുവാവിന്‍റെ നിർദേശപ്രകാരമാണ് അമ്മ കുട്ടിയേയും കൂട്ടി മൂന്നാറിലേക്ക് പോയത്. ഞായറാഴ്‌ച്ച രാവിലെ മൂന്നാർ ടൗണിനുസമീപം ഹോട്ടലിൽ മുറിയെടുത്ത് താമസിച്ചു. ഇതിനിടെ കുട്ടിയുടെ അമ്മ ശുചിമുറിയിൽ പോയ തക്കം നോക്കി അമൽ കുട്ടിയെ ബലാൽസംഗം ചെയ്യുകയായിരുന്നു.
ജില്ലാ പൊലീസ് സൈബർ സെല്ലിന്‍റെ സഹായത്തോടെ മൊബൈൽ ഫോൺ ലൊക്കേഷൻ തിരിച്ചറിഞ്ഞ അന്വേഷണസംഘം തിങ്കളാഴ്‌ച രാവിലെ 7 മണിയോടെ അവിടെയെത്തി മൂവരെയും കണ്ടെത്തി. തുടർന്ന്, പെൺകുട്ടിയെ കോന്നി നിർഭയ ഹെന്‍റി ഹോമിലെത്തിച്ചു. വനിതാ എസ്ഐ കെ ആർ ഷെമിമോൾ അവിടെവച്ച് കുട്ടിയുടെ മൊഴിരേഖപ്പെടുത്തി. മൊഴിയുടെ അടിസ്ഥാനത്തിൽ അമലിനെതിരെ ബലാൽസംഗത്തിനും പോക്‌സോ നിയമപ്രകാരവുമുള്ള വകുപ്പുകൾ ചേർത്ത് കേസ് രജിസ്‌റ്റർ ചെയ്യുകയായിരുന്നു. തുടർന്ന് വിശദമായി ചോദ്യം ചെയ്‌ത് അറസ്‌റ്റ് രേഖപ്പെടുത്തി.
സംരക്ഷണചുമതലയുള്ള വ്യക്തിയെന്ന നിലയ്ക്ക് ഉത്തരവാദിത്തം നിർവഹിക്കാത്തതിന്‍റെ പേരിൽ മാതാവിനെ ബാലനീതി നിയമത്തിലെ ബന്ധപ്പെട്ട വകുപ്പുപ്രകാരം അറസ്‌റ്റ് ചെയ്‌തു. വൈദ്യപരിശോധന നടത്തിച്ചശേഷം കുട്ടിയുടെ മൊഴി വിശദമായി രേഖപ്പെടുത്തി ശാസ്‌ത്രീയ തെളിവുകൾ ശേഖരിച്ചു. പ്രതിയെ പത്തനംതിട്ട ജനറൽ ആശുപത്രിയിൽ വൈദ്യപരിശോധനക്ക് വിധേയനാക്കി.
തുടർനടപടികൾ പൂർത്തിയാക്കി പ്രതികളെ കോടതിയിൽ ഹാജരാക്കി. മലയാലപ്പുഴ പൊലീസ് ഇൻസ്‌പെക്‌ടർ കെ എസ് വിജയന്‍റെ നേതൃത്വത്തിലാണ് അന്വേഷണം നടക്കുന്നത്. എസ്ഐ വി എസ് കിരൺ, എസ്‌സിപിഒമാരായ സുധീഷ് കുമാർ, ഇർഷാദ്, രതീഷ്, സിപിഒമാരായ പ്രിയേഷ്, ആതിര എന്നിവരാണ് അന്വേഷണ സംഘത്തിലുള്ളത്.
