ബാങ്ക് ജീവനക്കാര്‍ക്കുള്ള ക്ഷാമബത്ത 15.67 ശതമാനം ഉയര്‍ത്തിയതായി ഇന്ത്യന്‍ ബാങ്ക് അസോസിയേഷന്‍ (ഐബിഎ). ജൂണ്‍, ജൂലൈ മാസങ്ങളിലെ ക്ഷമാബത്തയാണ് 15.67 ശതമാനമാക്കി ഉയര്‍ത്തിയത്. ഇന്നലെയാണ് (ജൂണ്‍ 10) ഇതുസംബന്ധിച്ച് ഐബിഎ വിജ്ഞാപനം ഇറക്കിയത്. 'ബാങ്ക് ജീവനക്കാര്‍ക്കുള്ള ഡിഎ 15.67 ശതമാനമാക്കി ഉയര്‍ത്തിയിട്ടുണ്ടെന്ന്' വിജ്ഞാപനത്തില്‍ പറയുന്നു.
നേരത്തെയുണ്ടായിരുന്ന ഡിഎയില്‍ നിന്നും 0.24 ശതമാനമാണ് ഇത്തവണ വര്‍ധനവുണ്ടായിട്ടുള്ളത്. നേരത്തെ 138.76 ആയിരുന്നു ജീവനക്കാര്‍ക്കുള്ള ഡിഎ. കഴിഞ്ഞ മാര്‍ച്ചില്‍ ഇന്ത്യന്‍ ബാങ്ക് അസോസിയേഷനും ബാങ്ക് ജീവനക്കാരുടെ യൂണിയനുകളും 17 ശതമാനം വാര്‍ഷിക വേതന വര്‍ധനവ് സംബന്ധിച്ച് ധാരണയിലെത്തിയിരുന്നു. ഈ തീരുമാനം പൊതുമേഖല ബാങ്കുകള്‍ക്ക് ഏകദേശം 8284 കോടി രൂപയുടെ അധിക ചെലവുണ്ടാക്കിയേക്കും.