ഉജ്ജയിൻ :മധ്യപ്രദേശില്‍ പൊലീസ് നോക്കിനില്‍ക്കെ ബിജെപി യുവനേതാവ് പ്രകാശ് യാദവിന് വെടിയേറ്റു. കഴിഞ്ഞ ദിവസം മുന്‍സെെനികന്‍ എസ്‌പി ഭഡോറിയയാണ് പ്രകാശിനു നേരെ വെടിയുതിര്‍ത്തത്. നാഗ്‌ജിരി പൊലീസ് സ്റ്റേഷന്‍ പരിധിയിൽ ഹമുഖേഡിയിലാണ് സംഭവം.
പ്രകാശ് യാദവും എസ്‌പി ഭഡോറിയയും തമ്മിലുള്ള സാമ്പത്തിക തർക്കം അന്വേഷിക്കുന്നതിനാണ് പൊലീസ് യാദവിന്‍റെ വീട്ടിൽ എത്തിയതെന്ന് പൊലീസ് സൂപ്രണ്ട് പ്രദീപ് ശർമ്മ പറഞ്ഞു. പൊലീസ് എത്തിയതിന് തൊട്ടുപിന്നാലെ ലൈസൻസുള്ള പിസ്റ്റളുമായി മോട്ടോർ സൈക്കിളിൽ എത്തിയ ഭഡോറിയ പൊലീസുകാരുടെ മുന്നിൽ വച്ച് യാദവിന് നേരെ വെടിയുതിർക്കുകയായിരുന്നു. ബുള്ളറ്റ് യാദവിന്‍റെ നെഞ്ചിന്‍റെ വലതുഭാഗത്താണ് പതിച്ചത്. ഇയാള്‍ നിലവിൽ സഞ്ജീവനി ആശുപത്രിയിൽ ചികിത്സയിലാണ്.