ന്യൂഡല്‍ഹി: രാജ്യാന്തര കറന്‍സികള്‍ക്ക് പകരം ഉപയോഗിക്കാനായല്ല രാജ്യത്ത് റിസര്‍വ് ബാങ്കടക്കം സ്വര്‍ണ ശേഖരം വര്‍ധിപ്പിക്കുന്നതെന്ന് വെളിപ്പെടുത്തി ധനമന്ത്രി നിര്‍മ്മല സീതാരാമന്‍ രംഗത്ത്. കോണ്‍ഗ്രസ് എംപി മനീഷ് തിവാരിയുടെ ചോദ്യത്തോട് പ്രതികരിക്കുകയായിരുന്നു മന്ത്രി. അമേരിക്കന്‍ ഡോളറിന് പകരം രാജ്യാന്തര ഇടപാടുകള്‍ക്കായി സ്വര്‍ണം ഉപയോഗിക്കാനുദ്ദേശിക്കുന്നുണ്ടോ എന്നായിരുന്നു അദ്ദേഹം ഉയര്‍ത്തിയ ചോദ്യം.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
സ്വര്‍ണം സ്വര്‍ണമായി തന്നെ അവിടെ ഇരിക്കും. രാജ്യാന്തര കറന്‍സികള്‍ക്ക് പകരം ഉപയോഗിക്കില്ല. 1971ല്‍ സ്വര്‍ണ അധിഷ്‌ഠിത ഇടപാടുകള്‍ അമേരിക്ക അവസാനിപ്പിച്ചിരുന്നു. ഇതോടെ ഒരു സ്വത്ത് എന്ന നിലയിലുള്ള സ്വര്‍ണത്തിന്‍റെ പ്രധാന്യത്തിന് ഇടിവുണ്ടായി. എന്നാല്‍ അടുത്തിടെയായി ലോകമെമ്പാടുമുള്ള കേന്ദ്ര ബാങ്കുകള്‍ തങ്ങളുടെ സ്വര്‍ണ ശേഖരം വിപുലപ്പെടുത്തുന്നുണ്ട്.
2006ല്‍ കേവലം ആറ് ശതമാനം മാത്രമായിരുന്നു നമ്മുടെ സ്വര്‍ണ ശേഖരം. എന്നാല്‍ 2024ല്‍ ഇത് 11ശതമാനമായി ഉയര്‍ന്നിട്ടുണ്ട്. ചൈന, ഇന്ത്യ, പോളണ്ട്, തുര്‍ക്കി തുടങ്ങിയ രാജ്യങ്ങളാണ് ഇത്തരത്തില്‍ സ്വര്‍ണം വാങ്ങിക്കൂട്ടുന്നതിലേറെയും. തുര്‍ക്കി തന്നെയാണ് സ്വര്‍ണം വാങ്ങലില്‍ ഏറ്റവും മുന്നില്‍. ഇന്ത്യയുടെ ആഭ്യന്തര വിപണിയില്‍ സ്വര്‍ണ വില കുതിച്ചുയരുകയാണ്.