മോഹന്‍ലാലിനെ നായകനാക്കി സത്യന്‍ അന്തിക്കാട് സംവിധാനം ചെയ്യുന്ന ചിത്രമാണ് 'ഹൃദയപൂര്‍വ്വം'. സിനിമയുടെ ചിത്രീകരണം കൊച്ചിയില്‍ ആരംഭിച്ചു. സിനിമയുടെ പൂജ ചടങ്ങിന്‍റെ ചിത്രങ്ങള്‍ മോഹന്‍ലാല്‍ തന്‍റെ സോഷ്യല്‍ മീഡിയ പേജുകളില്‍ പങ്കുവച്ചിട്ടുണ്ട്.
ലൊക്കേഷന്‍ ചിത്രങ്ങള്‍ക്കൊപ്പം ഒരു അടിക്കുറിപ്പും അദ്ദേഹം പങ്കുവച്ചിട്ടുണ്ട്. "തുടങ്ങുകയാണ്! ഹൃദയപൂര്‍വ്വം ഇന്ന് ആദ്യ ചുവടുവയ്‌പ്പ് നടത്തുന്നു" -എന്ന അടിക്കുറിപ്പോടുകൂടിയാണ് മോഹന്‍ലാല്‍ ചിത്രങ്ങള്‍ ഫേസ്‌ബുക്കില്‍ പങ്കുവച്ചിരിക്കുന്നത്.
മുളന്തുരുത്തി എരിവേലിയിലുള്ള മനോഹരമായൊരു ബംഗ്ലാവില്‍ തികച്ചും ലളിതമായ ചടങ്ങില്‍ മോഹന്‍ലാലും സത്യന്‍ അന്തിക്കാടും ചേര്‍ന്ന് ആദ്യ ഭദ്രദീപം തെളിയിച്ച് കൊണ്ടാണ് സിനിമയുടെ ചിത്രീകരണത്തിന് തുടക്കം കുറിച്ചത്. തുടര്‍ന്ന് സിദ്ദിഖ്, ബി.ഉണ്ണികൃഷ്‌ണന്‍, ആന്‍റണി പെരുമ്പാവൂര്‍, ടിപി സോനു, ശാന്തി ആന്‍റണി, അനുമൂത്തേടത്ത് എന്നിവര്‍ ചേര്‍ന്ന് ചടങ്ങ് പൂര്‍ത്തീകരിച്ചു.
സിദ്ദിഖും സബിതാ ആനന്തുമാണ് ആദ്യ രംഗത്തില്‍ അഭിനയിച്ചത്. മാളവിക മോഹനാണ് ചിത്രത്തില്‍ നായികയായി എത്തുന്നത്. സന്ദീപ് ബാലകൃഷ്‌ണന്‍ എന്ന കഥാപാത്രത്തെയാണ് ചിത്രത്തില്‍ മോഹന്‍ലാല്‍ അവതരിപ്പിക്കുക.
2015ല്‍ 'എന്നും എപ്പോഴും' എന്ന ചിത്രത്തിലാണ് ഇതിന് മുമ്പ് മോഹന്‍ലാലും സത്യന്‍ അന്തിക്കാടും ഒന്നിച്ചഭിനയിച്ചത്. ഇരുവരും ഒന്നിക്കുന്ന 20-ാമത്തെ ചിത്രം കൂടിയാണിത്. കുടുംബ പ്രേക്ഷകര്‍ക്ക് ഇഷ്‌ടപ്പെടുന്നൊരു ചിത്രമാകും 'ഹൃദയപൂര്‍വ്വ'മെന്ന് സംവിധായകന്‍ നേരത്തെ തന്നെ അറിയിച്ചിരുന്നു. സിനിമയുടെ ചിത്രീകരണത്തിന് മുമ്പ് തന്നെ പേര് തീരുമാനിച്ച അപൂര്‍വ്വം സത്യന്‍ അന്തിക്കാട് ചിത്രങ്ങളില്‍ ഒന്നാണ് 'ഹൃദയപൂര്‍വ്വം'.
'ഹൃദയപൂര്‍വ്വ'ത്തില്‍ സത്യന്‍ അന്തിക്കാടിന്‍റെ മക്കളായ അഖില്‍ സത്യനും അനൂപ് സത്യനും പ്രവര്‍ത്തിക്കുന്നുണ്ട്. അഖില്‍ സത്യന്‍റേതാണ് കഥ. അനൂപ് സത്യന്‍ അസോഷ്യേറ്റ് ആയും പ്രവര്‍ത്തിക്കുന്നു.
നവാഗതനായ സോനു ടിപിയാണ് സിനിമയുടെ തിരക്കഥയും സംഭാഷണവും ഒരുക്കുന്നത്. 'പ്രേമലു'വില്‍ അമല്‍ ഡേവിഡായി വേഷമിട്ട സംഗീതും ചിത്രത്തില്‍ മുഴുനീള വേഷത്തില്‍ എത്തുന്നുണ്ട്. കൂടാതെ നിഷാന്‍, ജനാര്‍ദ്ദനന്‍, ലാലു അലക്‌സ്, സിദ്ദിഖ് എന്നിവരും സുപ്രധാന വേഷങ്ങളില്‍ എത്തുന്നുണ്ട്.
അനു മൂത്തേടത്താണ് സിനിമയുടെ ഛായാഗ്രഹണം നിര്‍വ്വഹിക്കുന്നത്. കെ രാജഗോപാല്‍ എഡിറ്റിംഗും നിര്‍വ്വഹിക്കും. യുവ സംഗീതജ്‌ഞന്‍ ജസ്‌റ്റിന്‍ പ്രഭാകരനാണ് സംഗീതം ഒരുക്കുക. കലാസംവിധാനം - പ്രശാന്ത് മാധവ്, മേക്കപ്പ് - പാണ്ഡ്യന്‍, കോസ്റ്റ്യൂം ഡിസൈന്‍ - സമീറ സനീഷ്, സഹ സംവിധാനം - ആരോണ്‍ മാത്യു, രാജീവ് രാജേന്ദ്രന്‍, ശ്രീഹരി, വന്ദന സൂര്യ, പിആര്‍ഒ - വാഴൂര്‍ ജോസ് എന്നിവരും നിര്‍വ്വഹിക്കും.
