ബെംഗളൂരു (കര്‍ണാടക) :രണ്ടാനച്ഛന്‍ മകളെ ലൈംഗികമായി പീഡിപ്പിച്ചെന്ന ബയോളജിക്കല്‍ പിതാവിന്‍റെ പരാതിയുമായി ബന്ധപ്പെട്ട കേസും വിചാരണ നടപടികളും റദ്ദാക്കി ഹൈക്കോടതി (Karnataka HC on False sexual harassment complaint). യുവതിയുടെ മുന്‍ ഭര്‍ത്താവ് നല്‍കിയ കേസ് റദ്ദാക്കണമെന്നാവശ്യപ്പെട്ട് യുവാവ് സമര്‍പ്പിച്ച ഹര്‍ജി പരിഗണിക്കവെ ജസ്റ്റിസ് എം നാഗപ്രസന്ന അധ്യക്ഷനായ ബെഞ്ചാണ് ഇക്കാര്യം ഉത്തരവിട്ടത്.
കുടുംബത്തിലെ അഭിപ്രായ ഭിന്നതകളില്‍ മാതാപിതാക്കള്‍ മക്കള്‍ പീഡിപ്പിക്കപ്പെട്ടു എന്ന തരത്തില്‍ പരാതികള്‍ നല്‍കാറുണ്ട്. എന്നാല്‍ ഇത്തരം സംഭവങ്ങള്‍ കുട്ടിയില്‍ ഉണ്ടാക്കുന്ന പ്രതികൂല സ്വാധീനം പ്രവചിക്കാന്‍ കഴിയില്ലെന്ന് കോടതി നിരീക്ഷിച്ചു. അതിനാല്‍ ഇത്തരം ആരോപണങ്ങള്‍ ഉന്നയിക്കുന്നതിന് മുമ്പ് രക്ഷിതാക്കള്‍ ചിന്തിക്കണമെന്നും ആത്മപരിശോധന നടത്തണമെന്നും കോടതി നിര്‍ദേശിച്ചു.
ഇത്തരം സംഭവങ്ങളില്‍ യാഥാര്‍ഥ്യം ഉണ്ടെങ്കില്‍ കോടതി നിയമ നടപടി സ്വീകരിക്കും. എന്നാല്‍ പ്രസ്‌തുത കേസില്‍, കുട്ടിയുടെ സംരക്ഷണം നല്‍കാത്തതിന്‍റെ പേരില്‍ വ്യാജ പരാതി നല്‍കുകയായിരുന്നു (False sexual harassment complaint). ആദ്യ ഭാര്യ മറ്റൊരാളെ വിവാഹം കഴിച്ചതിലുള്ള പകപോക്കാന്‍ നിയമം ദുരുപയോഗം ചെയ്‌തതായും വ്യക്തമാണ്. അതിക്രമങ്ങളില്‍ നിന്ന് കുട്ടികളെ രക്ഷിക്കുന്നതിനുള്ള പോക്‌സോ (POCSO) നിയമം ദുരുപയോഗം ചെയ്യപ്പെടുന്നതും ദൗര്‍ഭാഗ്യകരമാണെന്ന് കോടതി അഭിപ്രായപ്പെട്ടു.