പൂനെ: ഇവൈ കമ്പനിയിലെ മലയാളി ജീവനക്കാരിയുടെ മരണത്തിന് പിന്നാലെ കോർപ്പറേറ്റ് സ്ഥാപനങ്ങളിലെ ജോലി സമ്മര്‍ദത്തെക്കുറിച്ചുള്ള ചര്‍ച്ച സജീവമാക്കിയിരിക്കുകയാണ്. പല കമ്പനികളിലെയും മുതിർന്ന എക്‌സിക്യൂട്ടീവുകൾ ജോലി ഭാരത്തെ സംബന്ധിച്ച് തുറന്നു പറഞ്ഞുകൊണ്ട് രംഗത്ത് വരുന്നുണ്ട്. ഇത്തരം സാഹചര്യങ്ങളെ നേരിടാൻ സഹായിക്കുന്ന ഫലപ്രദമായ നയങ്ങൾ രൂപീകരിക്കണമെന്ന് കോർപ്പറേറ്റ് ഔട്ട്ബൗണ്ട് വിദഗ്‌ധനായ തൻമയ് പെൻഡ്സെ സർക്കാരിനോട് അഭ്യർഥിക്കുന്നു.
'കഴിഞ്ഞ 15-16 വർഷമായി മാനേജ്മെന്‍റ് പ്രവർത്തനങ്ങളിലൂടെ ഞങ്ങൾ ആളുകളെ പരിശീലിപ്പിക്കുന്നുണ്ട്. സമ്മർദം കുറയ്ക്കാൻ സഹായിക്കുന്ന സെഷനുകൾ ഞങ്ങൾ ഉൾപ്പെടുത്തിയിട്ടുണ്ട്. ജോലി കഴിഞ്ഞ് വീട്ടിലെത്തുന്ന ജീവനക്കാർ മൊബൈല്‍ ഫോണ്‍ ഒഴിവാക്കി കുടുംബത്തോടൊപ്പം സമയം ചെലവഴിക്കുകയാണ് വേണ്ടത്. ഇത്തരം ദുരിത സാഹചര്യങ്ങൾ നേരിടാൻ കഴിയുന്ന തരത്തിൽ ഒരു പ്രത്യേക നയം കൊണ്ടുവരാൻ ഞാൻ സർക്കാരിനോട് അഭ്യർഥിക്കുന്നു. എല്ലാ സ്ഥാപനങ്ങളിലും യോഗ സെഷനുകളും ആരംഭിക്കണം.'- തൻമയ് പെൻഡ്സെ പറഞ്ഞു.
ജീവിതത്തില്‍ ഒഴിവാക്കാനാകാത്ത ഘടകമായി നിലനിൽക്കുന്നതിനാൽ സമ്മര്‍ദം എന്നത് കൈകാര്യം ചെയ്യാന്‍ എല്ലാവരും അറിഞ്ഞിരിക്കണമെന്ന് ടാറ്റ കൺസൾട്ടൻസി സർവീസസിലെ (ടിസിഎസ്) കൺസൾട്ടന്‍റായ നിഖിൽ ബഡ്‌ഗുജർ പറയുന്നു. 'വളരെ ദൗർഭാഗ്യകരമായ സംഭവമാണ് ഉണ്ടായത്. സമ്മർദത്തോട് എങ്ങനെ പ്രതികരിക്കണമെന്ന് ആളുകൾ മനസിലാക്കേണ്ടതുണ്ട്.
സമ്മർദം ആപേക്ഷികമാണ്. ഞാൻ അനുഭവിക്കുന്ന സമ്മർദമല്ല മറ്റൊരാൾ അനുഭവിക്കുന്നത്. കോർപ്പറേറ്റ് ലോകത്ത് സമ്മർദം എങ്ങനെ കുറയ്ക്കാം എന്നതിനെ കുറിച്ച് നമ്മൾ ചിന്തിക്കേണ്ടതുണ്ട്. അതിനോട് എങ്ങനെ പ്രതികരിക്കണമെന്ന് നമ്മൾ മനസിലാക്കണം. നമ്മൾ തന്നെയാണ് പരിഹാരം കണ്ടെത്തേവര്‍'- ബദ്ഗുജർ പറയുന്നു.