ನವದೆಹಲಿ: ಫ್ಲಿಪ್ ಕಾರ್ಟ್ ಈಗ ತನ್ನ ಸ್ವಂತದ ಯುಪಿಐ ಸೇವೆಯನ್ನು ಆರಂಭಿಸಿದೆ. ಫ್ಲಿಪ್ ಕಾರ್ಟ್ನ ಹೊಸ ಯುನಿಫೈಡ್ ಪೇಮೆಂಟ್ಸ್ ಇಂಟರ್ಫೇಸ್ ಮೂಲಕ ಬಳಕೆದಾರರು ಫ್ಲಿಪ್ ಕಾರ್ಟ್ ಆ್ಯಪ್ನ ಒಳಗೆ ಮತ್ತು ಹೊರಗೆ ಆನ್ಲೈನ್ ಮತ್ತು ಆಫ್ಲೈನ್ ವಿಧಾನದಲ್ಲಿ ಹಣ ಪಾವತಿ ಮಾಡಬಹುದು. ಆಕ್ಸಿಸ್ ಬ್ಯಾಂಕ್ ಸಹಯೋಗದಲ್ಲಿ ಆರಂಭವಾಗಿರುವ ಈ ಸೇವೆಯು ಆರಂಭದಲ್ಲಿ ಆಂಡ್ರಾಯ್ಡ್ ಬಳಕೆದಾರರಿಗೆ ಲಭ್ಯವಿರುತ್ತದೆ ಎಂದು ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ.
ಪೇಟಿಎಂ, ಫೋನ್ ಪೇ, ಗೂಗಲ್ ಪೇ ಮತ್ತು ಅಮೆಜಾನ್ ಪೇ ನಂತಹ ಥರ್ಡ್ ಪಾರ್ಟಿ ಯುಪಿಐ ಅಪ್ಲಿಕೇಶನ್ಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಫ್ಲಿಪ್ ಕಾರ್ಟ್ ತನ್ನದೇ ಆದ ಯುಪಿಐ ಸೇವೆ ಜಾರಿಗೊಳಿಸಿದೆ.
"ಬದಲಾಗುತ್ತಿರುವ ಡಿಜಿಟಲ್ ವ್ಯವಸ್ಥೆಯನ್ನು ಗುರುತಿಸಿ, ಫ್ಲಿಪ್ ಕಾರ್ಟ್ ಯುಪಿಐ ಸೇವೆಯು ಯುಪಿಐನ ಅನುಕೂಲತೆ ಮತ್ತು ವೆಚ್ಚ ಕಡಿತವನ್ನು ಸೂಕ್ತವಾಗಿ ವಿಲೀನಗೊಳಿಸುತ್ತದೆ" ಎಂದು ಫ್ಲಿಪ್ ಕಾರ್ಟ್ನ ಫಿನ್ ಟೆಕ್ ಮತ್ತು ಪಾವತಿ ಸಮೂಹದ ಹಿರಿಯ ಉಪಾಧ್ಯಕ್ಷ ಧೀರಜ್ ಅನೇಜಾ ಹೇಳಿದರು.
ಬಳಕೆ ಹೇಗೆ?: ಫ್ಲಿಪ್ಕಾರ್ಟ್ ತನ್ನ ಪ್ಲಾಟ್ಫಾರ್ಮ್ನಲ್ಲಿ 50 ಕೋಟಿ ನೋಂದಾಯಿತ ಬಳಕೆದಾರರು ಮತ್ತು 14 ಲಕ್ಷ ಮಾರಾಟಗಾರರನ್ನು ಹೊಂದಿದೆ ಎಂದು ವರದಿಯಾಗಿದೆ. ಗ್ರಾಹಕರು ಫ್ಲಿಪ್ ಕಾರ್ಟ್ ಅಪ್ಲಿಕೇಶನ್ನಲ್ಲಿ ಯುಪಿಐ ಐಡಿಯನ್ನು ರಚಿಸಿ ವ್ಯಾಪಾರಿಗಳು ಮತ್ತು ವ್ಯಕ್ತಿಗಳಿಗೆ ಪಾವತಿ ಮಾಡಬಹುದು ಮತ್ತು ಅಪ್ಲಿಕೇಶನ್ಗಳನ್ನು ಬದಲಾಯಿಸದೆ ಬಿಲ್ಗಳನ್ನು ಪಾವತಿಸಬಹುದು.
ಫ್ಲಿಪ್ಕಾರ್ಟ್ನ ಆಂತರಿಕ ಯುಪಿಐ ಸೇವೆಯನ್ನು ಮಿಂತ್ರಾ, ಫ್ಲಿಪ್ ಕಾರ್ಟ್ ಹೋಲ್ ಸೇಲ್, ಫ್ಲಿಪ್ ಕಾರ್ಟ್ ಹೆಲ್ತ್ + ಮತ್ತು ಕ್ಲಿಯರ್ ಟ್ರಿಪ್ ಸೇರಿದಂತೆ ಫ್ಲಿಪ್ ಕಾರ್ಟ್ ಗ್ರೂಪ್ ಕಂಪನಿಗಳ ಪ್ಲಾಟ್ಫಾರ್ಮ್ಗಳಲ್ಲಿ ಕೂಡ ಸುಲಭವಾಗಿ ಬಳಸಬಹುದು.
"ಆಕ್ಸಿಸ್ ಬ್ಯಾಂಕ್ ತನ್ನ ಗ್ರಾಹಕರಿಗೆ ಯುಪಿಐನ ಬಹು ಪಾವತಿ ಸೌಲಭ್ಯವನ್ನು ವಿಸ್ತರಿಸುವಲ್ಲಿ ಯಾವಾಗಲೂ ಮುಂಚೂಣಿಯಲ್ಲಿದೆ. ಪಾಲುದಾರಿಕೆ ಮತ್ತು ಆವಿಷ್ಕಾರಗಳೊಂದಿಗೆ ಯುಪಿಐನಲ್ಲಿ ನಮ್ಮ ಬೆಳವಣಿಗೆಯನ್ನು ಮುಂದುವರಿಸುತ್ತೇವೆ. ಫ್ಲಿಪ್ ಕಾರ್ಟ್ನೊಂದಿಗಿನ ನಮ್ಮ ಸಹಭಾಗಿತ್ವದಲ್ಲಿ ಭಾರತದ ಅತ್ಯಂತ ಯಶಸ್ವಿ ಕೋ-ಬ್ರಾಂಡೆಡ್ ಕ್ರೆಡಿಟ್ ಕಾರ್ಡ್ ಸೇವೆಯನ್ನು ಈಗಾಗಲೇ ಪ್ರಾರಂಭಿಸಲಾಗಿದೆ. ಈಗ ಫ್ಲಿಪ್ಕಾರ್ಟ್ನೊಂದಿಗೆ ಯುಪಿಐ ಸೇವೆಯನ್ನು ಪ್ರಾರಂಭಿಸುವ ಮೂಲಕ ನಮ್ಮ ಸಹಯೋಗ ಬಹುದೂರ ಸಾಗಿ ಬಂದಿದೆ" ಎಂದು ಆಕ್ಸಿಸ್ ಬ್ಯಾಂಕಿನ ಕಾರ್ಡ್ಸ್ ಮತ್ತು ಪಾವತಿಗಳ ಅಧ್ಯಕ್ಷ ಮತ್ತು ಮುಖ್ಯಸ್ಥ ಸಂಜೀವ್ ಮೊಘೆ ಹೇಳಿದರು.
ಇದನ್ನೂ ಓದಿ : ಫೇಸ್ಬುಕ್ & ಇನ್ಸ್ಟಾದಲ್ಲಿನ 2 ಕೋಟಿ 20 ಲಕ್ಷ ಆಕ್ಷೇಪಾರ್ಹ ಪೋಸ್ಟ್ ಡಿಲೀಟ್ ಮಾಡಿದ ಮೆಟಾ
