ಬೆಂಗಳೂರು:ಆಗ್ನೇಯ ಶಿಕ್ಷಕರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ವೈ.ಎ.ನಾರಾಯಣಸ್ವಾಮಿ ಕುಟುಂಬ 23.72 ಕೋಟಿ ರೂ ಮೌಲ್ಯದ ಆಸ್ತಿ ಹೊಂದಿದೆ. ಬೆಂಗಳೂರು ಪದವೀಧರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಅ.ದೇವೇಗೌಡ ಕುಟುಂಬ 7.5 ಕೋಟಿ ರೂ ಮೌಲ್ಯದ ಆಸ್ತಿ ಹೊಂದಿದೆ. ಇಬ್ಬರ ಕುಟುಂಬದಲ್ಲೂ ಅಭ್ಯರ್ಥಿಗಿಂತ ಪತ್ನಿಯೇ ಸಿರಿವಂತೆ ಎಂಬುದು ವಿಶೇಷ.
ಡಾ.ವೈ.ಎ.ನಾರಾಯಣಸ್ವಾಮಿ ಅವರು ತಮ್ಮ ಕೈಯಲ್ಲಿ 2.50 ಲಕ್ಷ ರೂ. ನಗದು ಹೊಂದಿದ್ದಾರೆ. ತಲಾ ಒಂದು ಬಿಎಂಡಬ್ಲ್ಯು, ಹ್ಯುಂಡೈ ಆಕ್ಸೆಂಟ್, ಮಾರುತಿ-800 ಕಾರು, ರಾಯಡೋ ಆ್ಯಂಡ್ ರೋಲೆಕ್ಸ್ ವಾಚ್, ಠೇವಣಿಗಳು ಸೇರಿ 11,52,00,000 ರೂ. ಮೌಲ್ಯದ ಚರ ಮತ್ತು ಸ್ತಿರಾಸ್ತಿ ಹೊಂದಿದ್ದಾರೆ.
ಇವರ ಪತ್ನಿ ಬಿ.ಎನ್.ಉಷಾನಂದಿನಿ ಹೆಸರಿನಲ್ಲಿ ಎರಡು ಕೆ.ಜಿ ಚಿನ್ನ, ಕಾರು ಸೇರಿ 12,20,00,000 ರೂ. ಮೌಲ್ಯದ ಚರ ಮತ್ತು ಸ್ತಿರಾಸ್ಥಿ ಇದೆ. ಪುತ್ರ ವೈ.ಎನ್.ಪ್ರಜ್ಞ ನಾರಾಯಣ ಹೆಸರಿನಲ್ಲಿ ಚಿನ್ನ, ಠೇವಣಿ ಸೇರಿ 13.33 ಲಕ್ಷ ರೂ. ಮೌಲ್ಯದ ಚರಾಸ್ತಿ ಇದೆ.
ಕೃಷಿ, ಕೃಷಿಯೇತರ ಜಮೀನು, ಮನೆ, ವಾಣಿಜ್ಯ ಕಟ್ಟಡಗಳು ಸೇರಿದಂತೆ ನಾರಾಯಣಸ್ವಾಮಿ ಮತ್ತವರ ಪತ್ನಿ ಒಟ್ಟು 23.72 ಕೋಟಿ ರೂ. ಮೌಲ್ಯದ ಸ್ಥಿರಾಸ್ತಿ ಹೊಂದಿದ್ದಾರೆ. ನಾರಾಯಣಸ್ವಾಮಿ 6.46 ಕೋಟಿ ಮತ್ತು ಪತ್ನಿ 6.66 ಕೋಟಿ ಬ್ಯಾಂಕ್ ಸಾಲ ಪಡೆದಿದ್ದಾರೆ. ಇಬ್ಬರದು ಸೇರಿ 13.13 ಕೋಟಿ ರೂ. ಸಾಲವಿದೆ ಎಂದು ಅಫಿಡವಿಟ್‌ನಲ್ಲಿ ಮಾಹಿತಿ ನೀಡಿದ್ದಾರೆ.