ಹುಬ್ಳಳ್ಳಿ ಚನ್ನಮ್ಮ ಸರ್ಕಲ್ ಬಳಿ ಫ್ಲೈ ಓವರ್ ಕಾಮಗಾರಿ: ಸಂಚಾರ ಮಾರ್ಗ ಬದಲಾವಣೆ

ಚನ್ನಮ್ಮ ಸರ್ಕಲ್ ಹತ್ತಿರ ಫ್ಲೈ ಓವರ್ ಕಾಮಗಾರಿ ಹಿನ್ನೆಲೆಯಲ್ಲಿ ಹುಬ್ಬಳ್ಳಿಗೆ ಆಗಮಿಸುವ ವಾಹನ ಸವಾರರಿಗೆ ಸಂಚಾರ ಪೊಲೀಸರು ಮಹತ್ವದ ಸೂಚನೆ ನೀಡಿದ್ದಾರೆ.

ಹುಬ್ಬಳ್ಳಿ:ನಗರದ ಚನ್ನಮ್ಮ ಸರ್ಕಲ್ ಬಳಿ ಫ್ಲೈ ಓವರ್ ಕಾಮಗಾರಿ ಪ್ರಾರಂಭಗೊಂಡಿದ್ದು, ಸುಗಮ ಸಂಚಾರದ ಹಿತದೃಷ್ಟಿಯಿಂದ ಹುಬ್ಬಳ್ಳಿ ಶಹರದಲ್ಲಿ ವಾಹನಗಳಿಗೆ ಫೆಬ್ರವರಿ 10 ರಿಂದ ಪ್ರತ್ಯೇಕ ಮಾರ್ಗ ಕಲ್ಪಿಸಲಾಗಿದೆ.

ಹೊಸೂರು ಸರ್ಕಲ್​ನಿಂದ ಗದಗ ಕಡೆಗೆ ಸಂಚರಿಸುವ ಬಸ್, ಭಾರಿ ಗಾತ್ರದ ಹಾಗೂ ಇತರೆ ವಾಹನಗಳು ಬಸವವನ, ಹಳೇ ಬಸ್​​ ಸ್ಟ್ಯಾಂಡ್ -​ ಅಯೋಧ್ಯಾ ಹೋಟೆಲ್ ಮುಂದೆ ಹಾಯ್ದು, ಚನ್ನಮ್ಮ ಸರ್ಕಲ್, ಸಂಗೊಳ್ಳಿ ರಾಯಣ್ಣ ಸರ್ಕಲ್ ಮೂಲಕ ಗದಗ ರಸ್ತೆಗೆ ಹೋಗಬಹುದು. ಅಲ್ಲದೆ, ಹೊಸೂರು ಸರ್ಕಲ್​ನಿಂದ ವಿಜಯಪುರ ರಸ್ತೆಯತ್ತ ಸಂಚರಿಸುವ ವಾಹನಗಳು ಬೆಂಬಳಗಿ ಕ್ರಾಸ್, ಬಾಳಿಗಾ ಕ್ರಾಸ್ - ಹುಬ್ಬಳ್ಳಿ ಸ್ಕ್ಯಾನ್ ಸೆಂಟ‌ರ್ ಹತ್ತಿರ ಎಡಕ್ಕೆ ತಿರುಗಿ, ದೇಸಾಯಿ ಓವರ್ ಬ್ರಿಡ್ಜ್​ ಮುಖಾಂತರ ತೆರಳಬಹುದು.

ವಿಜಯಪುರ ರಸ್ತೆಗೆ ಹೊಸೂರು ಸರ್ಕಲ್‌ ಕಡೆಯಿಂದ ತೆರಳುವ ಭಾರಿ ಗಾತ್ರದ ವಾಹನಗಳು ಹಳೇ ಬಸ್​​ ಸ್ಟ್ಯಾಂಡ್ - ಅಯೋಧ್ಯಾ ಹೋಟೆಲ್ ಮುಂದೆ ಹಾಯ್ದು, ಚನ್ನಮ್ಮ ಸರ್ಕಲ್, ಸಂಗೊಳ್ಳಿ ರಾಯಣ್ಣ ಸರ್ಕಲ್, ಪಿಂಟೋ ಸರ್ಕಲ್ ಮುಖಾಂತರ ಗದಗ ರಿಂಗ್​​​ ರೋಡ್​​ ಮೂಲಕ ಹೋಗಬೇಕು. ನವಲಗುಂದ, ವಿಜಯಪುರ ಕಡೆಯಿಂದ ಹುಬ್ಬಳ್ಳಿಗೆ ಬರುವ ಬಸ್‌ಗಳು ಸರ್ವೋದಯ ಸರ್ಕಲ್, ಕೆ.ಹೆಚ್. ಪಾಟೀಲ್ ರೋಡ್​​, ಶೃಂಗಾರ ಹೋಟೆಲ್ ಕ್ರಾಸ್​​ನಲ್ಲಿ ಎಡ ತಿರುವು ಪಡೆದು, ಮುಂದೆ ಗದಗ ರಸ್ತೆಗೆ ಬಂದು ತಲುಪಬಹುದು.

ಕೋರ್ಟ್​​​ ಸರ್ಕಲ್ ಕಡೆಯಿಂದ ಚನ್ನಮ್ಮ ಸರ್ಕಲ್​ಗೆ ಬರುವ ವಾಹನ ಸವಾರರು ಸಂಗೊಳ್ಳಿ ರಾಯಣ್ಣ ಸರ್ಕಲ್​ನಲ್ಲಿ ಎಡಕ್ಕೆ ತಿರುಗಿ, ಚಿಟಗುಪ್ಪಿ ಸರ್ಕಲ್‌ನಲ್ಲಿ ಯು-ಟರ್ಸ್​​​ ಪಡೆದು ಚನ್ನಮ್ಮ ಸರ್ಕಲ್ ಹತ್ತಿರ ಬರಬಹುದು. ಸರ್ವೋದಯ ಸರ್ಕಲ್ ಕಡೆಯಿಂದ ಕಾರವಾರ ರೋಡ್​​ ಕಡೆಗೆ ಹೋಗುವ ವಾಹನಗಳು ದೇಸಾಯಿ ಅಂಡರ್ ಬ್ರಿಡ್ಜ್​, ಬಾಳಿಗಾ ಕ್ರಾಸ್, ಉತ್ತರ ಸಂಚಾರ ಪೊಲೀಸ್​​ ಠಾಣೆ ಮುಂದೆ ಹಾಯ್ದು, ಗ್ಲಾಸ್ ಹೌಸ್ ರೋಡ್​​ ಮೂಲಕ ಕಾರವಾರ ರಸ್ತೆಗೆ ಬರಬಹುದು.

ನವಲಗುಂದ ಹಾಗೂ ಗದಗ ಕಡೆಯಿಂದ ಬರುವ ಭಾರಿ ಮತ್ತು ಸರಕು ವಾಹನಗಳು ಹುಬ್ಬಳ್ಳಿ ನಗರವನ್ನು ಪ್ರವೇಶಿಸದೆ, ರಿಂಗ್​​ ರೋಡ್​​ ಮೂಲಕ ಬೆಂಗಳೂರು ಹಾಗೂ ಕಾರವಾರ ಕಡೆಗೆ ಹೋಗಬೇಕು. ಹಾಗೆಯೇ, ಇದೇ ಮಾರ್ಗದಿಂದ ಹುಬ್ಬಳ್ಳಿಗೆ ಪ್ರವೇಶಿಸುವ ಭಾರಿ ಮತ್ತು ಸರಕು ವಾಹನಗಳು ರಿಂಗ್​​ ರೋಡ್​​​ ಮುಖಾಂತರ ಗಟ್ಟೂರು ಸರ್ಕಲ್‌ಗೆ ಹೋಗಿ, ಅಲ್ಲಿಂದ ಹಳೇ ಪಿಬಿ ರೋಡ್​​​ ಅಥವಾ ಕಾರವಾರ ರಸ್ತೆಗೆ ತಲುಪಬಹುದಾಗಿದೆ.

ಸಾರ್ವಜನಿಕರ ಹಿತದೃಷ್ಟಿಯಿಂದ ಈ ರೀತಿ ಬದಲಿ ವಾಹನ ಸಂಚಾರ ವ್ಯವಸ್ಥೆ ಮಾಡಲಾಗಿದ್ದು, ಸಹಕರಿಸುವಂತೆ ಸಂಚಾರ ಪೊಲೀಸರ ಪ್ರಕಟಣೆ ತಿಳಿಸಿದೆ.

ಇದನ್ನೂ ಓದಿ:ಇನ್ಮುಂದೆ ಬೆಂಗಳೂರನ್ನು 'ಟ್ರಾಫಿಕ್ ಸಿಟಿ' ಎನ್ನಬೇಡಿ; ಸಂಚಾರ ದಟ್ಟಣೆ ನಿಯಂತ್ರಣಕ್ಕೆ ಪೊಲೀಸರು ಕೈಗೊಂಡ ಕ್ರಮಗಳಿವು