ಮಹಿಳಾ ಟಿ-20 ವಿಶ್ವಕಪ್​: ಪಾಕಿಸ್ತಾನ ವಿರುದ್ಧ ಭಾರತ ವನಿತೆಯರಿಗೆ 6 ವಿಕೆಟ್​ ಗೆಲುವು - India Womens won against Pakistan

ದುಬೈನಲ್ಲಿ ನಡೆಯುತ್ತಿರುವ ಮಹಿಳಾ ವಿಶ್ವಕಪ್​​ನಲ್ಲಿ ಭಾರತ ತಂಡ ಮೊದಲ ಜಯದ ಸಿಹಿ ಅನುಭವಿಸಿದೆ.

ದುಬೈ:ಮೊದಲ ಪಂದ್ಯದಲ್ಲಿ ಸೋಲು ಕಂಡು ಟಿ-20 ವಿಶ್ವಕಪ್​​ನ ಗುಂಪು ಹಂತದಿಂದಲೇ ಹೊರಬೀಳುವ ಭೀತಿಯಲ್ಲಿದ್ದ ಭಾರತ ಇಂದು (ಭಾನುವಾರ) ನಡೆದ ಪಾಕಿಸ್ತಾನ ಮಹಿಳೆಯರ ವಿರುದ್ಧದ ಪಂದ್ಯದಲ್ಲಿ ಗೆದ್ದು ಟೂರ್ನಿಯಲ್ಲಿ ಮುಂದುವರೆದಿದೆ. ಮೊದಲ ಜಯದ ಮೂಲಕ ಸೆಮೀಸ್​ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದೆ.

ಟಾಸ್​​ ಗೆದ್ದು ಮೊದಲು ಬ್ಯಾಟ್​ ಮಾಡಿದ ಪಾಕಿಸ್ತಾನ ಮಹಿಳೆಯರು ಸಾಧಾರಣ ಬ್ಯಾಟಿಂಗ್​​ ಮಾಡಿ ನಿಗದಿತ 20 ಓವರ್​ಗಳಲ್ಲಿ 8 ವಿಕೆಟ್​ಗೆ 105 ರನ್​ ಗಳಿಸಿತು. ಗೆಲ್ಲುವ ಛಲದೊಂದಿಗೆ ಗುರಿ ಬೆನ್ನತ್ತಿದ ಭಾರತದ ಮಹಿಳೆಯರು ಶೆಫಾಲಿ ವರ್ಮಾ, ಜೆಮಿಮಾ ರೋಡ್ರಿಗ್ಸ್​​, ನಾಯಕಿ ಹರ್ಮನ್​​ಪ್ರೀತ್​​ ಕೌರ್​ ಅವರ ಉತ್ತಮ ಬ್ಯಾಟಿಂಗ್​ ನೆರವಿನಿಂದ 18.5 ಓವರ್​ಗೆ 4 ವಿಕೆಟ್​ ಕಳೆದುಕೊಂಡು ಜಯ ಸಾಧಿಸಿತು.

ಸಾಧಾರಣ ಗುರಿ ಇದ್ದರೂ ಭಾರತ ವನಿತೆಯರು ಉತ್ತಮ ಆರಂಭ ಪಡೆಯಲಿಲ್ಲ. ಶೆಫಾಲಿ ವರ್ಮಾ ಜೊತೆ ಇನಿಂಗ್ಸ್​​ ಆರಂಭಿಸಿದ ಉಪ ನಾಯಕಿ ಸ್ಮೃತಿ ಮಂಧನಾ 7 ರನ್​​ಗೆ ವಿಕೆಟ್​ ನೀಡಿದರು. ಈ ವೇಳೆ ತಂಡದ ಮೊತ್ತ 18 ಆಗಿತ್ತು. ಮೂರನೇ ಸ್ಥಾನಕ್ಕೆ ಬಡ್ತಿ ಪಡೆದ ಜೆಮಿಮಾ ರೋಡ್ರಿಗ್ಸ್​​, ಶೆಫಾಲಿ ಜೊತೆಗೂಡಿ ಎಚ್ಚರಿಕೆಯ ಆಟವಾಡಿದರು. ಇಬ್ಬರೂ ಸೇರಿ 43 ರನ್​ ಜೊತೆಯಾಟ ಆಡಿದರು.

ಶೆಫಾಲಿ 35 ಎಸೆತಗಳಲ್ಲಿ 32 ರನ್​ ಗಳಿಸಿ ಔಟಾದರು. ಜೆಮಿಮಾ 28 ಎಸೆತಗಳಲ್ಲಿ 23 ರನ್​ ಮಾಡಿದರು. 29 ರನ್​​ ಮಾಡಿದ್ದಾಗ ನಾಯಕಿ ಹರ್ಮನ್​​ಪ್ರೀತ್​​ ಕೌರ್​​ ಗೆಲುವಿನ ಕೊನೆಯಲ್ಲಿ ಗಾಯಕ್ಕೀಡಾದರು. ದೀಪ್ತಿ ಶರ್ಮಾ ಮತ್ತು ಸಂಜನಾ ಗೆಲುವಿನ ಶಾಸ್ತ್ರ ಮುಗಿಸಿದರು.

ಇದಕ್ಕೂ ಮೊದಲು ಬ್ಯಾಟ್​ ಮಾಡಿದ ಪಾಕಿಸ್ತಾನ ವನಿತೆಯರಿಗೆ ಅರುಂಧತಿ ರೆಡ್ಡಿ ಮತ್ತು ಶ್ರೇಯಾಂಕ ಪಾಟೀಲ್​​ ಬಿಗಿ ದಾಳಿ ಸವಾಲಾಯಿತು. ಮುನೀಬಾ ಅಲಿ 17, ಹಿರಿಯ ಆಟಗಾರ್ತಿ ನಿದಾ ದಾರ್​ 28, ನಾಯಕಿ ಫಾತಿಮಾ ಸನಾ 13, ಸೈಯದ್​​ ಅರೂಬ್​​ ಶಾ 14 ರನ್​ ಗಳಿಸಿದರು. ಭಾರತದ ಬೌಲಿಂಗ್​ ಪಡೆಯ ದಾಳಿಗೆ ಸಿಲುಕಿದ ಪಾಕ್​ ರನ್​ ಗಳಿಸಲು ಪರದಾಡಿತು. ಅರುಂಧತಿ 3, ಶ್ರೇಯಾಂಕಾ 2 ವಿಕೆಟ್​ ಪಡೆದರು.

ಖಾತೆ ತೆರೆದ ಭಾರತ:ಎ ಗುಂಪಿನಲ್ಲಿ ಸ್ಥಾನ ಪಡೆದಿರುವ ಭಾರತದ ವನಿತೆಯರು 2 ಪಂದ್ಯ ಆಡಿದ್ದು, ಪಾಕ್​ ವಿರುದ್ಧದ ಗೆಲುವಿನ ಮೂಲಕ ಖಾತೆ ತೆರೆದಿದೆ. ಮೊದಲ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್​ ಎದುರು ಭಾರೀ ಅಂತರದಲ್ಲಿ ಸೋಲು ಕಂಡು ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿತ್ತು. ಪಟ್ಟಿಯಲ್ಲಿ ಆಸ್ಟ್ರೇಲಿಯಾ, ಪಾಕಿಸ್ತಾನ, ಶ್ರೀಲಂಕಾ, ನ್ಯೂಜಿಲ್ಯಾಂಡ್​​ನಂತಹ ದೈತ್ಯ ತಂಡಗಳ ಜೊತೆ ಸ್ಥಾನ ಪಡೆದಿತ್ತು. 2 ಅಂಕಗಳೊಂದಿಗೆ 4ನೇ ಸ್ಥಾನದಲ್ಲಿದೆ.

ಪಾಕ್​ ವಿರುದ್ಧ ಗೆಲುವಿನ ಯಾತ್ರೆ:ಭಾರತ ಮತ್ತು ಪಾಕಿಸ್ತಾನ ಮಹಿಳೆಯರು ಈವರೆಗೆ ಟಿ-20 ವಿಶ್ವಕಪ್​​ನಲ್ಲಿ 9 ಬಾರಿ ಮುಖಾಮುಖಿಯಾಗಿದ್ದಾರೆ. ಇದರಲ್ಲಿ ಭಾರತ 6 ಬಾರಿ, ಪಾಕಿಸ್ತಾನ 2 ಬಾರಿ ಗೆಲುವು ಸಾಧಿಸಿ ಪ್ರಾಬಲ್ಯ ಮುಂದುವರಿಸಿವೆ.

ಇದನ್ನೂ ಓದಿ;ಮಹಿಳಾ ಟಿ20 ವಿಶ್ವಕಪ್​: ಇಂದು ಭಾರತ-ಪಾಕ್​​ ಮ್ಯಾಚ್; ಸಮಯ, ನೇರಪ್ರಸಾರದ ಮಾಹಿತಿ - India vs Pakistan Match