17 ವರ್ಷಗಳಲ್ಲಿ ಐಪಿಎಲ್​ ಫ್ರಾಂಚೈಸಿಗಳ ಪರ್ಸ್​ ಮಿತಿ ಶೇಕಡಾ 600ರಷ್ಟು ಹೆಚ್ಚಳ: ಮೊದಲ ಋತುವಿನಲ್ಲಿ ಎಷ್ಟಿತ್ತು, ಈಗ ಎಷ್ಟಾಗಿದೆ ಗೊತ್ತಾ? - IPL franchises purse limit increase

ಐಪಿಎಲ್​ ಫ್ರಾಂಚೈಸಿಗಳ ಪರ್ಸ್​ಮಿತಿ ಕಳೆದ 17 ವರ್ಷಗಳಲ್ಲಿ ಶೇ.600ರಷ್ಟು ಏರಿಕೆಯಾಗಿದೆ. ಮೊದಲ ಋತುವಿನಲ್ಲಿ ಮಿತಿ ಎಷ್ಟಿತ್ತು ನಂತರ ಹಂತಹಂತವಾಗಿ ಹೇಗೆ ಹೆಚ್ಚಾಗುತ್ತ ಬಂತು ಎಂದು ಈ ಸುದ್ದಿಯಲ್ಲಿ ತಿಳಿಯಿರಿ.

ಹೈದರಾಬಾದ್​:ಮಿಲಿಯನ್​ ಡಾಲರ್​ ಕ್ರಿಕೆಟ್​ ಎಂದೇ ಪ್ರಸಿದ್ದಿ ಪಡೆದಿರುವ ಐಪಿಎಲ್​ ದೇಶ ಮಾತ್ರವಲ್ಲದೇ ವಿಶ್ವಮಟ್ಟದಲ್ಲೂ ಖ್ಯಾತಿ ಪಡೆದುಕೊಂಡಿದೆ. ಈ ಟೂರ್ನಿಯಲ್ಲಿ ಆಡಬೇಕೆಂಬುದು ಪ್ರತಿಯೊಬ್ಬ ಆಟಗಾರರ ಆಸೆಯೂ ಆಗಿರುತ್ತದೆ. ಒಂದೊಮ್ಮೆ ಆಟಗಾರರು ಈ ಟೂರ್ನಿಯಲ್ಲಿ ಕ್ಲಿಕ್​ ಆದರೇ ಅವರಿಗೆ ನೇಮ್​ ಮತ್ತು ಫೇಮ್​ ಜತೆಗೆ ಕೈತುಂಬ ಹಣ ಕೂಡ ಬರುತ್ತದೆ. ಹಾಗಾಗಿ ಈ ಟೂರ್ನಿಯನ್ನು ಆಡಲು ದೇಶಿಯರು ಮಾತ್ರವಲ್ಲದೇ ವಿದೇಶಿ ಆಟಗಾರರು ಆಸಕ್ತಿ ತೋರಿಸುತ್ತಾರೆ.

2008ರಲ್ಲಿ ಪ್ರಾರಂಭವಾದ ಈ ಮಹಾ ಟೂರ್ನಿ ಇದೂವರೆಗೆ ಶಯಸ್ವಿಯಾಗಿ 17 ಋತುಗಳನ್ನು ಪೂರ್ಣಗೊಳಿಸಿದೆ. ಮತ್ತೊಂದೆಡೆ ವರ್ಷಗಳು ಉರುಳಿದಂತೆ ಫ್ರಾಂಚೈಸಿಗಳ ಪರ್ಸ್​ ಮಿತಿಯೂ ಕೂಡ ಹೆಚ್ಚಳವಾಗುತ್ತಿದೆ. ಈ ಹಿಂದೆ ಐಪಿಎಲ್‌ನ ಉದ್ಘಾಟನಾ ಋತುವಿನಲ್ಲಿ ಪ್ರತಿ ಫ್ರಾಂಚೈಸಿ 22.5 ಕೋಟಿಗಳ ಪರ್ಸ್​ ಮಿತಿಯನ್ನು ಹೊಂದಿತ್ತು. ಇದೀಗ ಇದರ ಮಿತಿ 120 ಕೋಟಿ ರೂ.ಗೆ ಬಂದು ನಿಂತಿದೆ. ಅಂದರೆ 17 ವರ್ಷಗಳಲ್ಲಿ ಸುಮಾರು 600 ಪ್ರತಿಶತದಷ್ಟು ಹೆಚ್ಚಾಗಿದೆ. ಹಾಗಾದ್ರೆ ಬನ್ನಿ ಯಾವ ವರ್ಷದಲ್ಲಿ ಪರ್ಸ್​ ಮಿತಿ ಹೆಚ್ಚಾಗುತ್ತ ಬಂದಿದೆ ಎಂದು ಈ ಸುದ್ದಿಯಲ್ಲಿ ತಿಳಿದುಕೊಳ್ಳೋಣ.

ಪರ್ಸ್​ ಮಿತಿ ಹೆಚ್ಚಳ:2008ರಲ್ಲಿ ಆಟಗಾರರನ್ನು ಖರೀದಿಸಲು ಐಪಿಎಲ್ ಫ್ರಾಂಚೈಸಿಗಳು 22.5 ಕೋಟಿ ರೂ ಪರ್ಸ್​ ಮಿತಿಯನ್ನು ಹೊಂದಿದ್ದವು. ಆ ನಂತರ 2011ರ ವೇಳೆಗೆ ಇದು ರೂ.43.2 ಕೋಟಿಗೆ ಏರಿಕೆಯಾಗಿದೆ. ಅಂದರೆ ದ್ವಿಗುಣಗೊಂಡಿದೆ. ಅಲ್ಲದೆ, 2014ರ ವೇಳೆಗೆ ಆ ಮಿತಿ 60 ಕೋಟಿ ರೂಗೆ ತಲುಪಿದ್ದು 2018ಕ್ಕೆ 80 ಕೋಟಿ ಮತ್ತು 2022ಕ್ಕೆ ರೂ.90 ಕೋಟಿಗೆ ಬಂದು ನಿಂತಿದೆ. ಇನ್ನು ಮುಂದಿನ ವರ್ಷ ನಡೆಲಿರುವ 18ನೇ ಆವೃತ್ತಿಯ ಐಪಿಎಲ್ ಸೀಸನ್​ಗೆ ತಲಾ ಫ್ರಾಂಚೈಸಿಗಳ ಮಿತಿ 120 ಕೋಟಿ ರೂ.ಗೆ ಏರಿಕೆಯಾಗಿದೆ. ಅಂದರೆ ಆರಂಭಿಕ ಋತುವಿನಿಂದ ಇದು ಸುಮಾರು 600 ಪಟ್ಟು ಹೆಚ್ಚಳಗೊಂಡಿದೆ.

ಇತ್ತೀಚೆಗೆ 2025ರ ಆಟಗಾರರ ಮೆಗಾ ಹರಾಜು ಪ್ರಕ್ರಿಯೆಗೆ ಸಂಬಂಧಿಸಿದಂತೆ ಐಪಿಎಲ್ ಆಡಳಿತ ಮಂಡಳಿಯು ರಿಟೇನ್​ ನಿಯಮಗಳನ್ನು ಪ್ರಸ್ತಾಪಿಸಿದೆ. ಈ ನೂತನ ನಿಯಮದ ಪ್ರಕಾರ ಪ್ರತಿ ಫ್ರಾಂಚೈಸಿಗಳು ತಮ್ಮ ತಂಡದಿಂದ ಆರು ಆಟಗಾರರನ್ನು ಉಳಿಸಿಕೊಳ್ಳಲು ಅನುಮತಿ ನೀಡಿದೆ. ಜತೆಗೆ ರೈಟ್ ಟು ಮ್ಯಾಚ್ (ಆರ್‌ಟಿಎಂ) ಕಾರ್ಡ್​ ಬಳಸಿಯೂ ಆಟಗಾರರನ್ನು ಮರಳಿ ತಂಡಕ್ಕೆ ಕರೆದುಕೊಳ್ಳಬಹುದಾಗಿದೆ. ರಿಟೇನ್​ ಮಾಡಿಕೊಳ್ಳಲು ಆಟಗಾರರಿಗೆ ಹಣವನ್ನು ಕೂಡ ನಿಗದಿ ಪಡಿಸಿದೆ. ತಂಡದ ಬಳಿ ಪರ್ಸ್​ ಮೊತ್ತ 120 ಕೋಟಿ ಆಗಿದ್ದರೆ, ಐದು ಆಟಗಾರರನ್ನು ರಿಟೇನ್​ ಮಾಡಿಕೊಳ್ಳಲು 75 ಕೋಟಿ ರೂ. ವ್ಯಯಿಸಬೇಕಾಗಿದೆ. ಈ ಹಿಂದೆ 2022ರಲ್ಲಿ ನಡೆದೆ ಮೆಗಾ ಹರಾಜಿನಲ್ಲಿ ಆಯಾ ತಂಡಗಳು ಕೇವಲ ನಾಲ್ಕು ಆಟಗಾರರನ್ನು ಉಳಿಸಿಕೊಳ್ಳಲು ಅವಕಾಶ ನೀಡಲಾಗಿತ್ತು. ಈ ಬಾರಿ ಈ ಸಂಖ್ಯೆ ಆರಕ್ಕೆ ಏರಿಕಿಯಾಗಿದೆ.

ಐವರೂ ರಿಟೇನ್​ಗೆ 75 ಕೋಟಿ ರೂ:ಐಪಿಎಲ್ ಆಡಳಿತ ಮಂಡಳಿ ನಿಯಮಗಳ ಪ್ರಕಾರ ಫ್ರಾಂಚೈಸಿಗಳು ಐವರು ಆಟಗಾರರನ್ನು ರಿಟೇನ್​ ಮಾಡಿಕೊಳ್ಳಲು ಬಯಸಿದರೇ ಮೊದಲ ಆಟಗಾರನಿಗೆ 18 ಕೋಟಿ ರೂ., ಎರಡನೇ ಆಟಗಾರನಿಗೆ ರೂ.14 ಕೋಟಿ, ಮೂರನೇ ಆಟಗಾರನಿಗೆ ರೂ.11 ಕೋಟಿ ಪಾವತಿಸಬೇಕಾಗುತ್ತದೆ. ನಾಲ್ಕು ಮತ್ತು ಐದನೇ ಆಟಗಾರರನ್ನು ರಿಟೇನ್​ ಮಾಡಿಕೊಳ್ಳಬೇಕಾದರೇ ಕ್ರಮವಾಗಿ 18 ಮತ್ತು 14 ಕೋಟಿ ವ್ಯಯಿಸಬೇಕಾಗುತ್ತದೆ. ಉಳಿದ 45 ಕೋಟಿ ರೂಗಳಲ್ಲಿ ಮಿಕ್ಕ ಆಟಗಾರರನ್ನು ಖರೀದಿಸಬೇಕಾಗುತ್ತದೆ.

ಇದನ್ನೂ ಓದಿ:ಇಂದಿನಿಂದ ಅರಬ್ಬರ ನಾಡಲ್ಲಿ ಮಹಿಳಾ ಟಿ20 ವಿಶ್ವಕಪ್​ ಕಲರವ: ಭಾರತದ ಮೊದಲ ಪಂದ್ಯ ಯಾರ ವಿರುದ್ಧ ಗೊತ್ತಾ? - Womens T20 World Cup