28 ವರ್ಷದ ಜೋರ್ಡಾನ್ ಬಾರ್ಡೆಲ್ಲಾ ಫ್ರಾನ್ಸ್ನ ನೂತನ ಪ್ರಧಾನಿಯಾಗುವ ರೇಸ್ನಲ್ಲಿ ಮುಂಚೂಣಿಯಲ್ಲಿದ್ದಾರೆ. ಬಲಪಂಥೀಯ ಪಕ್ಷವಾದ ನ್ಯಾಷನಲ್ ರ್ಯಾಲಿಯು ಫ್ರಾನ್ಸ್ನ ಅತಿದೊಡ್ಡ ರಾಜಕೀಯ ಶಕ್ತಿಯಾಗಲು ಅವರ ಶ್ರಮ ಅಪಾರವಾಗಿದೆ. ಕಾಲೇಜು ಶಿಕ್ಷಣವನ್ನು ಅರ್ಧದಲ್ಲೇ ಬಿಟ್ಟ ಬಾರ್ಡೆಲ್ಲಾ ಸಂಭಾವ್ಯ ಪ್ರಧಾನ ಮಂತ್ರಿಯಾಗಿ ಗುರುತಿಸಿಕೊಂಡಿದ್ದು, ಅನೇಕರಿಗೆ ಆಶ್ಚರ್ಯವನ್ನುಂಟು ಮಾಡಿದೆ.
ಬಾರ್ಡೆಲ್ಲಾ ಅವರ ಆರಂಭಿಕ ಜೀವನ ಮತ್ತು ಶಿಕ್ಷಣ: ಬಾರ್ಡೆಲ್ಲಾ 1995 ರಲ್ಲಿ ಉತ್ತರ ಪ್ಯಾರಿಸ್ನ ಉಪನಗರ ಸೀನ್ - ಸೇಂಟ್ - ಡೆನಿಸ್ನಲ್ಲಿ ಜನಿಸಿದರು. ಇವರ ತಂದೆ ಅಲ್ಜೀರಿಯನ್ ಮೂಲ ಹೊಂದಿರುವ ಇಟಾಲಿಯನ್ ಆಗಿದ್ದಾರೆ. ಬಾರ್ಡೆಲ್ಲಾ ಅವರನ್ನು ಅವರ ತಾಯಿಯೇ ಸಾಕಿ ಬೆಳೆಸಿದರು. ಬಾರ್ಡೆಲ್ಲಾ ಲೈಸಿ ಸೇಂಟ್-ಜೀನ್-ಬ್ಯಾಪ್ಟಿಸ್ಟ್-ಡಿ-ಲಾ-ಸಾಲೆ ಎಂಬ ಖಾಸಗಿ ಶಾಲೆಗೆ ಸೇರಿದರು. ಶಾಲಾ ಶಿಕ್ಷಣದ ವೆಚ್ಚವನ್ನು ತಂದೆಯೇ ಭರಿಸುತ್ತಿದ್ದರು. ಆದರೆ ಬಾರ್ಡೆಲ್ಲಾ ವಿಶ್ವವಿದ್ಯಾಲಯ ಪದವಿ ಪಡೆದಿಲ್ಲ.
ಪ್ಯಾರಿಸ್-ಸೊರ್ಬೊನ್ ವಿಶ್ವವಿದ್ಯಾಲಯದಲ್ಲಿ ಭೂಗೋಳಶಾಸ್ತ್ರ ಕಲಿಯುತ್ತಿರುವಾಗ ಅವರು ರಾಜಕೀಯ ಸೇರಲು ಕಾಲೇಜಿನಿಂದ ಹೊರಬಿದ್ದರು. ಬಾರ್ಡೆಲ್ಲಾ ತಾನು ಬಾಲ್ಯ ಕಳೆದ ಉಪನಗರವನ್ನು ಆಕ್ರಮಣಕಾರಿ ಎಂದು ಚಿತ್ರಿಸಲು ಪ್ರಯತ್ನಿಸಿದ್ದಾರೆ. ಜಿಲ್ಲೆಯ ಹೆಚ್ಚಿನ ಸಂಖ್ಯೆಯ ವಲಸಿಗರು ಮತ್ತು ನಿರಾಶ್ರಿತರನ್ನು ಟೀಕಿಸುತ್ತ ರಾಜಕೀಯ ಗಣ್ಯರೊಂದಿಗೆ ತಮ್ಮನ್ನು ಹೋಲಿಸಿಕೊಂಡಿದ್ದಾರೆ.
ರಾಜಕೀಯ ಪ್ರವೇಶ: ಬರಹಗಾರ ಪಿಯರೆ-ಸ್ಟೀಫನ್ ಫೋರ್ಟ್ ಅವರ ವಿವರಣೆಯ ಪ್ರಕಾರ, ಬಾರ್ಡೆಲ್ಲಾ 2012 ರಲ್ಲಿ 16 ನೇ ವಯಸ್ಸಿನಲ್ಲಿ ಆರ್ಎನ್ ಪಕ್ಷಕ್ಕೆ ಸೇರಿದರು. 2014 ರಲ್ಲಿ, ಅವರನ್ನು ಸೀನ್-ಸೇಂಟ್-ಡೆನಿಸ್ ಪ್ರದೇಶದ ಪಕ್ಷದ ಪ್ರತಿನಿಧಿಯಾಗಿ ನೇಮಿಸಲಾಯಿತು. ಪಕ್ಷದ ಸಹವರ್ತಿ ಮತ್ತು ಮಾಜಿ ಸಹೋದ್ಯೋಗಿ, ಸ್ಥಳೀಯ ಕೌನ್ಸಿಲರ್ ಮ್ಯಾಕ್ಸೆನ್ಸ್ ಬುಟ್ಟೆ ಅವರು ತಾನು ಇಸ್ಲಾಂಗೆ ಮತಾಂತರಗೊಂಡಿದ್ದೇನೆ ಎಂದು ಸಾರ್ವಜನಿಕವಾಗಿ ಘೋಷಿಸಿದ ನಂತರ, ಬುಟ್ಟೆ ಅವರನ್ನು ಬಾರ್ಡೆಲ್ಲಾ ಪಕ್ಷದಿಂದ ಅಮಾನತುಗೊಳಿಸಿದ್ದರು. ಈ ಕ್ರಮದಿಂದ ಅವರಿಗೆ ರಾಜಕೀಯವಾಗಿ ಜನಪ್ರಿಯತೆ ಸಿಗುವಂತಾಯಿತು.
17 ನೇ ವಯಸ್ಸಿಗೆ ಪಕ್ಷ ಸೇರಿದ ನಂತರ ಅವರು 21 ನೇ ವಯಸ್ಸಿನಲ್ಲಿ ಪಕ್ಷದ ವಕ್ತಾರರಾಗಿ ಮತ್ತು ಉಪಾಧ್ಯಕ್ಷರಾಗಿ ನೇಮಕವಾಗುವ ಮೊದಲು ಅದರ ಯುವ ಘಟಕದ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಿದರು ಮತ್ತು 2019 ರಲ್ಲಿ ಇತಿಹಾಸದಲ್ಲಿ ಯುರೋಪಿಯನ್ ಸಂಸತ್ತಿನ ಎರಡನೇ ಕಿರಿಯ ಸದಸ್ಯರಾದರು.