2024ರ ಬಹು ನಿರೀಕ್ಷಿತ ಚಿತ್ರ 'ಫ್ಯಾಮಿಲಿ ಸ್ಟಾರ್'ನ ಅಧಿಕೃತ ಟ್ರೇಲರ್ ಕೊನೆಗೂ ಹೊರಬಿದ್ದಿದ್ದು, ಸಿನಿಪ್ರಿಯರ ಕಾತರ ಅಂತ್ಯಗೊಂಡಿದೆ. ಪರಶುರಾಮ್ ಪೇಟ್ಲ ನಿರ್ದೇಶನದ 'ಫ್ಯಾಮಿಲಿ ಸ್ಟಾರ್' ಚಿತ್ರದಲ್ಲಿ ವಿಜಯ್ ದೇವರಕೊಂಡ ಮತ್ತು ಮೃಣಾಲ್ ಠಾಕೂರ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರ ಬರುವ ತಿಂಗಳು ಏಪ್ರಿಲ್ 5ರಂದು ಚಿತ್ರಮಂದಿರ ಪ್ರವೇಶಿಸಲಿದ್ದು, ಇಂದು ಅನಾವರಣಗೊಂಡಿರುವ ಟ್ರೇಲರ್ ಪ್ರೇಕ್ಷಕರ ಕುತೂಹಲ ಹೆಚ್ಚಿಸಿದೆ.
ಚಿತ್ರದಲ್ಲಿ ವಿಜಯ್ ದೇವರಕೊಂಡ ಫ್ಯಾಮಿಲಿ ಮ್ಯಾನ್ ಆಗಿ ಕಾಣಿಸಿಕೊಂಡಿದ್ದಾರೆ. ತಮ್ಮ ಕುಟುಂಬಕ್ಕೆ ತೊಂದರೆಯಾದರೆ, ಹಿಂಸಾಚಾರಕ್ಕೆ ತಿರುಗುವ ವರ್ಕಿಂಗ್ ಕ್ಲಾಸ್ ಹೀರೋ ಪಾತ್ರದಲ್ಲಿ ವಿಜಯ್ ನಟಿಸಿದ್ದಾರೆ. 2 ನಿಮಿಷ 26 ಸೆಕೆಂಡ್‌ಗಳ ಈ ಟ್ರೇಲರ್ ನಾಯಕ ನಟ ವಿಜಯ್ ದೇವರಕೊಂಡ ಹೋರಾಟದ ಸುತ್ತ ಸುತ್ತುತ್ತದೆ. ನಾಯಕಿ ಮೃಣಾಲ್ ಠಾಕೂರ್ ಅವರನ್ನು ಓಲೈಸುವ ಪ್ರಯತ್ನ ಈ ಟ್ರೇಲರ್ನಲ್ಲಿದೆ. ಇದೇ ಮೊದಲ ಬಾರಿಗೆ ವಿಜಯ್, ಮೃಣಾಲ್ ತೆರೆ ಹಂಚಿಕೊಂಡಿದ್ದು, ಪ್ರೇಕ್ಷಕರು ಸಿನಿಮಾ ನೋಡುವ ಕುತೂಹಲ ವ್ಯಕ್ತಪಡಿಸಿದ್ದಾರೆ.
ಈ ಹಿಂದೆ ಬಿಡುಗಡೆ ಆಗಿರುವ ನಂದನದನ, ಕಲ್ಯಾಣಿ ವಚ್ಚಾ ವಚ್ಚಾ ಮತ್ತು ಮಧುರಮು ಕಾಧ ಹಾಡುಗಳು ಸಿನಿಮಾ ಸುತ್ತಲಿರುವ ಕುತೂಹಲ, ನಿರೀಕ್ಷೆಗಳನ್ನು ಹೆಚ್ಚಿಸಿದೆ. ಇದೀಗ ಬಿಡುಗಡೆ ಆಗಿರುವ ಟ್ರೇಲರ್ ಸಿನಿಮಾ ಸುತ್ತಲಿನ ಕ್ರೇಜ್ ಹೆಚ್ಚಿಸಿದೆ. ಫ್ಯಾಮಿಲಿ ಡ್ರಾಮಾದ ಈ ಟ್ರೇಲರ್ ಆ್ಯಕ್ಷನ್, ಡ್ರಾಮಾ, ಹಾಸ್ಯ ಮತ್ತು ರೊಮ್ಯಾನ್ಸ್ ಎಲ್ಲವನ್ನೂ ಒಳಗೊಂಡಿದೆ.
ವಿಜಯ್ ದೇವರಕೊಂಡ ಮತ್ತು ಪರಶುರಾಮ್ ಪೇಟ್ಲ ಕಾಂಬಿನೇಶನ್ನ ಎರಡನೇ ಸಿನಿಮಾವಿದು. 2018ರಲ್ಲಿ ಬಂದ ಗೀತ ಗೋವಿಂದಂ ಚಿತ್ರದಲ್ಲಿ ಮೊದಲ ಬಾರಿ ಕೈ ಜೋಡಿಸಿದ್ದರು. ಫ್ಯಾಮಿಲಿ ಸ್ಟಾರ್ ಚಿತ್ರದಲ್ಲಿ ರಶ್ಮಿಕಾ ಮಂದಣ್ಣ ಕೂಡ ನಟಿಸಿದ್ದಾರೆ. ಗೀತ ಗೋವಿಂದಂನಲ್ಲಿ ವಿಜಯ್ಗೆ ಜೋಡಿಯಾಗಿದ್ದ ರಶ್ಮಿಕಾ ಈ ಚಿತ್ರದಲ್ಲಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.