ಮೇ 5ಕ್ಕೆ NEET ಎಕ್ಸಾಂ: ಪರೀಕ್ಷಾ ಕೇಂದ್ರಗಳಿರುವ ನಗರಗಳ ಮಾಹಿತಿ ಬಿಡುಗಡೆ ಮಾಡಿದ NTA - NEET UG exam

NEET UG exam city information slip: ವೈದ್ಯಕೀಯ ಪ್ರವೇಶ ಪರೀಕ್ಷೆ ರಾಷ್ಟ್ರೀಯ ಅರ್ಹತೆ ಮತ್ತು ಪ್ರವೇಶ ಪರೀಕ್ಷೆ (NEET) ಮೇ 5 ರಂದು ನಡೆಯಲಿದೆ. ಇದಕ್ಕಾಗಿ ರಾಷ್ಟ್ರೀಯ ಪರೀಕ್ಷಾ ಏಜೆನ್ಸಿ ಬುಧವಾರ ನಗರಗಳ ಮಾಹಿತಿ ಸ್ಲಿಪ್ ಅನ್ನು ಬಿಡುಗಡೆ ಮಾಡಿದೆ.

ಕೋಟಾ (ರಾಜಸ್ಥಾನ):ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್‌ಟಿಎ) ದೇಶದ ಅತಿದೊಡ್ಡ ವೈದ್ಯಕೀಯ ಪ್ರವೇಶ ಪರೀಕ್ಷೆಯಾದ ರಾಷ್ಟ್ರೀಯ ಅರ್ಹತೆ ಮತ್ತು ಪ್ರವೇಶ ಪರೀಕ್ಷೆಯನ್ನು (ಎನ್‌ಇಇಟಿ) ಮೇ 5 ರಂದು ಆಯೋಜಿಸಲಿದೆ. ಈ ಪರೀಕ್ಷೆಗಾಗಿ ಸುಮಾರು 26 ಲಕ್ಷ ಅಭ್ಯರ್ಥಿಗಳು ಆನ್‌ಲೈನ್ ಅರ್ಜಿಯಲ್ಲಿ ನೋಂದಾಯಿಸಿಕೊಂಡಿದ್ದಾರೆ. ಒನ್ ನೇಷನ್ ಒನ್ ಎಕ್ಸಾಂ ಎಂಬ ವಿಷಯದ ಮೇಲೆ ಆಯೋಜಿಸಲಾಗುವ ಈ ಪರೀಕ್ಷೆಯನ್ನು ದೇಶ ಮತ್ತು ವಿದೇಶಗಳ 569 ನಗರಗಳಲ್ಲಿ ಸುಮಾರು 5000 ಪರೀಕ್ಷಾ ಕೇಂದ್ರಗಳಲ್ಲಿ ನಡೆಸಲಾಗುತ್ತದೆ. ಇದಕ್ಕಾಗಿ ರಾಷ್ಟ್ರೀಯ ಪರೀಕ್ಷಾ ಏಜೆನ್ಸಿಯು ಇಂದು ನಗರಗಳ ಮಾಹಿತಿಯನ್ನು ಬಿಡುಗಡೆ ಮಾಡಿದ್ದು, ಅದರ ಮೂಲಕ ವಿದ್ಯಾರ್ಥಿಗಳಿಗೆ ಅವರ ಪರೀಕ್ಷಾ ನಗರಗಳನ್ನು ನಿಗದಿಪಡಿಸಲಾಗಿದೆ. ಇದರ ಆಧಾರದ ಮೇಲೆ ಅಭ್ಯರ್ಥಿಗಳು ತಮ್ಮ ಪರೀಕ್ಷಾ ನಗರವನ್ನು ತಲುಪಲು ಟಿಕೆಟ್​ ಬುಕ್ಕಿಂಗ್​ ಮತ್ತು ಪ್ರಯಾಣದ ಯೋಜನೆಗಳನ್ನು ಮಾಡಲು ಇದರಿಂದ ಸಾಧ್ಯವಾಗುತ್ತದೆ.

ಪರೀಕ್ಷೆಗೆ 2 ದಿನಗಳ ಮೊದಲು ಅಭ್ಯರ್ಥಿಗಳಿಗೆ ಪ್ರವೇಶ ಪತ್ರಗಳನ್ನು ನೀಡಲಾಗುವುದು. ಸದ್ಯ ಅವರಿಗೆ ಪರೀಕ್ಷಾ ಕೇಂದ್ರದ ಮಾಹಿತಿ ನೀಡಿಲ್ಲ. ಪರೀಕ್ಷಾ ನಗರದ ಮಾಹಿತಿ ಮಾತ್ರ ನೀಡಲಾಗಿದೆ. ಅಭ್ಯರ್ಥಿಗಳು ತಮ್ಮ ನಗರದ ಮಾಹಿತಿ ಸ್ಲಿಪ್ ಅನ್ನು NEET UG 2024 https://exams.nta.ac.in/NEET ನ ಅಧಿಕೃತ ವೆಬ್‌ಸೈಟ್‌ನಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದಾಗಿದೆ. ಇದಕ್ಕಾಗಿ ಅವರು ಅಪ್ಲಿಕೇಶನ್ ಸಂಖ್ಯೆ, ಜನ್ಮ ದಿನಾಂಕ ಮತ್ತು ಭದ್ರತಾ ಪಿನ್ ಅನ್ನು ನಮೂದಿಸಬೇಕಾಗುತ್ತದೆ ಎಂದು ಶಿಕ್ಷಣ ತಜ್ಞ ದೇವ್ ಶರ್ಮಾ ತಿಳಿಸಿದ್ದಾರೆ.

ಈ ಪರೀಕ್ಷೆಯನ್ನು ಭಾರತದ 544 ನಗರಗಳಲ್ಲಿ ಮತ್ತು 12 ಇತರ ದೇಶಗಳ 14 ನಗರಗಳಲ್ಲಿ ನಡೆಸಲಾಗುತ್ತಿದೆ. ಪರೀಕ್ಷೆ ಮೇ 5 ರಂದು ಮಧ್ಯಾಹ್ನ 3 ರಿಂದ 5:20 ರವರೆಗೆ ನಡೆಯಲಿದೆ. ಪೆನ್ ಪೇಪರ್ ಮೋಡ್‌ನಲ್ಲಿ ನಡೆಸಲಾಗುವುದು. ಪರೀಕ್ಷೆಯು ಅಸ್ಸಾಮಿ, ಬೆಂಗಾಲಿ, ಇಂಗ್ಲಿಷ್, ಗುಜರಾತಿ, ಹಿಂದಿ, ಕನ್ನಡ, ಮಲಯಾಳಂ, ಮರಾಠಿ, ಒರಿಯಾ, ಪಂಜಾಬಿ, ತಮಿಳು, ತೆಲುಗು ಮತ್ತು ಉರ್ದು ಮಾಧ್ಯಮವನ್ನು ಒಳಗೊಂಡಂತೆ 13 ಭಾಷೆಗಳಲ್ಲಿ ನಡೆಯಲಿದೆ. ಈ ಪರೀಕ್ಷೆಯ ಮೂಲಕ ದೇಶದ MBBS, ಡೆಂಟಲ್, BHMS, BAMS, BUMS, BSMS ಮತ್ತು B.Sc ನರ್ಸಿಂಗ್ ಕೋರ್ಸ್‌ಗಳಿಗೆ ಪ್ರವೇಶ ಪಡೆಯಬಹುದು.

ನೋಂದಣಿ ಮಾಡಿಕೊಂಡರವ ಸಂಖ್ಯೆ 26 ಲಕ್ಷ: ಕಳೆದ ವರ್ಷ 2023 ರಲ್ಲಿ 20,38,596 ವಿದ್ಯಾರ್ಥಿಗಳು ನೀಟ್ ಯುಜಿಗೆ ಹಾಜರಾಗಿದ್ದರು. ಈ ಪೈಕಿ 11,45,976 ವಿದ್ಯಾರ್ಥಿಗಳು ಕೌನ್ಸೆಲಿಂಗ್‌ಗೆ ಅರ್ಹತೆ ಪಡೆದಿದ್ದರು. ಆಗ ವಿದ್ಯಾರ್ಥಿಗಳು 1,07,000 MBBS ಸೀಟುಗಳಿಗೆ ಪ್ರವೇಶ ಪಡೆದಿದ್ದರು. ಆದರೆ ಈ ಬಾರಿ NEET ಯುಜಿ ನೋಂದಣಿ ಸಂಖ್ಯೆ ಸುಮಾರು 26 ಲಕ್ಷ ತಲುಪಿದೆ. ಪರೀಕ್ಷೆಗೆ ಹಾಜರಾಗುವ ವಿದ್ಯಾರ್ಥಿಗಳ ಸಂಖ್ಯೆ 24 ಲಕ್ಷಕ್ಕೂ ಹೆಚ್ಚು. ಅರ್ಹ ವಿದ್ಯಾರ್ಥಿಗಳ ಸಂಖ್ಯೆಯೂ 12 ಲಕ್ಷ ದಾಟಲಿದೆ. ಅಂತಹ ಪರಿಸ್ಥಿತಿಯಲ್ಲಿ, ಎಂಬಿಬಿಎಸ್ ಸೀಟುಗಳ ಸಂಖ್ಯೆ 1,12,000 ಕ್ಕಿಂತ ಹೆಚ್ಚಾಗಬಹುದಾಗಿದೆ.

ಓದಿ:ಹೃದಯ ಬಡಿತದ ಬದಲಾವಣೆಯನ್ನು ಅರ್ಧ ಗಂಟೆ ಮುಂಚಿತವಾಗೇ ಅಂದಾಜು ಮಾಡುತ್ತೆ AI ವಾರ್ನ್​ - WARN PREDICTS IRREGULAR HEARTBEAT