এম ভি সপ্তেশ্বৰী ফেৰী
যোৰহাট, ৪ মাৰ্চ:পুনৰ ব্ৰহ্মপুত্ৰৰ বুকত অঘটন । এইবাৰ ৰিলছ বনাই থাকোতেই জাহাজখনৰ পৰা পিছলি পৰিল এগৰাকী মহিলা । ঘটনাৰ বিৱৰণি মতে,আজি নিমাতী অফলামুখ ফেৰীঘাটৰ পৰা এম ভি সপ্তেশ্বৰী নামৰ ফেৰীখন মাজুলী দিশে গৈ থকা অৱস্থাতেই ব্ৰহ্মপুত্ৰৰ মাজভাগত যোৰহাটৰ বালিগাঁৱৰ পূজা বেজবৰুৱা নামৰ বিবাহিতা মহিলাগৰাকী জাহাজখনৰ পৰা পিছলি পৰে । হঠাতে এইদৰে ঘটা ঘটনাটোৰ ফলত যাত্ৰীসকলৰ মাজত হুৱাদুৱাৰ সৃষ্টি হয় । মহিলাগৰাকীৰ প্ৰাণ ৰক্ষাৰ বাবে যাত্ৰী সকলে চিঞৰ-বাখৰ কৰিবলৈ ধৰে ।
যাত্ৰীসকলৰ চিঞৰ শুনি অকণো সময় নষ্ট নকৰি এম ভি সপ্তেশ্বৰী নামৰ ফেৰীখনৰ চালকজনে ব্ৰহ্মপুত্ৰ বুকুত জাপ দিয়ে । চালকজনৰ তৎপৰতাত ব্ৰহ্মপুত্ৰৰ বুকত পৰি যোৱা মহিলাগৰাকীৰ জীৱন কথমপি ৰক্ষা পৰে । সংকটজনক অৱস্থাত ১০৮ সেৱাৰ জৰিয়তে চিকিৎসা বাবে যোৰহাট চিকিৎসা মহাবিদ্যালয় হাস্পতাললৈ প্ৰেৰণ কৰা হয় ।