নগাঁও, 16 ফেব্ৰুৱাৰী : পশ্চিম কাৰ্বি আংলঙত কে এছ এৰ সদস্যক আক্ৰমণ কৰাৰ ঘটনাক কেন্দ্ৰ কৰি জিলাখনত অব্যাহত আছে উত্তেজনা ৷ ভূমি বেদখলমুক্ত আৰু ভূমি পট্টা প্ৰদানৰ বিৰোধিতাৰে প্ৰতিবাদ সাব্যস্ত কৰিছিল কে এছ কে ধৰি অন্য সংগঠনে ৷ কিন্তু প্ৰতিবাদকাৰীৰ ওপৰত ভূমি পট্টা বিচৰা একাংশই হঠাৎ আক্ৰমণ কৰাৰ ফলত কেইবাজনো প্ৰতিবাদকাৰী আহত হয় ৷ যাক লৈ সমগ্ৰ পশ্চিম কাৰ্বি আংলং জিলাত সৃষ্টি হয় উত্তপ্ত পৰিস্থিতিৰ ৷
জিলাখনৰ খেৰণিত শুকুৰবাৰে আক্ৰমণকাৰীক কঠোৰ শাস্তি প্ৰদানৰ দাবীত প্ৰতিবাদ সাব্যস্ত কৰি পথ অৱৰোধ কৰে কাৰ্বি আংলঙৰ একাধিক সংগঠনে ৷ পৰিস্থিতি অধিক উত্তপ্ত হৈ পৰাত ঘটনাস্থলীত আৰক্ষী, চি আৰু পি এফ মোতায়েন কৰিবলগীয়া হয় ৷ ইফালে পশ্চিম কাৰ্বি আংলং জিলাত সৃষ্টি হোৱা উত্তপ্ত পৰিস্থিতিক লৈ কঠোৰ হৈছে অসম আৰক্ষীৰ সঞ্চালক প্ৰধান জি পি সিং ৷ শুকুৰবাৰে প্ৰতিবাদকাৰীৰ ওপৰত আক্ৰমণ সংঘটিত কৰা ঘটনাৰে জৰিত 17 জনকৈ লোকক আৰক্ষীয়ে গ্ৰেপ্তাৰ কৰিছে ৷