গণতান্ত্ৰিক আন্দোলনত অগণতান্ত্ৰিক বাধা ! বিনাশ কালত বিপৰীত বুদ্ধি লোৱা বুলি কাক ক’লে সাংসদ ৰকিবুলে

মঙলবাৰে জিলাই জিলাই কংগ্ৰেছে বাহিৰ কৰিছে বাবা চাহেব আম্বেদকাৰ সন্মান যাত্ৰা ৷ তাৰ পূৰ্বেই কংগ্ৰেছ সাংসদ ৰকিবুল হুছেইন সৰৱ হৈ পৰিল মুখ্যমন্ত্ৰীৰ বিৰুদ্ধে ৷

মাণিকপুৰ: মুখ্যমন্ত্ৰী ড৹ হিমন্ত বিশ্ব শৰ্মাৰ অত্যাচাৰী শাসনৰ বাবেই কংগ্ৰেছত যোগদান কৰিছে হাজাৰ হাজাৰ লোকে । বঙাইগাঁৱৰ বালাৰচৰত কংগ্ৰেছৰ কৰ্মী আৰু যোগদান সভাত মুখ্যমন্ত্ৰীগৰাকীৰ বিৰুদ্ধে সৰৱ হৈ এইদৰে মন্তব্য় কৰিলে সাংসদ ৰকিবুল হুছেইনে । কি কৰণে আজি মানুহে বিজেপি ত্য়াগ কৰি কংগ্ৰছৰ প্ৰতি আকৰ্ষিত হৈছে সেই বিষয়েও ব্য়াখ্য়া কৰিলে সাংসদগৰাকীয়ে ।

বিজেপি বিৰোধী পৰিৱেশে বিৰাজ কৰিছে :

বিজেপি, অগপ আৰু এআই ইউৰ দুই শতাধিক কৰ্মীয়ে কংগ্ৰেছত যোগদান কৰা সভাখনত ৰকিবুল হুছেইনে কয় মুখ্যমন্ত্ৰীৰ বিৰুদ্ধে সৰৱ হৈ কয়, "হিমন্ত বিশ্ব শৰ্মাৰ অত্যাচাৰী শাসনৰ বাবে হাজাৰ হাজাৰ লোক কংগ্ৰেছত যোগদান কৰিছে । যিমানেই নিৰ্বাচনৰ দিন ওচৰ চাপি আহিছে সিমানেই হিমন্ত বিশ্ব শৰ্মাৰ অত্য়াচাৰ সহিব নোৱাৰি সকলো জাতি-জনগোষ্ঠীৰ মানুহে কংগ্ৰেছ দলত যোগদান কৰিছে আৰু ৰাজ্যত বিজেপি বিৰোধী পৰিৱেশে বিৰাজ কৰিছে ।"

মুখ্য়মন্ত্ৰীক ১০ কিলোমিটাৰ ব্য়াসাৰ্ধলৈও আহিবলৈ নিদিয়ে :

আনহাতে, মিঞা প্ৰসংগত মুখ্য়মন্ত্ৰীগৰাকীক তীব্ৰ সমালোচনা কৰি কয়, "আজীৱন শত্ৰু বুলি জ্ঞান কৰা মিঞাৰ ওচৰ চাপিবলৈ বাধ্য় হৈছে মুখ্যমন্ত্ৰী । মিঞাৰ ভোট নালাগে বুলি কোৱা হিমন্ত বিশ্ব শৰ্মাই এতিয়া মিঞাৰ ঘৰে ঘৰে ঘূৰিছে । ইয়াকে কয় ঠেলাৰ নাম বাবাজী । অসমৰ মানুহে যি ঠেলা দিছে এই ঠেলাত তেওঁ মিঞাৰ ওচৰলৈ গৈ সাষ্টাংগ প্ৰণাম দি এতিয়া মিঞাৰেই ভোট খুজিব লগা হৈছে । গতিকে এইটো হ'ল বিনাশ কালে বিপৰীত বুদ্ধি । তেওঁ এতিয়া ইকুল-সিকুল হেৰুৱাই ব্য়াকুল হৈ পৰিছে । ৰাইজে তেওঁক ১০ কিলোমিটাৰ ব্য়াসাৰ্ধলৈও আহিব নিদিব । তেওঁৰ দৰে অত্য়াচাৰী শাসকক নিৰ্বাচনৰ সময়ত ৰাইজে ওচৰ চাপিবলৈ নিদিব । কাৰণ তেওঁ বহুত মানুহক জ্বলাইছে । বিভিন্ন মানুহক ভয়-ভীতি খুৱাইছে ।"

বিনাশ কালে বিপৰীত বুদ্ধি :
ৰাজভৱনৰ সম্মুখত ১৬৩ ধাৰা জাৰি কৰা সন্দৰ্ভত বিনাশ কালে বিপৰীত বুদ্ধি বুলি উল্লেখ কৰি ৰকিবুল হুছেইনে কয়, "গণতান্ত্ৰিক আন্দোলনক যিদৰে বাধা দিব খুজিছে সেয়া অ-গণতান্ত্ৰিক । যেতিয়া মানুহৰ বেয়া দিন আহে তেতিয়া মানুহে এনে কাম কৰে ।"

ইপিনে, ৰাজ্য় চৰকাৰে লোৱা ঋণ সন্দৰ্ভতো সাংসদগৰাকীয়ে মন্তব্য় কৰি কয়, "হিমন্ত বিশ্ব শৰ্মাই এতিয়া ভালদৰে বুজি পাইছে যে তেওঁ আৰু অহাবাৰ আহিব নোৱাৰে । তেওঁৰ পিচত যিজন মুখ্য়মন্ত্ৰী হ'ব তেওঁ যাতে অসমখন চলাব নোৱাৰে তাৰ ব্য়ৱস্থা কৰি যাব বিচাৰিছে ।" তদুপৰি পুৰণা গাড়ীৰ ওপৰত ১২ ৰ পৰা ১৮ শতাংশ জিএছটি আৰোপ কৰা সন্দৰ্ভততো গুৰুত্বপূৰ্ণ মন্তব্য কৰে সাংসদগৰাকীয়ে ।

বঙাইগাঁও জিলাৰ বালাৰচৰ ৰাজীৱ ভৱনত কংগ্ৰেছৰ কৰ্মী আৰু যোগদান সভা সোমবাৰে আবেলি অনুষ্ঠিত হয় । জিলা কংগ্ৰেছৰ সভাপতি আবুল কাশেমৰ পৌৰোহিত্যত অনুষ্ঠিত এই সভাত সাংসদ ৰকিবুল হুছেইনৰ লগতে বিধায়ক আব্দুল বাতিন খন্দকাৰ আৰু প্ৰদেশ কংগ্ৰেছৰ সম্পাদক নুৰুল ইছলাম উপস্থিত থাকে ।

লগতে পঢ়ক:প্ৰধানমন্ত্ৰী-গৃহমন্ত্ৰীৰ পদত্য়াগৰ দাবী প্ৰদ্যুৎ বৰদলৈৰ - PRADYUT BORDOLOI SLAMS BJP