ডিব্ৰুগড় : অসমৰ চাহ পৃথিৱী বিখ্যাত । এই চাহৰ লগতে অসমৰ সমাজ জীৱন আৰু অৰ্থনৈতিক ব্যৱস্থা বহু পৰিমাণে জড়িত । ইংৰাজৰ শাসনকালতে অসমত চাহ খেতি আৰু চাহ উদ্যোগ আৰম্ভ হৈছিল আৰু সেই চাহে বৰ্তমান সময়ত অসমৰ অৰ্থনীতি শক্তিশালী কৰিছে ।
ব্ৰিটিছসকলে চাহ বাগিচা স্থাপন কৰি নিৰ্মাণ কৰিছিল বাংলো । কালক্ৰমত চাহ বাগিচাসমূহৰ মালিক, পৰিচালক সলনি হোৱাত নতুনত্ব আহিল চাহ বাগিচাসমূহলৈ । কিন্তু ইয়াৰ মাজতো অসমৰ কিছু কিছু বাগিচাত আজিও দেখিবলৈ পোৱা যায় স্বাধীনতাৰ পূৰ্বৰ ব্ৰিটিছৰ দিনৰ ঐতিহাসিক স্মৃতি । ঠিক তেনেদৰে চাহ বাগিচাৰ মাজত আজিও জিলিকি আছে ইংৰাজে নিৰ্মাণ কৰা বাংলো ।
ব্ৰিটিছসকলে নিৰ্মাণ কৰা চাহ বাগিচাৰ মাজত থকা তেনেকুৱা এটা বাংলো চাবলৈ আপুনি আহিব লাগিব ডিব্ৰুগড় আৰু তিনিচুকীয়া জিলাৰ মধ্যভাগত অৱস্থিত চাবুৱাৰ ৰাষ্ট্ৰীয় ঘাইপথৰ সমীপতে থকা শিয়ালকাটি চাহ বাগিচালৈ । ভাৰত স্বাধীন হোৱাৰ পূৰ্বে অৰ্থাৎ ১৯৩১ চনতে ব্ৰিটিছে নিৰ্মাণ কৰা বাংলোটো আজিও ব্যৱহাৰোপযোগী হৈ আছে । ইংৰাজ শাসনৰ স্মৃতি জড়িত বাংলোটো সংৰক্ষণৰ চিন্তা কৰিছে ৰাজ্য চৰকাৰে । চাহ পৰ্যটন আঁচনিৰ অধীনত বাংলোটো পুনঃনিৰ্মাণৰ ব্যৱস্থা কৰিছে চৰকাৰে । 'অসম চাহ পৰ্যটন উন্নয়ন আঁচনি'ৰ অধীনত বাংলোটোৰ পুনঃনিৰ্মাণৰ কাম-কাজ ইতিমধ্যে আৰম্ভ কৰা হৈছে । কিছুদিন পূৰ্বে অসম চৰকাৰৰ পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱাই বাংলোটোত উপস্থিত হৈ কাম-কাজৰ অগ্ৰগতিৰ বুজ লৈছে ।
ব্ৰিটিছে কেনেকৈ নিৰ্মাণ কৰিছিল বাংলোটো ?
শিয়ালকাটি চাহ বাগিচাত ১৯৩১ চনতে ব্ৰিটিছে নিৰ্মাণ কৰা বাংলোটো আজিও অতি সুন্দৰ ৰূপত আছে । বাগিচা কৰ্তৃপক্ষই জানিবলৈ দিয়া অনুসৰি ব্ৰিটিছে দুমহলীয়া বাংলোটোৰ খুটাবোৰ লোৰ, বেৰবোৰ বাঁহৰ য'ত চিমেণ্টৰ প্ৰলেপ আছে আৰু মজিয়া কাঠেৰে নিৰ্মাণ কৰিছিল । স্বাধীনতাৰ পূৰ্বে নিৰ্মাণ কৰা ঘৰটোৰ খুটাবোৰ সলনি নকৰাকৈয়ে পুনঃনিৰ্মাণৰ কাম কৰিছে চৰকাৰ আৰু বাগিচা কৰ্তৃপক্ষই । বাংলোটোৰ ভিতৰত আজিও ব্ৰিটিছসকলে ব্যৱহাৰ কৰা দুই এবিধ সামগ্ৰী দেখিবলৈ পোৱা যায় ।
ব্ৰিটিছে নিৰ্মাণ কৰা বাংলোটো সংৰক্ষণ কৰিব চৰকাৰে :
শেহতীয়াকৈ ৰাজ্য চৰকাৰে পৰ্যটন ক্ষেত্ৰত অধিক গুৰুত্ব প্ৰদান কৰিছে । কিয়নো দেশী-বিদেশী পৰ্যটক আকৰ্ষিত হ'লেই আৰ্থিকভাৱে লাভাম্বিত হ'ব চৰকাৰ । সেয়ে ঐতিহাসিক ক্ষেত্ৰৰ লগতে স্মৃতি বিজড়িত সম্পদ সংৰক্ষণ কৰিবলৈ চৰকাৰে চেষ্টা চলাইছে । চাহ বাগিচাৰ মাজত জিলিকি থকা ইংৰাজে নিৰ্মাণ কৰা বাংলোটো বহুতৰ বাবে হৈ পৰিব আকৰ্ষণৰ কেন্দ্ৰবিন্দু । সেয়ে চাহ বাগিচাৰ কৰ্তৃপক্ষৰ সৈতে চুক্তিবদ্ধ হৈ অসম চাহ পৰ্যটন উন্নয়ন আঁচনিৰ অধীনত বাংলোটো পুনঃনিৰ্মাণৰ বাবে চেষ্টা কৰিছে চৰকাৰে । আগন্তুক দিনত ইয়াত পৰ্যটকসকলে আহি অত্যাধুনিক প্ৰযুক্তিগত কোঠালিৰ লগতে ছুইমিং পুল, ৰেষ্টুৰেণ্ট আদিৰ সুবিধা লৈ চাহ বাগিচাৰ মাজত থাকি ভাল লগা সময় উপভোগ কৰিব পাৰিব । ৰাজ্য চৰকাৰৰ এই পদক্ষেপে ৰাজ্যখনৰ পৰ্যটনৰ দিশটোক নতুন গতি দিব বুলি আশা কৰিছে সকলোৱে ।
কলকাতাৰ পৰা অনা হৈছে শ্ৰমিক
ঐতিহাসিক বাংলোটো থকা শিয়ালকাটি চাহ বাগিচাখন বৰ্তমান স্বনন্দা চাহ কোম্পানীৰ অধীনত পৰিচালিত হৈ আছে । বাংলোটোৰ সম্পৰ্কত বাগিচাৰ পৰিচালক বৈকুণ্ঠ শইকীয়াই কয়, "অসম চৰকাৰে বাগিচা কৰ্তৃপক্ষৰ সৈতে চুক্তিবদ্ধ হৈ অসম চাহ পৰ্যটন উন্নয়ন আঁচনিৰ জৰিয়তে চাহ পৰ্যটনৰ কাম কৰিবলৈ চেষ্টা কৰিছে । বাংলোটোৰ পুনঃনিৰ্মাণৰ ক্ষেত্ৰত চৰকাৰ আৰু বাগিচা কৰ্তৃপক্ষই ধন বিনিয়োগ কৰিব । দুটা মহলাৰ বাংলোটোত অতিথিৰ বাবে কেইবাটাও কোঠা থকাৰ লগতে বাৰ, ৰেষ্টুৰেণ্ট আৰু ছুইমিং পুল থাকিব । চাহ পৰ্যটকসকলৰ বাবে এই বাংলোটো পুনঃনিৰ্মাণ কৰা হৈছে যদিও স্থানীয় ৰাইজেও প্ৰয়োজন অনুসৰি ইয়াক ব্যৱহাৰ কৰিব পাৰিব । ব্ৰিটিছৰ দিনৰ বাংলোটো পুনঃনিৰ্মাণৰ বাবে কলকতাৰ পৰা অহা ১০ৰ পৰা ১৫ জন মিস্ত্ৰীয়ে কাম কৰি আছে ।"
লগতে পঢ়ক :বসুন্ধৰা ৩.০ : গুৱাহাটীৰ পট্টাহীন ৯০ শতাংশই কৰিব নোৱাৰিলে আবেদন - MISSION BASUNDHARA
