গুৱাহাটী, ২০ ছেপ্টেম্বৰ : বৃহস্পতিবাৰৰ পৰা ৰাজ্যজুৰি আৰম্ভ হৈছে অৰুণোদয় ৩.০ । দিশপুৰত মুখ্যমন্ত্ৰী হিমন্ত বিশ্ব শৰ্মাই শুভাৰম্ভ কৰে অৰুণোদয় ৩.০ ৰ । মুঠ ৩৭.২ লাখ হিতাধিকাৰীক সামৰি ল'ব এই আঁচনিয়ে । এই অৰুণোদয় ৩.০ ত ৰাজ্যৰ মুঠ ৩৭.৪০ লাখ মহিলা হিতাধিকাৰীক মাহিলী ৪৬৭ কোটি টকাকৈ হ’ব ৫৬০৪ কোটি টকা খৰচ হ’ব ।
স্বাভাৱিকতে সাধাৰণ জনতাৰ অনুসন্ধিৎসা কোনে কোনে পাব ৰেচন কাৰ্ডৰ সুবিধা ? কোনে কোনে নাপাব ৰেচন কাৰ্ড ? কোন কোন বিবেচিত হ’ব অৰুণোদয়ৰ বাবে ? কোন কোন অযোগ্য হ’ব এই আঁচনিৰ হিতাধিকাৰীৰ বাবে ৷ এই কথাও সংবাদমেলত ঘোষণা কৰিলে মুখ্যমন্ত্ৰী হিমন্ত বিশ্ব শৰ্মাই ৷
অৰুণোদয় ৩.০ (Orunodoi Official page) প্ৰতিখন ৰেচন কাৰ্ডৰ বিপৰীতে অৰুণোদয়ৰ সুবিধা লাভ কৰিব কোনে কোনে ? জানো আহক - অৰুণোদয় আঁচনিত অন্তর্ভুক্তিৰ চৰ্তসমূহ :
অৰুণোদয়ৰ হিতাধিকাৰী হোৱাৰ প্ৰাথমিক চৰ্ত হ’ল আবেদনকাৰী হ’ব লাগিব অসমৰ স্থায়ী বাসিন্দা ৷ বৈধ আধাৰযুক্ত ৰেচন কাৰ্ডৰ অধিকাৰী হ’ব লাগিব আবেদনকাৰী ৷ এটা পৰিয়ালৰ পৰা প্ৰাপ্তবয়স্ক মহিলা (১৮+ বছৰ) ৷ বিধৱা, ৪৫ বছৰৰ উৰ্ধৰ অবিবাহিত মহিলা, বিবাহ বিচ্ছেদিত, অকলশৰীয়া মহিলাৰ লগতে তৃতীয় লিংগৰ ব্যক্তিয়ে আৱেদন কৰিব পাৰিব অৰুণোদয় আঁচনিত । লিংগ নিৰ্বিশেষে দিব্যাংগ ব্যক্তিয়েও কৰিব পাৰিব আবেদন । বৃদ্ধ বা দুৰ্বল মহিলাই আবেদন কৰিব পাৰিব । ৬০ৰোৰ্ধ উপাৰ্জনকাৰী অংগক্ষত বা বৃদ্ধ হোৱা পৰিয়ালৰ মহিলা কৰিব পাহিব আবেদন । ইয়াৰ উপৰি এইচ আই ভি, থেলাচেমিয়া, হেম'ফিলা, চেৰিৱেল পালছী, কুষ্ঠ ৰোগ বা অটিজম থকা মহিলায়ো আবেদন কৰিব পাৰিব অৰুণোদয় আঁচনিত । আশ্ৰয়হীন, নিঃস্ব বা ভিক্ষাৰে জীৱন নিৰ্বাহ কৰা মহিলাও অৰুণোদয়ৰ হিতাধিকাৰী ৷ অন্ত্যোদয়া অন্ন যোজনাৰ অন্তৰ্গত মহিলা হিতাধিকাৰীয়েও অৰুণোদয়ত কৰিব পাৰিব আৱেদন । কোন সকল লোকে কৰিব নোৱাৰিব আবেদন কৰিব ? অযোগ্য বিবেচিত হোৱাৰ চৰ্ত সমূহো ঘোষণা কৰিলে মুখ্যমন্ত্ৰীয়ে - সাংসদ, বিধায়ক, মুখ্য কার্যবাহী সদস্য, কার্যবাহী সদস্য বা তেওঁলোকৰ প্ৰাক্তন সমকক্ষসকলৰ পৰিয়ালে অৰুণোদয়ত আবেদন কৰিব নোৱাৰিব । পঞ্চায়ত, নগৰীয়া স্থানীয় নিকায় আৰু স্বায়ত্তশাসিত পৰিষদৰ সদস্যসকল অৰুণোদয়ৰ হিতাধিকাৰী হ’ব নোৱাৰিব । চিকিৎসক, অভিযন্তা, আৰ্কিটেক্ট, চার্টার্ড একাউন্টেন্ট, উকীল, বেংকাৰ, শিক্ষক, চৰকাৰী কৰ্মচাৰী বা পেঞ্চনাৰ আদিয়ে অৰুণোদয়ত আবেদন কৰিব নোৱাৰিব । চৰকাৰী ঠিকাদাৰ, ৰিয়েল ইষ্টেট বিল্ডাৰ, উদ্যোগপতি, বাণিজ্য অনুজ্ঞাপত্ৰধাৰী, ব্যৱসায়ী আৰু আয়কৰ দাতা হ’ব নোৱাৰিব অৰুণোদয়ৰ হিতাধিকাৰী ৷ মটৰচালিত চাৰিচকীয়া বাহন থকা পৰিয়ালৰ লোকেও আবেদন কৰিব নোৱাৰিব অৰুণোদয়ৰ বাবে । ‘‘অৰুণোদয় প্লাছ’’ৰ দৰে একে ধৰণৰ নগদ আঁচনিৰ হিতাধিকাৰীয়েও আবেদন কৰিব নোৱাৰিব । ৰাষ্ট্ৰীয় খাদ্য সুৰক্ষা আইনৰ অধীনত সামগ্ৰিক ঘৰুৱা উপাৰ্জনৰ সীমা অতিক্ৰম কৰা পৰিয়াল যোগ্য বিবেচিত নহ’ব অৰুণোদয়ৰ বাবে ৷
