তিনিচুকীয়া : অৱশেষত স্বস্তিৰ নিশ্বাস এৰিছে তিনিচুকীয়াৰ ওকনিমুৰীয়া গাঁওবাসীয়ে ৷ কিয়নো দীৰ্ঘদিনৰ পৰা তিনিচুকীয়াৰ ওকনিমুৰীয়া গাঁৱত ত্ৰাস সৃষ্টি কৰা বনৰজা হ’ল পিঞ্জৰাবদ্ধ ।
দুদিন পূৰ্বে গাঁওবাসীয়ে বন বিভাগৰ সহযোগত পতা এটা পিঞ্জৰাত আবদ্ধ হ’ল প্ৰকাণ্ড এটা নাহৰফুটুকী । পৰৱৰ্তী সময়ত বন বিভাগৰ এটা দল উক্ত অঞ্চলত উপস্থিত হৈ উদ্ধাৰ কৰি লৈ যায় পিঞ্জৰাসহ নাহৰফুটুকীটো ।
এই সন্দৰ্ভত গাঁওবাসীয়ে জানিব দিয়া অনুসৰি, দীৰ্ঘদিনৰ পৰা স্থানীয় ৰাইজৰ নিদ্ৰাহৰণ কৰা আহিছিল এই বনৰজাই । বহুদিনৰ পৰা বাঘৰ আতংকত বিনিদ্ৰ ৰজনী কটাইছিল গঞাই । প্ৰায় এক-দুই মাহৰ পৰা গাঁওখনত ইঘৰৰ পাছত সিঘৰৰ গৰু, ছাগলী আদি জীৱ-জন্তু নোহোৱা হৈছিল ।
প্ৰথম অৱস্থাত ৰাইজে গাঁৱৰ গৰু-ছাগলীবোৰ চোৰে চুৰি কৰি নিছে বুলি অনুমান কৰিছিল । কিন্তু এদিন স্থানীয় ৰাইজে ৰাস্তাত নাহৰফুটুকীটো দেখিহে গম পালে যে গাঁৱৰ গৰু-ছাগলী চোৰে নিয়া নাই, বাঘেহে খাইছে ৷ তাৰ পাছত স্থানীয় ৰাইজে বন বিভাগক বাঘটোৰ বিষয়ে খবৰ দিয়ে ৷
পৰৱৰ্তী সময়ত উক্ত অঞ্চলত এটা পিঞ্জৰা পতা হয়, লগতে দুদিন পূৰ্বে গাঁওবাসীয়ে ধন উঠাই একগোট কৰি এটা ছাগলীও ক্ৰয় কৰে । প্ৰথমে বেলেগ এটা স্থানত পিঞ্জৰাটো পাতিছিল যদিও বাঘ বন্দী হোৱা নাছিল ৷ পৰৱৰ্তী সময়ত স্থান সলনি কৰি দিয়াত পিঞ্জৰাটোত আবদ্ধ হয় নাহৰফুটুকীটো ।
নাহৰফুটুকীটো পিঞ্জৰাবদ্ধ হোৱাৰ পাছতে স্থানীয় গাঁওবুঢ়াগৰাকীয়ে বন বিভাগক খবৰ দিয়ে ৷ তাৰ পাছতে বন বিভাগৰ এটা দল আহি নাহৰফুটুকীটো উদ্ধাৰ কৰি লৈ যায় ৷ এই বাঘটোক কোনো সংৰক্ষিত বনাঞ্চলত মুকলি কৰি দিয়া হ’ব বুলি বন বিভাগৰ লোকে সদৰী কৰে ।
