গুৱাহাটী, 20 এপ্ৰিল : শুকুৰবাৰে ঘোষণা হ'ল 2024 বৰ্ষৰ অসম হাইস্কুল শিক্ষান্ত পৰীক্ষাৰ ফলাফল ৷ পুৱা 10.30 বজাৰ লগে লগে অসম মাধ্যমিক শিক্ষা পৰিষদ (ছেবা) কৰ্তৃপক্ষই ঘোষণা কৰে মেট্ৰিকৰ ফলাফল ৷ 10 টাকৈ ৱেবছাইটত উপলব্ধ হয় ফলাফল ৷ এইবাৰ হাইস্কুল শিক্ষান্ত পৰীক্ষাত অৱতীৰ্ণ হৈছিল 4 লাখ 19 হাজাৰ 78 গৰাকী শিক্ষাৰ্থী ৷ তাৰে 3 লাখ 17 হাজাৰ 713 গৰাকী শিক্ষাৰ্থী উত্তীৰ্ণ হৈছে ৷ 2024 বৰ্ষৰ মেট্ৰিক পৰীক্ষাত উত্তীৰ্ণৰ হাৰ হৈছে 75.73% ৷ ইয়াৰে ছাত্ৰৰ উত্তীৰ্ণৰ হাৰ 77.3% হোৱাৰ বিপৰীতে ছাত্ৰীৰ উত্তীৰ্ণৰ হাৰ 74.4 % ৷
2024 বৰ্ষৰ মেট্ৰিক পৰীক্ষাৰ 91.2% উত্তীৰ্ণৰ হাৰেৰে শীৰ্ষস্থানত আছে চিৰাং জিলা ৷ আনহাতে 60.9% উত্তীৰ্ণৰ হাৰেৰে একেবাৰে শেষৰ স্থানত আছে ওদালগুৰি জিলা ৷ ইফালে 88.1% উত্তীৰ্ণৰ হাৰেৰে দ্বিতীয় স্থানত আছে নলবাৰী জিলা ৷ তৃতীয় স্থানত আছে ডিমা হাছাও জিলা ৷ জিলাখনৰ উত্তীৰ্ণৰ হাৰ হৈছে 87.1% ৷ 86.9% শতাংশ উত্তীৰ্ণৰ হাৰেৰে চতুৰ্থ স্থানত আছে বাক্সা জিলা ৷ পঞ্চম স্থানত আছে শিৱসাগৰ জিলা ৷ জিলাখনত এইবাৰ উত্তীৰ্ণৰ হাৰ হৈছে 85.1% ৷